Mazmure 45 - ጌሻ ማፃፋ

ፆሳ አራታይ መርናሳ

አኬካን ፃፍዳ ሲቆ ማዝሙረ

¹ ታኒ ታ የ ካዋስ ስሳና፤ ታ ዎዛናይ ሎኦ ቆፋ ፑልቴስ፤ ታ እንፃርሳይ ሎኦ ፃፍያ አሳ ብእረ መላ።

² አሳ ኡባፈ ኔኒ ማላ ሎኦ፤ ነ መተርሻይ አ ኬሀተ ቃላን ኩምስ፤ ፆሳይ ነና መርናዉ አንጅስ።

³ ዎልቃማ ካዋዉ፥ ነ ማሻ ዳንጫ፤ ቦንቾነ ቴማ ማአ።

⁴ ነ ቱማተ፥ ነ አዳተነ ነ ፅሎተ ግሾ፥ ነ ቴማ ማአዳ ፆናናዉ ደንዳ፤ ነ ኡሻቻ ኩሸይ ማላልስያባ በሶ።

⁵ ነ ቶራት ቃራ፤ ኤንቲ ካዋ ሞርከታ ዎዛና ጫዶ፤ ካዎተት ነ ቶሁዋ ጋርሳን ኩንዶ።

⁶ ፆሳዉ፥ ነ አራታይ መርናዉ ደኤስ፤ ነ ካዎተ ፃምአይ ፅሎተ ፃምኣ።

⁷ ኔኒ ፅሎተ ዶሳዳ ጌላተ እፃሳ፤ ሄሳ ግሾ፥ ፆሳይ፥ ነ ፆሳይ፥ ነ ላገታፐ አድ፥ ነና ኡፋይሳ ዛይተን ትይስ።

⁸ ጎዳረ ኡን፥ ካርበንነ ቡርጉደን ዋላከትዳ ሽቶን፥ ነ ማኦይ ፑከትስ። ዳንጋርሳ ዛለን አሌቀትዳ፥ ነ ካዎ ጋን ዲፀትያ ዲይ ነና ኡፋይሴስ።

⁹ ካዎ ኬን ደእያ ማጫሳታ ግዶን፤ ካዎታ ማጫ ናይት ደኦሶና። ካውያ ኦፍራ ዎርቃን አሌቀታዳ፥ ኔፐ ኡሻቻ ባጋን ኤቃሱ።

¹⁰ ታ ናተ፥ ስአ፤ ዎዛናን ዎ፤ ነ ሀይ ሃ ዛራ፤ ነ ደርያነ ነ አዋ ኬ ዶጋ።

¹¹ ካዎይ ነ ማላን ኡፋይትስ፤ ነ ጎዳ ግድያ ግሾ እያ ቦንቻ።

¹² ፅሮሳ አሳይ ነዉ ዎይቶ ኤክድ ያና፤ ዱረት ነና አዳሻና።

¹³ ካዋ ናእያ፥ ካዎ ኬን ዋና ሎአይ! እ ያጋኖ ማኦይ ዎርቃን አሌቀትስ።

¹⁴ ባ አሌቆ ማኡዋ ማአዳ፥ ካዋኮ ሞይዘታሱ። እ ጌላኦ ላገት እዮ ካልድ፥ እያ ስን ኤክድ ይዶሶና።

¹⁵ ኤንቲ ኡፋይትሸ ይድ፥ ካዎ ጋ ገሎሶና።

¹⁶ ካዋዉ፥ ነ አዋታ በሳ ነ ናይት ላታና፤ ቢታ ኡባን ነ ኤንታ ሹማና።

¹⁷ ታ ነ ሱን የለታ ኡባን፥ ሀሳየታናዳ ኦና። ሄሳ ግሾ፥ አሳይ መርናዉ ነና ጋላታና።