Mazmure 18 - ጌሻ ማፃፋ

ፆኖ ማዝሙረ

ጎዳይ እያ ሞርከታፐነ ሳኦላ ኩሸፐ አሽዳ ዎደ ዳዊታ ጎዳስ የፅዳ ማዝሙረ

¹ አቤት ጎዳዉ፥ ታ ዎልቃዉ፥ ታኒ ነና ዶሳይስ።

² ጎዳይ ታ ዛላ፤ ታ ሚፃ፤ ታና አሸይሳ፤ ታ ፆሳይ ታ እያኮ ባቃትያ ታ ዛላ። እ ታዉ ጎንዳለ፤ ታና አሽያ ዎልቃ፤ ታኒ ቆሰታዳ አትያ በሰ።

³ ጋላታ በሲያ ጎዳ ታ ፄጋይስ፤ ታ ሞርከታፐ ታኒ አታና።

⁴ ሀይቆ ዎዶሮይ ታና ጩልስ፤ ዮ ድኦይ ታና ዳጋንስ።

⁵ ዱፎ ዎዶሮይ ታ ቦላ ፃፀትስ፤ ሀይቆ ፅሄይ ታና ኦይክስ።

⁶ ታ ኡንአን ጎዳ ፄጋስ፤ ታና ማዳና መላ ታ ፆሳኮ ዋሳስ። ባ ኬን ግድድ ታ ግርሳ ስእስ፤ ታ ዋሶይ እያ ሀይን ዎስ።

⁷ ፆሳይ ሀንቀትዳ ግሾ፥ ቢታይ ቃፅስ፤ ደረታ ፃጶይ ኮኮርስ።

⁸ እያ ሲያፐ ሀንቆ ጩያይ ከይስ፤ እያ ዶናፐ ምያ ታማ ላጮይ ከይስ፤ እ ፁግያ ቦንቆ ጩትስ።

⁹ ሳሉዋ ጳልቅድ ዎስ፤ እያ ቶሁዋፐ ጋርሳን ማ ሻር ደኤስ።

¹⁰ ክሩበታ ቦላ ኡትድ ፓልስ፤ ጫርኮ ቀፈን ፑደ ደንድስ።

¹¹ ባና ማን ካምስ፤ እያ ዱንካነይ እራን ኩምዳ ሻራ።

¹² እያ ስንን ደእያ ግታ ፖኡዋፐ ሻችነ ታማ ላጮይ ከይድ ማ ሻራ ካንድ ብስ።

¹³ ጎዳይ ዳዳዳ ሳሎፐ ጉምስ፤ ኡባፈ ቃ ፆሳይ ባ ግርሳ ስስስ፤ ዎልአንንነ ታማ ላጮን ቆንጭስ።

¹⁴ ባ ዶንግያ ዱክድ ባ ሞርከታ ላልስ፤ ዎልአን ፖኦ ኪትድ ኤንታ የደስ።

¹⁵ አቤት ጎዳዉ፥ ኔኒ ሴርዳ ዎደ፥ ሸነታዳ ፔኑቅዳ ዎደ፥ አባይ ዝንእዳ ቢታይ በንትስ፤ ሳአ ባሶይ ቆንጭስ።

¹⁶ ጎዳይ ቦላፈ ኩሽያ የድድ ታና ኦይክስ፤ ጪሞ ሃፈ ታና ዳፍድ ከስስ።

¹⁷ ታ ቦላ ዳሮ ዎልቃምዳ ታ ሞርከታፐነ ታና እፀይሳታፐ አሽስ።

¹⁸ ታ መቶትዳ ዎደ ኤንቲ ታ ቦላ ደንድዶሶና፤ ሽን ጎዳይ ታና ካትስስ።

¹⁹ እ ታና ዳልጋ በሲ ከስስ፤ ታናን ኡፋይትዳ ግሾ ታና አሽስ።

²⁰ ታ ፅሎተዳ ጎዳይ ታዉ ቃንፅስ፤ ታ ኩሸ ጌሻተዳ እ ታዉ ዛርስ።

²¹ ታኒ ጎዳ ኦግያ ካላስ፤ ታ ፆሳ አጋዳ ካረ ከያብከ።

²² ታኒ እያ ህግያ ኡባ ናጋስ፤ እያ ኪታ ፖሎ አጋብከ።

²³ ታኒ እያ ስንን ሱረ ደአስ፤ ታና ናጋራፐ ናጋስ።

