Mazmure 25 - ጌሻ ማፃፋ

ኡንአ ዎደ ዎሳ

ዳዊታ ማዝሙረ

¹ አቤት ጎዳዉ፥ ሸምፖፈ ታ ነና ዎሳይስ።

² አቤት ታ ፆሳዉ፥ ታ ነናን አማነታይስ፤ ታና ዬላዮፓ፤ ታ ሞርከታስ ታና አዳ እሞፋ።

³ ነናን ኡፋይስ ኦይሳት ዬላቶኮና፤ ሽን ጋሶይ ባይና ገነይሳት ዬላታና።

⁴ አቤት ጎዳዉ፥ ታና ነ ኦግያ በሳ፤ ነ ጌዶ ታና ካለ።

⁵ ታና አሽያ ፆሳይ ነና ግድያ ግሾ፥ ነ ቱማተ ታና ካለነ ታማርሳ፤ ጋላስ ኩመ ታ ነናን ኡፋይስ ኦይስ።

⁶ አቤት ጎዳዉ፥ በንፐ ደእያ ነ ቃያነ ነ ኬሀተ ሀሳያ።

⁷ ታ ናአተ ናጋራነ ኢታባ ሀሳዮፓ፤ አቤት ጎዳዉ፥ ነ ኬሀተነ ሎኦተ ሀሳያ።

⁸ ጎዳይ ኬሀነ ሱረ ግድያ ግሾ፤ ናጋራንቾታ ባ ኦግያ ታማርሴስ።

⁹ አሽከታ ሱረተን ካለስ፤ ኤንታና ባ ኦግያ ታማርሴስ።

¹⁰ ጎዳ ጫቁዋነ እያ ኪታ ናገይሳታስ እያ ኦገ ኡባይ ቱማነ ኬሀ።

¹¹ አቤት ጎዳዉ፥ ታ ናጋራይ ዳሮ፤ ግዶሽን ነ ሱን ግሾ ታው አቶ ጋ።

¹² ጎዳ ያይያ አስ ኦኔ? እ ካላናዉ በሲያ ኦግያ ጎዳይ እያ ታማርሳና።

¹³ እ ኡባ ዎደ ዱረተን ዳና፤ እያ ናይት ቢታ ላታና።

¹⁴ ጎዳይ ያየይሳታስ ባ ፁራ ገንና፤ እ ኤንታዉ ባ ጫቁዋ ኤርሴስ።

¹⁵ ጎዳይ ታ ቶሁዋ ፅሄፐ ናግያ ግሾ፥ ታ አይፈይ ማዶ ኤካናዉ ኡባ ዎደ እያኮ ፄሌስ።

¹⁶ ጎዳዉ፥ ታኒ ብዛነ መቶትዳ አስ ግድያ ግሾ፥ ታኮ ስማ፤ ነ ማሮተ ታና በሳ።

¹⁷ ታዉ ህርግ ዳርስ፤ ታ መቱዋፐ ታና ነ አሻ።

¹⁸ ታ መቱዋነ ታ ዋይያ በአ፤ ታ ናጋራ ኡባ አቶ ጋ።

¹⁹ ታ ሞርከት አይ መላ ዳርዳኮ በአ፤ ኤንቲ ታና አይ መላ እፅያኮ ፄላ።

²⁰ ነ ታና ናጋ፤ ነ ታና አሻ፤ ታ ኔኮ ባቃትያ ግሾ ታና ዬላዮፓ።

²¹ ታ ነናን ኡፋይስ ኦዳ ግሾ፥ ሱረተነ ቱማተ ታና ናጎ።

²² አቤት ፆሳዉ፥ እስራኤለ አሳ ኤንታ መቶ ኡባፈ ነ ዎዛ።