Mazmure 2 - ጌሻ ማፃፋ

ጎዳን ትየትዳይሳ አይሱዋ

¹ ካዎተት አይስ ደንዶና? አሳይ አይስ ጮ ማቀቶና?

² ካዎት ጎዳ ቦላነ እ ትይዳይሳ ቦላ ደንድዶሶና፤ ደርያ ሃረይሳት ኤንታ ቦላ ሺቅዶሶና።

³ “ኤንታ ሳንላታ ዱስ፤ ኤንታ ቃሾ ዎዶሩዋ ሆሎስ” ያግዶሶና።

⁴ ሳሎን ኡትዳይስ ኤንታ ቦላ ሚጬስ፤ ጎዳይ ኤንታ ቀልቅሴስ።

⁵ እ ባ ሀንቁዋን ኤንታ ዳጋንስ፤ ባ ይሉዋን ኤንታ ያሽሴስ።

⁶ “ታ ጌሻ ዙማ ፅዮነ ቦላ ታ ካዋ ካዎስ” ያጌስ ጎዳይ።

⁷ ታኒ ጎዳ ህግያ አዋጃና፤ ጎዳይ ታና፥ “ኔኒ ታ ናኣ፤ ታኒ ሀች ነዉ አዋ ግዳስ።

⁸ ነ ታና ኦይቻ፤ ታ ነዉ ካዎተታ እማና፤ ሳአ ኡባይ ነባ ግዳና።

⁹ ኔኒ ብራታ ፃምአን ኤንታ መንና፤ መቃ ሚሸዳ ኤንታ ትንቸረና” ያግስ።

¹⁰ ህዛ፥ ካዎቶ ኤዮፕተ፤ ሀ ሳኣ ሃረይሳቶ አኬክተ።

¹¹ ጎዳ ያሻን ጎይንተ፤ ኮኮርድ ኪተትተ።

¹² ጎዳይ ሀንቀትን ኦገን ህንተ ዮናዳ እያ ቱማተን ጎይንተ። እያ ሀንቆይ ኤሶን ኤፅ ከያና፤ እያን ቆሰትድ አትዳ ኡባይ አንጀትዳይሳታ።