Mazmure 105 - ጌሻ ማፃፋ

ፆሳ ግታ ኦሱዋ ኦድተ

¹ ጎዳ ጋላትተ፤ እያ ሱን ፄግተ፤ እ ኦዳባ ካዎተታስ ኦድተ።

² እያ ሳቢተ፤ ጋላታ ማዝሙረ የፅተ፤ ማላልስያ እያ ኦሶ ኡባ ኦድተ።

³ እያ ጌሻ ሱንን ጬቅተ፤ ጎዳ ኮየይሳታ ዎዛናይ ኡፋይቶ።

⁴ ጎዳነ እያ ዎልቃን አማነትተ፤ ኡባ ዎደ እያ ኮይተ።

^5-6 ህንተኖ፥ እያ አይልያ አብራሃመ ዛረቶ፥ ዶረትዳ ያይቆባ ናይቶ፥ እ ኦዳ ማላልስያባታ፥ እያ ማላታነ ሱረ ፕርዳ ሀሳይተ።

⁷ እ ጎዳ፥ ኑ ፆሳ፤ እያ ፕርዳይ ቢታ ኡባ ቦላና።

⁸ እ ባ ጫቁዋ መርናዉ፥ ባ ገልዳ ቃላ ሙኩሉ የለታ ጋካናዉ ናጌስ።

⁹ እ አብራሃመራ ጫቅዳ ኡፋይሳ ቃላ፥ ይሳቃስ ገልዳ ኡፋይሳ ቃላ፥

¹⁰ ያይቆባስ ዎጋ፥ እስራኤለስ መርና ጫቁዋ ኦድ ምንስ።

¹¹ እ፥ “ካናነ ቢታ ነዉ እማና፤ እ ነ ኮቻ ጋክዳ ላታ ግዳና” ያግስ።

¹² ፆሳ አሳት ታይቦን ጉነ ካናነ ቢታን በተ አስ ግድድ ደእያ ዎደ፥

¹³ እስ ደርያፐ ሀራ ደርያ፥ እስ ካዎተፈ ሀራ ካዎተ ዩይዶሶና።

¹⁴ ፆሳይ ኦንካ ኤንታ ኡንኤና መላ ኦቤና፤ ኤንታ ግሾ ካዎታ ሴርስ።

¹⁵ “ታ ትይዳይሳታ ቦቾፍተ፤ ታ ናበታ ቆሆፕተ” ያግስ።

¹⁶ ጎዳይ ቢታን ኮሻ የድድ፥ ኤንታ ካ ኡባ ይስስ።

¹⁷ ሽን እ ባ አሳ አሻናዉ፥ እስ አድያ ግብፀ ኪትስ፤ ሄ ኡራይ አይለ ግድድ ባይዘትዳ ዮሰፋ።

¹⁸ እያ ቶሆት ብራታን ዱፀትዶሶና፤ እ ሳንላታን ቃሸትስ።

¹⁹ እ ካሰ ኦድዳይስ ቱማታና ጋካናዉ፥ ጎዳ ቃላይ እያ ፓጭስ።

²⁰ ሄሳፈ ጉየ ግብፀ ካዎይ አሰ የድድ፥ እያ ቃሾ ኬፈ ከስስ።

²¹ እያ ባ ኬ ቦላ ጎዳ ኦስ፤ ባዉ ደእያ ኡባ ቦላ ሹምስ።

²² ባ ሞርናታ ዞራና መላ፥ ባ ጭማታ ጭንጫተ ታማርሳና መላ ሹምስ።

²³ እስራኤለይ ግብፀ ብስ፤ ያይቆብ ካማ ቢታን ኡትስ።

²⁴ ጎዳይ ባ አሳ ዳርስስ፤ ኤንታ ሞርከታፐ አድ ኤንታ ምንስ።

²⁵ ባ አሳ እፃና መላ ግብፀ አሳ ዎዛና ላምስ፤ ባ አይለታ ጭማና መላ ኦስ።

²⁶ ባ አይልያ ሙሰነ ባ ዶርዳ አሮና ኤንታኮ ኪትስ።

²⁷ ኤንቲ ግብፀ አሳ ስንን ማላታ፥ ካማ ቢታን ማላልስያባ ኦዶሶና።

²⁸ ጎዳይ ማ ኪትድ፥ ቢታ ምስስ፤ ሽን ግብፀ አሳይ እያ ኪታ ፖልቦኮና።

²⁹ ኤንታ ሃ ሱ ላምድ፥ ሞሎታ ዎስ።

³⁰ ኤንታ ቢታ ኡባ፥ ካዎ ጋካ ሾ ኩንስ።

³¹ እ ኪትን፥ ኡዱንፀነ ቢነ ኤንታ ቢታ ኡባ ቦላ ቢነይ ዎስ።

³² እራ ግሾ ኤንታ ቢታ ቦላ ሻች፥ ዳዳነ ዎልአን ቡክስስ።

³³ እ ኤንታ ዎይንያነ ባላስያ ሾጭስ፤ ኤንታ ቢታን ደእያ ም መንረስ።

³⁴ እ ኪትን፥ ቦለይነ ታይቦይ ባይና ዱጎይ ከይስ።

³⁵ ኤንታ ቢታን ዶልዳ ካ ኡባ ምስ፤ ጋደን ደእያ ጭልኦባ ኡባ ይስስ።

³⁶ ጎዳይ ግብፀ አሳ ባይራ ናይታ ኡባ ዎስ፤ ኮይሮ የለትዳ ኡባ ይስስ።

³⁷ ሄሳፈ ጉየ፥ እስራኤለ አሳ ዎርቃነ ብራ አሌቆራ ከስስ፤ ኤንታ ኮቻ ግዶፈ ጉየ አትዳይ ኦንካ ባዋ።

³⁸ ግብፀ አሳይ ኤንታዉ ያይዳ ግሾ፥ ኤንታ ከሳን ኡፋይትዶሶና።

³⁹ ጎዳይ ኤንታ ካማናዉ ሻራ ምጭስ፤ ቃማ ኤንታዉ ፖእሳናዉ ታማ ጊግስስ።

⁴⁰ ኤንቲ ምያባ ኦይችዳ ዎደ፥ ኩራቾ ዳንያ ካፎታ ኤንታዉ የድስ፤ ኤንታ ሳሎ ካ ካልስስ።

⁴¹ እ ሹቻ ጳልቅን፥ ሃ ፑልትስ፤ መላ ቢታን ሻፋዳ ጎግስ።

⁴² እ ባ አይልያ አብራሃመስ፥ ገልዳ ጌሻ ቃላ ሀሳይስ።

⁴³ እ ባ አሳ ኡፋይሳን፥ ባ ዶርዳይሳታ እልልሳን ከስስ።

⁴⁴ እ ኤንታዉ አላጋ ካዎተታ ቢታ እሚስ፤ ሀራት ዳቡርዳ ጎሻ ላትዶሶና።

⁴⁵ እ ሄሳ ኦዳይ ኤንቲ እያ ዎጋ እያ ህግያ ናጋናነ ኦና መላሳ። ጎዳ ጋላተቶ!