Mazmure 16 - ጌሻ ማፃፋ

ፆሳይ ታ ላታ

ዳዊታ ዎሳ

¹ አቤት ፆሳዉ፥ ታ ኔኮ ባቃትያ ግሾ ታና ናጋ።

² ታኒ ፆሳ፥ “ኔኒ ታ ጎዳ፤ ኔፐ አትሽን፥ ሀር ሎኦባይ ታዉ ባዋ” ያጋስ።

³ ሳአን ደእያ ጌሻት አይ መላ ቦንቸትዶና! ታ ኤንታራ እስፈ ኡፋይታይስ።

⁴ ሀራ ፆሳታ ካለይሳት ባንታ ቦላ መቶ ዳርሶሶና። ሽን ታኒ ሀራ ፆሳታስ ሱ ያርሽከ፤ ታኒ ኤንታ ሱን ፄግከ።

⁵ ታ ጎዳዉ ታ ላታይ ነና፤ ታዉ ኮሽያ ኡባ ታዉ እማሳ፤ ታ ደኡዋ ሳማይ ነና።

⁶ ታና ጋክዳ ሳማይ አይ መላ ሎኦ! ኤ ታ ላታይ ቱማ ሎኦ!

⁷ ታና ዞርዳ ጎዳ ጋላታይስ፤ ቃማ ታ ዎዛናይ ታና ታማርሴስ።

⁸ ታኒ ኡባ ዎደ ጎዳ ታ ስንን በአይስ፤ እ ታ ኡሻቻን ደእያ ግሾ ዳጋምከ።

⁹ ሄሳ ግሾ፥ ታ ዎዛናይ ኡፋይቴስ፤ ታ እንፃርሳይ ጋላቴስ፤ ታ አሳተይ ህርግ ባይና ደኤስ።

¹⁰ ታ ሸምፕዉ ስኦለን አጋካ፤ ነ ጌሻ ዎቃና መላ ኦካ።

¹¹ ታና ደኦ ኦግያ በሳሳ፤ ነ ስንን ኩመ ኡፋይስ ደኤስ፤ ነ ኡሻቻን መርና እንጀይ ደኤስ።