Mazmure 64 - ጌሻ ማፃፋ

ኢታታፐ ታና አሻ

ዛማረታ ሀላቃስ የፀትዳ ዳዊታ ማዝሙረ

¹ አቤት ፆሳዉ፥ ታ ኡንአ ዎሳ ስአ፤ ታ ሞርከታ ማንደፈ፤ ታና አሻ።

² ናጋራንቾታ ማቆፈነ ኢታታ ዱላታፐ ታና ገን።

³ ኤንቲ ባንታ እንፃርሳ ማሻ መላ ሌፍዶሶና፤ ኢታ ቃላታ ዶንገ ቶራዳ ማልድ የዶሶና።

⁴ ኤንቲ ቆሰትድ ፅሎ አስ ባንታ ዶንግያን ቆሆሶና፤ አኬክ ባይና ዱኮሶና፤ ያዮኮና።

⁵ ኤንቲ ባንታ ኢታ ማቁዋስ እሶይ እሱዋ ምንሶና። ባንታ ፅህያ ዎና በሳ ኮዮሶና፤ ኤንቲ፥ “ኑና ኦን በአኔ?” ያጎሶና።

⁶ ኤንቲ ኢታባ ማቀትሸ፥ “ኑኒ ሎኦ ማቆ ማቀትዳ” ያጎሶና፤ ሄስ አሳ ዎዛና ቆፍ ጪሞ ግደይሳ በሴስ።

⁷ ሽን ፆሳይ ኤንታ ባ ዶንግያን ዱካና፤ ኤንቲ አኬኮና ማዱንፃና።

⁸ ኤንታ ማቁዋ እ ኤንታ ቦላ ዛራና፤ ኤንታ በእያ ኡባይ ሁጰ ቃና።

⁹ ሄ ዎደ አሳ ኡባይ ፆሳስ ያያና፤ እያ ኦሱዋ ኦዳናነ ዛር ዛር ቆፓና።

¹⁰ ፅሎት ጎዳን ኡፋይቶ፤ እያኮ ባቃትድ አቶ፤ ዎዛና ሱረት ኡባይ እያ ጋላቶ።