Mazmure 40 - ጌሻ ማፃፋ

ማደ ደማናዉ ዎስያ ዎሳ

ዛማረታ ሀላቃስ ዳዊቲ ፃፍዳ ማዝሙረ

¹ ታኒ ጎዳ ዳንዳአን ናጋስ፤ እ ታኮ ስሚድ ታ ዋሱዋ ስእስ።

² ዮ ኦላፈ፥ ስልሞ ኡርቃፈ ታና ከስስ፤ ታ ቶሁዋ ዛላ ቦላ ኤስስ፤ ታ ሄመ ምንስ።

³ ታ ዶናን ኦራ የ ዎስ፤ ሄስካ ኑ ፆሳይ ጋላተቶ ያገይሳ፤ ዳሮት በእድ ያያና፤ ጎዳን አማነታና።

⁴ ጎዳን አማነትያ፥ ኦቶራንቾታ ፄሎናይ፥ ዎርዶታራ ሄመቶናይ፥ አንጀትዳ አስ።

⁵ ጎዳዉ፥ ታ ፆሳዉ፥ ኔኒ ዳሮ ማላልስያባ ኦዳሳ፤ ኔራ ልከተይ ኦንካ ባዋ! ኔኒ ኑስ ቆፕዳ ሎኦ ቆፋ፥ ኦንካ ታይባናዉ ዳንዳኦና፤ ሄስ ታኒ ኦድን ዉርያባ ግደና።

⁶ ኔኒ ያርሾነ እሞ ኮያባካ፤ ሽን ነና ስአና መላ ታ ሀይ ዶያዳሳ፤ ፁሳ ያርሾነ ናጋራ ያርሾ ኮያባካ።

⁷ ሄሳ ግሾ ታኒ፥ “ፃ ማፃፋን ታባይ ፃፈትዳይሳዳ ታኒ ያስ።

⁸ ታ ፆሳዉ፥ ታኒ ነ ሸንያ ኦናዉ ዶሳይስ፤ ነ ህገይ ታ ዎዛናን ደኤስ” ያጋስ።

⁹ ግታ ሺቆን፥ ነ ፅሎተ ኦዳና፤ ጎዳዉ ኔኒ ኤረይሳዳ፥ ታኒ ማርካተይሳ አግከ።

¹⁰ ታ ነ ፅሎተ ታ ዎዛናን ቆሳብከ፤ ነ አማነተነ ነ አሹዋ ኦዳስ። ነ ሲቁዋነ ነ ቱማተ፥ ግታ ሺቁዋን ገንብከ።

¹¹ ጎዳዉ፥ ነ ማሮተ ታፐ ሃሶፋ፤ ነ ሲቆይነ ነ ቱማተይ፥ ታና ኡባ ዎደ ናጎ።

¹² ታይቦይ ባይና ኢታባይ ታና ተቅስ፤ ታ ባላይ ታና ጎዝስ፤ ታ ፄላናዉ ዳንዳእከ ታ ናጋራይ ታ ሁጰ ብናናፐ ዳርስ፤ ታ ዎዛናይ ታ ግዶን ትልእስ።

¹³ ጎዳዉ፥ ታና አሻናዉ ኤሮ ጋ፤ ታ ጎዳዉ፥ ታና ማዳናዉ ኤለሳ።

¹⁴ ታና ዎናዉ ኮየይሳት ዬላቶ፥ ካዉዮ፤ ታ ቆሄተ አሞተይሳት ካዉይድ ጉየ ስሞ።

¹⁵ ታኮ፥ “እያዉ ሀሹ፥ ሀሹ” ገይሳት ፆነትድ ዬላቶ።

¹⁶ ሽን ነና ኮይያ ኡባይ፥ ነናን ኡፋይቶ፤ ሀሹ ጎ። ነ አቶተ ዶስያ ኡባይ፥ “ጎዳይ ግታ” ያጎ።

¹⁷ ታኒ ማንቆነ መቶታንቾ፤ ሽን ጎዳይ ታባ ቆፖ! ታና ማደይ አሸይ ነና፤ ታ ፆሳዉ፥ ጋምኦፋ።