²⁴ ጎዳይ ታ ፅሎተዳነ ታ ኩሸ ጌሻተዳ ታዉ ዛርስ።

²⁵ አማነተይሳታስ ነ አማነታሳ፤ ሱረታስ ነ ሱረ።

²⁶ ጌሻታስ ነ ጌሽ፤ ሽን ጌላታስ ነ ጌላ።

²⁷ አሽከታ አሻሳ፤ ሽን ኦቶራንቾታ ካዉሻሳ።

²⁸ አቤት ጎዳዉ፥ ነ ታዉ ፆምፓሳ፤ ታ ፆሳይ ታ ማ ፖእሳሳ።

²⁹ ነ ማዱዋን ታ ሞርከ ቶራ ቦላ ደንዳይስ፤ ታ ፆሳን ሚፃ ፄራራ ጉፓዳ አይስ።

³⁰ ፆሳ ኦገይ ፖሎ፤ ጎዳ ቃላይ ጌሽ፤ እያኮ ባቃትያ ኡባስ እ ጎንዳለ።

³¹ ጎዳፐ አትሽን፥ ሀራ ፆሲ ኦኔ? ኑ ፆሳፈ አትሽን፥ ሀራ ዛል ኦኔ?

³² ታዉ ዎልቃ እመይነ ታ ኦግያ ሳሮ ኦይ ፆሳ።

³³ እ ታ ቶሁዋ ገንኤ ቶሆዳ ምንስ፤ ቃ በሳን ህርግ ባይና ኤሴስ።

³⁴ ታ ኩሽያ ኦላ ታማርሴስ፤ ናሰ ብራታ ዶንግያ ዱካና መላ ታ ቀስያ ምንስ።

³⁵ ታና አሽያ ነ ጎንዳልያ ታዉ እማዳሳ፤ ነ ኡሻቻ ኩሸይ ታና ዘምፕሴስ፤ ነ ሎኦ ኦይከይ ታና ግታዬስ።

³⁶ ታ ሄመትያ በሳ ዳልግሳዳሳ፤ ታ ቶሁዋ ሀርቹች ኤክቤና።

³⁷ ታ ሞርከታ የደዳ ኦይካስ፤ ኤንታ ይሶና ጉየ ስምከ።

³⁸ ኤንቲ ዛር ደንዶናዳ ሾጫስ፤ ኤንቲ ታ ቶሁዋ ጋርሳን ኩንድዶሶና።

³⁹ ኦላስ ታና ዳንጭሳዳሳ፤ ታራ ጋደተይሳታ ታዉ ጉልባትሳዳሳ።

⁴⁰ ታ ሞርከታ ታ ስንፈ ጉየ ዛራዳሳ፤ ታና እፀይሳታ ይሳስ።

⁴¹ ማደ ኮይድ ዋስዶሶና፥ ሽን ኦንካ ኤንታ አሽቤና። ጎዳ ኤንቲ ፄግዶሶና፥ ሽን እ ኤንታዉ ኮይቤና።

⁴² ጫርኮይ ፕትድ ኤፍያ ባናዳ ኤንታ ሊቅሳስ፤ ኦገ ኡርቃዳ ኤንታ የስ።

⁴³ ገነ አሳፐ ታና አሻዳሳ፤ ታና ካዎተታ ቦላ ሹማዳሳ፤ ታ ኤሮና አሳይ ታዉ ሃረትዶሶና።

⁴⁴ ኤንቲ ታባ ስእድ ታዉ ኪተቶሶና፤ አላጋ ደረይ ታ ስንን ዝጌስ።

⁴⁵ ኤንቲ ካሀ ይዶሶና፤ ባንታ ሚፃፐ ኮኮርሸ ዮሶና።

⁴⁶ ጎዳይ ደኤስ! ፆሳይ፥ ታ ዛላይ ጋላተቶ! ታና አሽያ ፆሳይ ቁ ቁ ጎ!

⁴⁷ እ ታዉ ሀሎ ከስያ ፆሳ፤ ካዎተታ ታ ጋርሳን ሃርሰይሳ።

⁴⁸ ታ ሞርከታፐ ታና አሸይሳ፤ ታና እፀይሳታ ቦላ ቁ ቁ ኦሳ፤ ኢታታፐ ታና አሻሳ።

⁴⁹ ሄሳ ግሾ፥ ጎዳዉ ካዎተታ ግዶን ታኒ ነና ጋላታና፤ ነ ሱን ሳባና።

⁵⁰ እ ባ ካዋስ ፆኖ እሜስ፤ ባ ትይዳይሳስ፥ ዳዊታስነ እያ ኮቻስ፥ ባ ኬሀተ በሴስ።