Mazmure 19 - ጌሻ ማፃፋ

ፆሳ ህገን ቦረይ ባዋ

ዛማረታ ሀላቃስ ፃፈትዳ ዳዊታ ማዝሙረ

¹ ሳሎት ፆሳ ቦንቹዋ ሃሳዮሶና፤ ሳሎ ጉፋንይ እያ ኩሸ ኦሱዋ አዋጄስ።

² እስ ጋላስ ሀራ ጋላሳስ ሄሳ ኦዴስ፤ እስ ቃም ሀራ ቃማስ ኤራተ ቆንጭሴስ።

³ ኦድ ዎይኮ ቃል ባዋ፤ ኤንታ ግርሳይ ስኤተና።

⁴ ግዶሽን ኤንታ ኦዳይ ሳአ ኡባን ላለትስ፤ ኤንታ ቃላይ ቢታ ጋፃ ጋክስ። አው ደእያ በሲ ፆሳይ ሳሎን ጊግስስ።

⁵ ባ ሶፐ ከይያ ምሽራዳ፥ ጋደ ዎፃናዉ ኡፋይትድ ጊግዳ አሳዳ፥ አዋይ ዎንታ ዎንታ ከዬስ።

⁶ እስ ባጋ ሳሎ ጋፃፐ ከይድ፥ ሀራ ባጋ ሳሎ ጋፃ ጋካናዉ ቤስ፤ እያ ሱላፐ ጌምያባይ ባዋ።

⁷ ጎዳ ህገይ ሱረ፤ ሸምፖ ዛሬስ። ጎዳ ኪታይ አማነትዳይሳ፤ አኬክ ፓጭዳይሳታ ጭንጫ ኦስ።

⁸ ጎዳ ዎጋይ ልከ፤ ዎዛና ኡፋይሴስ። ጎዳ ኪታይ ጌሽ፤ አይፈ ፖእሴስ።

⁹ ጎዳስ ያሽ ጌሽ፤ መርናዉ ኤቅድ ደኤስ። ጎዳ ፕርዳይ ኩመ ቱማነ ፅሎ።

¹⁰ ዎርቃፈ አድ ኮየቴስ፤ ዋላህ ባይና ዎርቃፈ አድ ሎኦ። ኤሳፈ አድ ሎኦ እልሎ ኤሳፈ አድ ማልኦ።

¹¹ ነ አይለይ ናገታና መላ ዞሬስ፤ ነ ህግያ ናጎይ ዳሮ ጎኤስ።

¹² ባ ቆሁዋ ደመይ ኦኔ? አቤት ጎዳዉ፥ ጌምዳ ናጋራፐ ታና ጌሻ።

¹³ ታና ነ አይልያ፥ ኤርሸ ኦያ ናጋራፐ ናጋ። ናጋር ታና ሃሮና መላ ማዳ፤ ሄ ዎደ ታኒ ሱረ ግዳና፥ ግታ ባላፐ ጌያና።

¹⁴ አቤት ጎዳዉ፥ ታ ዛላዉ፥ ታና ዎዘይሶ፤ ታ ዶናፐ ከይያ ቃላይነ ታ ዎዛና ቆፋይ ነና ኡፋይስያባ ግዶ።