Mazmure 27 - ጌሻ ማፃፋ

ፆሳራ ደእያ አሳ ፃላተ

ዳዊታ ማዝሙረ

¹ ጎዳይ ታዉ ፖኦነ ታና አሸይሳ፤ ያትን፥ ታ ኦና ያያኔ? ጎዳይ፥ ታ ደኦይ ናገትያ ሚፃ፤ ያትን፥ ታ አይስ ዳጋማኔ?

² ኢታ አሳት፥ ታና እፀይሳትነ ታ ሞርከት ታና ዎናዉ ሆርዶፍያ ዎደ፥ ባንታዉ በትድ ኩንዳና።

³ ሞርከ ቶር ታና ተቅኮ ታ ዎዛናይ ያየና። ኦል ታ ቦላ ደንድያኮካ፥ ታኒ ጎዳን አማነታይስ።

⁴ ታ ጎዳ እስባ ኦይቻስ፤ ሄስካ፥ ታ ደኦ ላይ ኡባን ጎዳ ኬን ደአናሳ፤ ጎዳ ሎኦተ በአናሳነ እያ ኬን እያ ኮያናሳ።

⁵ መቶ ጋላስ ታና ባ ደእያ በሳን ገንና፤ ባ ዱንካንያን ታና ቆሳና፤ ታና ቃ ዛላ ቦላ ኤሳና።

⁶ ሄ ዎደ ታኒ ታና ተቅዳ ታ ሞርከታፐ አዳ፥ ቁ ቁ ጋና። ታኒ እያ ዱንካንያን ኡፋይታሸ ያርሾ ያርሻና፤ ጎዳ ማዝሙረን ጋላታና።

⁷ አቤት ጎዳዉ፥ ታ ነና ፄግያ ዎደ ነ ታዉ ኮያ፤ ታዉ ቃታ፤ ታና ስአ።

⁸ ኔኒ፥ “ታ ሶምኡዋ ኮይተ” ጋዳሳ፥ ታ ዎዛናይ አቤት ጎዳዉ፥ “ታ ነ ሶምኡዋ ኮያና” ያግስ።

⁹ ነ ሶምኡዋ ታፐ ገንፋ፤ ታና ማደይሶ፤ ነ ሸነታዳ ታና ነ አይልያ ጉየ ዛሮፓ። አቤት ታና አሽያ ፆሳዉ፥ ታና የጎፋ፤ አጎፋ።

¹⁰ ታ አዋይነ ታ አይያ ታና አግኮካ ጎዳይ ታና ሺሽድ ኤካና።

¹¹ አቤት ጎዳዉ፥ ታና ነ ኦግያ ታማርሳ፤ ታ ሞርከታ ግሾ ታና ሱረ ኦገ ካለ።

¹² ታና ማንድያ ዎርዶ ማርካት ታ ቦላ ዎልቃን ደንድዳ ግሾ፥ ታና ታ ሞርከታ አሙዋስ አዳ እሞፋ።

¹³ ታኒ ደኦን ደአሸ፥ ጎዳ ኬሀተ በአናይሳ አማናይስ።

¹⁴ ጎዳን ኡፋይስ ኦ፤ ምና፥ ያዮፋ፤ ጎዳን ኡፋይስ ኦ።