Mazmure 59 - ጌሻ ማፃፋ

ፆሳዉ ታና ታ ሞርከታፐ አሻ

“ይሶፋ” ጌተትያ ዲ ጩን የፀትዳ ዎሳ

¹ አቤት ታ ፆሳዉ፥ ታ ሞርከታፐ ታና አሻ፤ ታ ቦላ ደንደይሳታፐ ታና ናጋ።

² ኢታ ኦይሳታፐ ታና አሻ፤ ሱ ጉስያ አሳታፐ ታና አሻ።

³ አቤት ጎዳዉ፥ ኤንቲ ታና ዎናዉ ዙግድ ናገይሳ በአ። አቤት ጎዳዉ፥ ታ ናቁዋ ግሾ ዎይኮ ታ ናጋራ ግሾ ግዶናሽን ጮ ታ ቦላ ቶቦሶና።

⁴ ታ አይ ባላካ ኦና ታና ቆሀናዉ ጊግዶሶና፤ ሄሳ በአ፤ ታና ማዳናዉ ደንዳ።

⁵ አቤት ኡባፈ ዎልቃማ ፆሳዉ፥ ጎዳዉ፥ እስራኤለ ፆሳዉ፥ ካዎተታ ኡባ ፕርዳናዉ ባርካ፤ ኢታ ኦይሳታ ማሮፓ። ሳላሀ

⁶ ኤንቲ ካታማ ግዶን ዩይሸ ፔእድ፥ ካና ላውሸ ስሞሶና።

⁷ ኤንታ ዶናፐ ከየይሳ በአ፤ ኤንታ እንፃርሳይ ማሻ መላ፤ አስ ኤንታና ስኤይሳ ቆፖኮና።

⁸ ሽን አቤት ጎዳዉ፥ ነ ኤንታ ቦላ ሚጫሳ፤ ካዎተታ ኡባ ለቅሳሳ።

⁹ ፆሳዉ፥ ነ ታ ሚፃ ግድያ ግሾ፥ ታ ነ ዎልቃን አማነታይስ።

¹⁰ ታ ፆሳይ ባ ሲቁዋን ታኮ ያና፤ ታ ፆሳይ ታ ሞርከታ ፆነተ ታና በሳና።

¹¹ ታ አሳት ዶጎና መላ ነ ኤንታ ዎፓ። አቤት ጎዳዉ፥ ኑ ጎንዳልያዉ፥ ነ ዎልቃን ኤንታ ላላነ ካዉሻ።

¹² ኤንታ ዶናፐ ከይያ ናጋራ ግሾ ኤንታ እንፃርሳፈ ፑልትያ ቃላ ግሾ፥ ባንታ ኦቶሩዋን ኦይከቶ፤ ኤንታ ባደነ ዎርዱዋ ግሾ፥

¹³ ነ ሀንቁዋን ኤንታ ይሳ፤ ኤንታ ኩመ ድጋ። ሄሳን ፆሳይ ያይቆባ ዘረ ሃረይሳነ ሳኣ ጋፃ ጋካናዉ ሃረይስ ኤረታና። ሳላሀ

¹⁴ ኤንቲ ካታማ ግዶን ዩይሸ ፔእድ፥ ካና ላውሸ ስሞሶና።

¹⁵ ኤንቲ ምያባ ደማናዉ ቶይላቶሶና፤ ካሎና አትዳ ላውያ ካና ግዶሶና።

¹⁶ ሽን ታኒ ነ ዎልቃ ሳባና፤ ዎንታ ነ ሲቁዋ የፃና። ኔኒ ታዉ ታ ዋይያ ጋላስ፥ ታ ባቃታ አትያ በሰነ ሚፃ።

¹⁷ አቤት ታዉ ዎልቃ ግድዳ ፆሳዉ፥ ታ ነና ሳባና። ታ ቆሰታዳ አትያ በሳይነ ሲቁዋ ታና በሲያ ፆሳይ ነና።