Mazmure 42 - ጌሻ ማፃፋ

ናምአን ማፃፋ ( ማዝ 42—72 ) ጎደትያ አሳ ዎሳ

አኬካን ፃፍዳ ማዝሙረ

¹ ጋር ፑልቶ ሃ ላሞተይሳዳ፥ ፆሳዉ፥ ታ ሸምፕያ ነና ላሞታዉሱ።

² “ታ ሸምፕያ ፆሳ፥ ደኦ ፆሳ በአናዉ ሳሞታዉሱ፤ አዉደ ጋካዳ እያ ሶምኡዋ በኦ” ያጋዉሱ።

³ አሳይ፥ “ነ ፆሳይ አዉን ደኢ?” ግያ ዎደ፥ ጋላስነ ቃም ታዉ አፉ ካ ግድስ።

⁴ ታኒ ኤንታ ባኣለ ቦንቻናዉ ሺቅዳ፥ ዳሮ አሳ ካለዳ፥ ጋላታ የንነ እልልሳን ፆሳ ኬ በይሳ ቆፕያ ዎደ፥ ታ ዎዛናይ አዛኖን መቄስ።

⁵ ታ ሸምፐ፥ አይስ አዛናይ? አይስ ኡንኤታይ? ነ ፆሳን ኡፋይስ ዎ፤ ታና አሽያ፥ ታ ፆሳ ታኒ ቡሮ ጋላታና።

⁶ ታ ዎዛናይ አዛንስ፤ ሄሳ ግሾ ታኒ ዮርዳኖሰ ቢታን፥ አርሞና ቃን፥ ምዛረ ዙማን፥ ኤቃዳ ነና ቆፓና።

⁷ ነ ሶሱዋ ጉንን ጪሞይ ጪሙዋ ፄጌስ፤ ነ ቤታይነ ነ ዙለይ ታ ቦላራ አስ።

⁸ ጎዳይ ባ ሲቁዋ ጋላስ ታዉ ኪቴስ፤ ቃማ ጋላታ የይ ታራ ደኤስ፤ ታ ደኦ ፆሳ ዎሳና።

⁹ ፆሳ፥ ታ ዛላኮ፥ “ታና አይስ ዶጋዲ? ታ ሞርከት ታና ኡንኤን፥ ዬካሸ አይስ ሄመቶ” ያጋና።

¹⁰ ታ ሞርከት፥ “ነ ፆሳይ አዉን ደኢ?” ያግድ ጫይያ ዎደ ታ መቀይ መቄስ።

¹¹ ታ ሸምፐ አይስ አዛናይ? አይስ ኡንኤታይ? ፆሳን ኡፋይስ ዎ፤ ታና አሽያ፥ ታ ፆሳ ታ ቡሮ ጋላታና።