Mazmure 135 - ጌሻ ማፃፋ

ፆሳ ሱንይ መርናዉ ኤረቴስ

¹ ጎዳ ጋላትተ! ህንተኖ፥ ጎዳ አይለቶ፥ ጎዳ ሱን ጋላትተ!

² ህንተኖ፥ ጎዳ ኬን፥ ኑ ፆሳ ኬ ዳባባን ኤቀይሳቶ፥ ጎዳ ጋላትተ!

³ እ ኬሀ ግድያ ግሾ ጎዳ ጋላትተ! እ ሎኦ ግድያ ግሾ እያ ሱን ሳቢተ!

⁴ ጎዳይ ያይቆባ ባባ፥ እስራኤለ ባዉ ቡዞ ኦድ ዶርስ።

⁵ ጎዳይ ግታ ግደይሳነ ኑ ጎዳይ፥ ፆሳታ ኡባፈ አይሳ ታኒ ኤራይስ።

⁶ ሳሎን ሳአን፥ አባንነ እያ ግዶን ጎዳይ ባ ዶስዳባ ኡባ ኦስ።

⁷ ሻራ ሳኣ ጋፃፐ ደንስ፤ ዎልአን እራራ ኪቴስ፤ ጫርኮ ባ ምንጃ ኬፈ ከሴስ።

⁸ ግብፀ ቢታን አሳፐ መሄ ጋካናዉ፥ ባይራ የለትዳ ኡባ ዎስ።

⁹ ነኖ ግብፀ፥ ፓሮናነ እያ አይለታ ኡባ ሴራናዉ ማላታታነ ማላልስያባታ ኪትስ።

¹⁰ እ ዳሮ ካዎተታ ይስስ፤ ዎልቃማ ካዎታ ዎስ።

¹¹ አሞረ ካዋ ስሆና ባሳነ ካዋ ኦገነ ካናነ ካዎታ ኡባ ዎስ።

¹² ኤንታ ቢታ ባ አሳ፥ እስራኤለ ላትስስ።

¹³ ጎዳዉ፥ ነ ሱንይ መርናዉ ዳና፤ የለታፐ የለታ ጋካናዉ ነ ሀሳየታና።

¹⁴ ጎዳይ ባ አሳስ ፕርዳና፤ እ ባ አይለታስ ቃታና።

¹⁵ ካዎተታ ኤቃት አሳ ኩሸ ኦሶታ፤ ብራፐነ ዎርቃፈ መትዳይሳታ።

¹⁶ ኤንታዉ ዶን ደኤስ፥ ሽን ሃሳዮኮና፤ አይፈይ ደኤስ፥ ሽን ፄሎኮና።

¹⁷ ሀይ ደኤስ፥ ሽን ስኦኮና፤ ኤንታ ሲን ሸምፖይ ባዋ።

¹⁸ ኤንታ መዳይሳትነ ኤንታን አማነተይሳት ኡባይ ኤንታዳ ሀኖ።

¹⁹ እስራኤለ አሳዉ ጎዳ ጋላትተ፤ አሮና ሶ አሳዉ ጎዳ ጋላትተ።

²⁰ ሌወ ሶ አሳዉ ጎዳ ጋላትተ፤ ጎዳ ያየይሳቶ ኡባይ ጎዳ ጋላትተ።

²¹ የሩሳላመን ደእያ ጎዳይ ፅዮነን ጋላተቶ! ጎዳ ጋላትተ!