Mazmure 51 - ጌሻ ማፃፋ

ታዉ ጌሻ ዎዛና እማ

ዳዊቲ በርሳበራ ላይማትዳ ዎደ ናብያ ናታን እያዉ ኦድ ስምን ዳዊቲ የፅዳ ማዝሙረ

¹ አቤት ፆሳዉ፥ ነ መርና ሲቁዋዳ ታና ማራ፤ ነ ቃታ ዳሩዋ መላ ታ ናጋራ ቁቻ።

² ታ ኢታተፈ ታና ሜጫ፤ ታ ናጋራፐ ታና ጌሻ።

³ ታኒ ታ ቆሁዋ ኤራይስ፤ ታ ናጋራይ ኡባ ዎደ ታ ስንና።

⁴ ታኒ ነና፥ ነ ፃላላ ቆሀስ፤ ነ ስንን ኢታባ ኦስ። ሄሳ ግሾ፥ ነ ሀንቁዋን ነ ልከ፤ ነ ፕርዳንካ ነ ፅሎ።

⁵ ሄኮ ታ የለትያ ዎደ ናጋራንቾ፤ ታ አየ ኡሎን ቡሮ አትያ፥ ዎደፐ ዶማዳ ታኒ ናጋራንቾ።

⁶ ኔኒ አሳ ዎዛናፐ ቱማተ ኮያሳ፤ ታ ጋ አሳተ ጭንጫተ ታማርሳ።

⁷ ህሶጰ ቦንጮን ታና ዉርፃ፤ ታ ጌያና፤ ታና ሜጫ፤ ታ ሻቻፈ አዳ ቦፃና።

⁸ ነ ታና ኡፋይስነ ሎኦባ ስሳ፤ ነ መንረዳ ታ መቀ ዛራዳ ኡፋይሳ።

⁹ ነ ሶምኡዋ ታ ናጋራፐ ሀራ ሶ ዛራ፤ ታ ባላ ኡባ ቁቻ።

¹⁰ አቤት ፆሳዉ፥ ጌሻ ዎዛና ታናን መ፤ ቃፆና አያና ታ ግዶን ኦራ።

¹¹ ታና ነ ስንፈ የጎፋ፤ ነ ጌሻ አያና ታፐ ኤኮፋ።

¹² ነ አቶተ ኡፋይሳ ታዉ ዛራ፤ ታ ነዉ ኪተታና መላ ታና ዘምፕሳ።

¹³ ታ ሄ ዎደ ህገ መንይሳታ ነ ኦግያ ታማርሳና፤ ናጋራንቾትካ ኔኮ ስማና።

¹⁴ አቤት ፆሳዉ፥ ታና አሽያ ፆሳዉ፥ ሱ ጉስያ ናጋራፐ ታና አሻ፤ ሄ ዎደ ታ እንፃርሳይ ነ ፅሎተ የፃና።

¹⁵ አቤት ጎዳዉ፥ ታ ዶና ዶያ፤ ታ እንፃርሳይ ነ ጋላታ አዋጃና።

¹⁶ ነ ያርሾን ኡፋይትያኮ፥ ታ ነዉ ያርሻናሽን፥ ነ ፁሳ ያርሾን ኡፋይታካ።

¹⁷ ፆሳ ያርሾይ አዳ አያና፤ ፆሳዉ፥ ነ መቅዳነ ካዉይዳ ዎዛና ካካ።

¹⁸ አቤት ፆሳዉ፥ ዶሳን ፅዮነስ ኬሀ፤ የሩሳላመ ግምበታ ግምባ።

¹⁹ ሄ ዎደ ነ ፅሎተ ያርሾንነ ፁሳ ያርሾን ኡፋይታና። ፖሎ ሽቂያ መሄ ያርሾን ኡፋይታና፤ ኮርማት ነ ያርሾ በሳን ያርሸታና።