Mazmure 22 - ጌሻ ማፃፋ

ፅሎ አሳ መቶነ ኡፋይስ

“ጉራ ገንኤ” ጌተትያ ዲ ጩን የፀትዳ ማዝሙረ

¹ ታ ፆሳዉ፥ ታ ፆሳዉ፥ ታና አይስ አጋዲ? ታና ማዳ ጋዳ ታ ነና ዎስያ ዎደ፥ አይስ ታፐ ሃካይ?

² ታ ፆሳዉ፥ ጋላስ ኩመ ታ ኔኮ ዋሳስ፤ ሽን ነ ታና አላካ። ቃማ ኡባን ኔኮ ዋሳይስ፥ ሽን ዎፓተ ደምከ።

³ ግዶሽን ኔኒ ጌሽ፤ እስራኤለ ጋላታይ ነ አራታ ዩሾን ደኤስ።

⁴ ኑ አዋት ነናን አማነትዶሶና፤ ነናን አማነትን፥ ነ ኤንታ አሻዳሳ።

⁵ ኔኮ ዋስድ አትዶሶና፤ ነናን አማነትድ ዬላትቦኮና።

⁶ ሽን ታ አሰ ግድከ፤ ጉፁነ፤ ታ አሳን ካትዳይሳነ ቦረትዳይሳ።

⁷ ታና በእያ ኡባይ ቀልቅሶሶና፤ ባንታ ሁጵያ ቃሸ ደሬቆሶና።

⁸ “እ ጎዳን አማነትስ፤ አነ እያ አሾ፤ ጎዳይ እያ ዶስኮ፥ አነ እያ አሾ” ያጎሶና።

⁹ ግዶሽን ታኒ ታ አየ ኡሎፐ ሱረ የለታናዳ ኦዳይ ነና። ታ አየ ን ምያ ዎደካ ታና ናግዳይ ነና።

¹⁰ ታ የለቶሶፐ ዶማዳ ነናን ድጫስ፤ ታ አየ ኡሎፐ ዶምን ነ ታ ፆሳ።

¹¹ መቶይ ታኮ ማትያ ግሾነ ታና ማድያ አስ ባይና ግሾ፥ ሀእ ኔኒ ታፐ ሃኮፋ።

¹² ዳሮ ሞርከት ቃይጭያ ቦራዳ ታና ተቅዶሶና፤ ቃይጭያ ባሳነ ኮርማታዳ ታና ኦይክዶሶና።

¹³ መንረድ ጉድያ ጋሞዳ ባንታ ዶና ታ ቦላ ዶዮሶና።

¹⁴ ታኒ ሃዳ ጎጋስ፤ ታ መቀይ ባ ከሱዋፐ ከይስ፤ ታ ዎዛናይ ኦይሳዳ ታ ጋን ትልእስ።

¹⁵ ታ ቆይ ኩንአዳ መልስ፤ ታ እንፃርሳይ ኮቶኑዋራ ኦይከትስ፤ ነ ታና ሀይቅዳ አሳዳ ባናን የጋዳሳ።

¹⁶ ካናት ታና ተቅዶሶና፤ ኢታ አሳት ታ ዩሹዋ ኦይክዶሶና፤ ታ ኩሸታነ ታ ቶሆታ ጫዶሶና።

¹⁷ ታ መቀት ታይበቶሶና፤ ታ ሞርከት ታና ደሬቆሶና።

¹⁸ ታ ማኡዋ ሻክድ ኤኮሶና፤ ታ አዱሳ ማኡዋ ቦላ ሳማ የጎሶና።

¹⁹ ታ ጎዳዉ፥ ነ ታ ማታይ ታፐ ሃኮፋ፤ ታ ዎልቃዉ፥ ታና ማዳናዉ ኤለሳዳ ሃያ።

²⁰ ታና ማሻፈ ከሳ ኤካ፤ ታ አልኦ ደኡዋ ካናታፐ አሻ።

²¹ ጋሞታ ዶናፐ ታና አሻ፤ ቃይጭያ ባዞ ቦራታ ካጨፐ ታና ናጋ።

²² ታኒ ነ ሱን ታ እሻታስ ኦዳና፤ ኤንታ ሺቁዋን ነና ጋላታና።

²³ ህንተኖ፥ ጎዳ ያየሳቶ፥ እያ ጋላትተ፤ ህንተኖ፥ ያይቆባ ዛረቶ፥ እያ ቦንችተ። ህንተኖ፥ እስራኤለ ኮቻቶ፥ ያሻን እያ ቁ ቁ ኦተ።

²⁴ እ ኡንኤትዳይሳ ካና፤ ኤንታ ቆሁዋ በእሸ ቀል ጌና። ባ ሶምኡዋ ኤንታፈ ገንና፤ ኤንቲ እያኮ ዋስያ ዎደ፥ ኤንታዉ ዞኮ ዛርቤና።

²⁵ ታ ነ ሎኦ ኦሱዋ ግሾ ግታ ሺቆን ጋላታና፤ ታ ቃንገ ነዉ ያይያ አሳ ስንን ጋና።

²⁶ ማንቆት ምድ ካላና፤ ጎዳ ኮየይሳት እያ ጋላታና፤ ኤንቲ መርናዉ ኡፋይሳን ዳና።

²⁷ ሳአ ጋፃ ጋካናዉ ደእያ አሳ ኡባይ፥ አኬካን ጎዳኮ ስማና፤ አሳ ዛረ ኡባይ እያ ጎይናና።

²⁸ ማት ኡባይ ጎዳሳ፤ እ ካዎተታ ሃሬስ።

²⁹ ሳአን ደእያ ዱረ ኡባይ እያ ጎይናና፤ ባንታና ሀይቆፐ አሻናዉ ዳንዳኦናይሳትነ ቢታን ስምያ ኡባይ እያዉ ጉልባታና።

³⁰ ያና የለታይ እያዉ ኪተታና፤ ስን የለታስ ጎዳባ ኦዳና።

³¹ ቡሮ የለትቦና አሳስካ፥ እያ ጌሻተ ኦዳና።