Mazmure 17 - ጌሻ ማፃፋ

ፅሎ አሳ ዎሳ

ዳዊታ ዎሳ

¹ አቤት ጎዳዉ፥ ታ ፅሎ ማጋኑዋ ስአ፤ ታኒ ኔኮ ዋስያ ዋሱዋ ሀይዛ። ጭሞን ግዶናሽን ቱማን፥ ዎስያ ዎሳ ዛራ።

² ነ ፅሎ ፕርዳይ ታዉ ቆንጮ፤ ነ አይፈይ ቱማ ፄሎ።

³ ኔኒ ቃማ ታና ፆሞሳዳሳ፤ ታ ዎዛና ፓጫዳሳ። ሽን ፓጫዳካ ታ ቦላ አይኮካ ደማባካ፤ ታ እንፃርሳይካ ባለትቤና።

⁴ ታኒ ሀራ አሳታዳ ኢታባ ሃሳይከ፤ ታኒ ነ ቃላ ናግያ ግሾ፥ ገነ ኦግያ ካላብከ።

⁵ ታ ቶሆይ በቶና መላ፥ ታ ታንጎይ ነ ኦግያፐ ጋፃ ከይቤና።

⁶ አቤት ፆሳዉ ታ ዎሳ ነ ስእያ ግሾ፥ ታኒ ነና ዎሳይስ። ነ ሀይ ታኮ ዛራዳ፥ ታ ቃላ ስአ።

⁷ ባንታ ሞርከታፐ ባቃተይሳታ፥ ነ ኡሻቻ ኩሸን ቆታዳ አሸይሶ፥ ነ ኬሀተ ማላልስያ ኦገን በሳ።

⁸ ነ አይፈ ናኤ መላ ታና ናጋ፤ ነ ቀፍያ ጋርሳን ታና ቆሳ።

⁹ ታና ኡንኤያ ኢታታፐ፤ ተቅድ ኦይክዳ ሞርከታፐ አሻ።

¹⁰ ኤንታዉ ቃይ ባዋ፤ ኦቶሮን ሃሳዮሶና።

¹¹ ታና ጎድድ ኦይክዶሶና፤ ተቅዶሶና፤ ታና ቢታን ሆልድ የጋናዉ ፄሎሶና።

¹² ኤንቲ ምያባ ኮይያ ጋሞ መላ፤ ቆሰትድ ናግያ ዎዳላ ጋሞ መላ።

¹³ ጎዳዉ፥ ደንዳ፤ ታ ሞርከታራ ኤቀታዳ ኤንታ ሳአን የጋ፤ ነ ማሻን ኢታታ ኩሸፐ ታና አሻ።

¹⁴ ጎዳዉ፥ ሀይሳ መላ አሳፐ ታና ቆሳ፤ ኤንታ ቃዳይ ሳአባ ግድዳ አሳፐ ነ ኩሸን ታና አሻ። ነ ምንጅዳ ሴራን ኤንታ ካልሳ፤ ሄ ሴራይ ኤንታ ናይታስ ግድድ፥ ኤንታ ናይታ ናይታስ ፓላሆ።

¹⁵ ሽን ታኒ ፅሎተን ነ ሶምኡዋ በአና፤ ታ ባርክያ ዎደ ነ ማላ በአዳ ኡፋይታና።