Mazmure 34 - ጌሻ ማፃፋ

ፆሳይ ኬሀ ግደይሳ በእተ

ዳዊቲ ጎሹ ዳንድ ሺቅዳ ግሾ፥ አብመለከ ስንፈ ጎደትድ ከይዳ ዎደ የፅዳ ማዝሙረ

¹ ታኒ ኡባ ዎደ ጎዳ ጋላታና፤ እያ ጋላታይ ታ ዶናፐ ፓጨና።

² ታኒ ጎዳን ጬቀታይስ፤ አዳት ሄሳ ስእድ ኡፋይቶ።

³ ታራ ጎዳ ቦንችተ፤ እያ ሱን እስፈ ቁ ቁ ኦስ።

⁴ ታኒ ጎዳ ኮይን፥ እ ታዉ ዛርስ፤ ታ ያይያባ ኡባፈ ታና አሽስ።

⁵ እያኮ ፄልያ ኡባይ ፖኦሶና፤ ኤንታ ሶምኦይ ዬላተና።

⁶ ሀ ማንቆይ ዋስስ፤ ጎዳይ እያ ዋሱዋ ስእስ፤ እያ መቶ ኡባፈ እያ አሽስ።

⁷ ጎዳ ኪታንቾይ እያዉ ያየይሳታ ናጌስ፤ ኤንታ ዩሾን ግድድ ኤንታ አሼስ።

⁸ ጎዳይ ኬሀ ግደይሳ ላጭድ በእተ፤ እያኮ ባቃትያ አስ አንጀትዳይሳ።

⁹ ህንተኖ፥ ጌሻ አሳዉ፥ ጎዳስ ያይተ፤ እያዉ ያየይሳታስ አይኮይካ ፓጨና።

¹⁰ ጋሞት ምያባ ይድ ኮሻቶሶና፤ ሽን ጎዳ ኮየይሳታስ ሎኦባይ ፓጨና።

¹¹ ናይቶ፥ ሃ ዪተ፤ ስእተ፤ ታ ህንተና ጎዳ ያሽ ታማርሳና።

¹² ሎኦ ደኦ ዳናዉነ ኬሀባ በአናዉ አዱሳ ላይ ዳናዉ፥ አሞተይ ኦኔ?

¹³ ነ እንፃርሳይ ኢታባ ኦደቶናዳ፥ ነ ዶናይ ጭሞናዳ ተቃ።

¹⁴ ኢታፐ ሃካ፤ ሎኦባ ኦ፤ ሳሮተ ኮያ፤ ካላ።

¹⁵ ጎዳ አይፈይ ፅሎታ ፄሌስ፤ እያ ሀይይ ኤንታ ዋሱዋ ስኤስ።

¹⁶ ኤንታ ቆፍስያባ ቢታፈ ይሳናዉ፥ ጎዳይ ኢታ ኦይሳታ ባ ሀንቆ አይፈን ፄሌስ።

¹⁷ ፅሎት ዋሶሶና፤ ጎዳይ ኤንታ ዋሱዋ ስኤስ፤ እ ኤንታ መቶ ኡባፈ አሼስ።

¹⁸ ዎዛን መቅዳይሳታስ ጎዳይ ማታና፤ እ ኡፋይስ ቃንፅዳይሳታ አሼስ።

¹⁹ ፅሎ አሳስ መቶይ ዳሮ፤ ሽን ጎዳይ እያ ሄ ኡባፈ አሼስ።

²⁰ ጎዳይ እያ መቀታ ናግያ ግሾ፥ ኤንታፈ እሶይካ መቀና።

²¹ ኢታታ ኤንታ ኢታተይ ዎና፤ ፅሎታ እፀይሳት ፕርደታና።

²² ጎዳይ ባ አይለታ ዎዜስ፤ እያኮ ባቃትያ ኦንካ ፕርደተና።