Mazmure 141 - ጌሻ ማፃፋ

ነ ሀይ ታኮ ዛራ

ዳዊታ ማዝሙረ

¹ ጎዳዉ፥ ታኒ ነና ፄጋይስ፤ ታና ማዳናዉ ኤለሳ፤ ታ ኔኮ ዋስያ ዎደ ታና ስአ!

² ታ ዎሳይ እፃነዳ ነ ስን ሺቆ፤ ታ ኩሸ ምጨይ ኦማርሳ ያርሾ መላ ግዶ።

³ ጎዳዉ፥ ታ ዶና ናግያ አስ ዎ፤ ታ መተርሻ ፐንግያ ናጋ።

⁴ ኢታ ኦያ አሳታራ ኢታ ኦና መላ፥ ታ ዎዛና ኢታኮ ዛሮፓ፤ ኤንታ ግብራ ታና ሙዞፓ።

⁵ ፅሎ አስ ታና ሴሮ፥ ሄስ ታዉ ኬሀተ፥ እ ታና ሀንቀቶ፥ ሄስ ታ ሁጰን ዛይተ ትዮ መላ። ታ ዎዛናይ ሄሳ እፀና፤ ታ ዎሳይ ኡባ ዎደ ኤንታ ኢታ ኦሱዋ ቦላና።

⁶ ኤንታ ዳይናት አፎ ሆለትያ ዎደ፥ ታ ቃላይ ቱማ ግደይሳ ኤንቲ ኤራና።

⁷ ኤንቲ፥ “አስ ቢታ ጎየይሳዳነ ጳሻ ላለይሳዳ፥ ኑ መቀይ ዱፎ ዶናን ላለታና” ያጎሶና።

⁸ ኡባ ሃርያ ጎዳዉ፥ ታ አይፈይ ነና ፄሌስ። ታኒ ኔኮ ባቃታይስ፤ ታና ሀይቆስ አዳ እሞፋ።

⁹ ኤንቲ ታዉ የግዳ ግትያፐነ ኢታ ኦይሳታ ፅህያፐ ታና ናጋ።

¹⁰ ታኒ ሳሮ አን፥ ኢታት ባንታ ዎዳ ግትያን ኦይከቶ።