Marqoosa 9 - ጌሻ ማፃፋ

የሱሳ ማላይ ላመትስ

¹ የሱሲ ኤንታኮ፥ “ታኒ ህንተዉ ቱማ ኦዳይስ፤ ፆሳ ካዎተይ ዎልቃራ የይሳ በኦና ሀይቆና እስ እስ አሳት ሀይሳን ደኦሶና” ያግስ።

² የሱሲ ኡሱፑን ጋላሳፐ ጉየ፥ ባራ ጰፅሮሳ፥ ያይቆባነ ዮሃንሳ ኤክድ፥ ኤንታ ፃላላ ግታ ዙማ ቦላ ከስድ ኤንታ ስንን ላመትስ።

³ እያ ማኦይካ ጶልስ፤ ሳአን ማኦ ሜጭያ ኦንካ ጌሻናዉ ዳንዳኦናይሳ መላ ዳሮ ቦፅስ።

⁴ ሄ ሄ ታማረት፥ ኤልያስነ ሙሰይ የሱሳራ ኦደትሽን በእዶሶና።

⁵ ጰፅሮስ የሱሳ፥ “አስታማርያዉ፥ ኑኒ ሀይሳን ደኤይስ ኑስ ሎኦ፤ ኑ ሄ ሻቃራታ እሱዋ ነዉ፥ እሱዋ ሙሰስ፥ ቃስ እሱዋ ኤልያሳስ ሻቃራና” ያግስ።

⁶ እያራነ ሀንኮታራ ዳሮ ያይዳ ግሾ እ አይ ግያኮካ ኤርቤና።

⁷ ሄሳፈ ጉየ፥ ሻራይ ይድ ኤንታ ካምን ሻራፐ፥ “ሀይስ ታ ዶስያ፥ ታ ናኣ፥ እ ገይሳ ስእተ” ግያ ቃላይ ይስ።

⁸ ኤለስድ ኤንቲ ዩሽ አድ ፄልያ ዎደ፥ የሱሳፐ አትሽን፥ ሀራ ኦናካ ባንታ ማታን በእቦኮና።

⁹ ኤንቲ ዙማ ቦላፈ ዎሽን፥ የሱሲ ኤንታኮ፥ “አሳ ናአይ፥ ሀይቆፐ ደንዳና ጋካናዉ፥ ህንተ በእዳባ ኦደስካ ኦዶፕተ” ያግድ ኪትስ።

¹⁰ እ ኪትዳይሳ ኤንቲ፥ “ኤሮ” ግድ፥ “ሀ ሀይቆፐ ደንዶ ጉሳይ ዎይጉሰ” ግድ፥ ባንታ ግዶን ኦደትዶሶና።

¹¹ ኤንቲ ዛሪድ፥ “ህገ አስታማረት፥ ‘ኤልያስ ኮይሮትድ ያናዉ በሴስ’ አይስ ጎና?” ያግድ ኦይችዶሶና።

¹² የሱሲ ዛሪድ “ኤልያስ ኮይሮትድ ይድ፥ ኡባባ ጊግሴስ፤ ያትን፥ ጌሻ ማፃፋን፥ ‘አሳ ናእ ዳሮ ዋየታና፤ እፀታና’ ያግድ አይብስ ፃፈትዴ?

¹³ ሽን ታኒ ህንተዉ ኦዳይስ፤ ኤልያስ ይስ፤ ቃስ እያባይ ጌሻ ማፃፋን ፃፈትዳይሳዳ፥ አሳይ እያ ቦላ ባንታ ኮይዳባ ኦዶሶና” ያግስ።

ቱና አያን ኦይክዳ ናአ

¹⁴ የሱሲ፥ ጰፅሮስ፥ ያይቆብነ ዮሃንስ ሀንኮ እያ ታማረታኮ ስሚድ ያ ዎደ፥ ዳሮ አሳይ ኤንታ ዩሹዋን ኤቅዳይሳታነ ህገ አስታማረ ግድዳ ጉ አሳት ኤንታራ ፓላመይሳ በእዶሶና።

¹⁵ ሄ ዳሮ አሳይ የሱሳ በእዳ ዎደ ማላለትድ፥ ኤለስድ እያኮ ዎፅ ይድ፥ እያ ሳሮዶሶና።

¹⁶ የሱሲ ባ ታማረታኮ፥ “ኤንታራ አይ ፓላሜቲ?” ያግድ ኦይችስ።

¹⁷ ሄ ዳሮ አሳ ግዶፈ እስ ኡራይ ዛሪድ፥ “አስታማርያዉ፥ ታ ናኣ ቦላ ኦደተ ድግያ ቱና አያናይ ደእያ ግሾ፥ እያ ኔኮ ኤካዳ ያስ።

¹⁸ ሀ ቱና አያናይ እያ ኦይክያ ዎደ ኡባን፥ እያ ሾጭ የጌስ፤ እያ ዶናራ ጎፖንቶይ ዬስ፤ ቃስ አቸ ጋርጭሴስ፤ አሳተይካ ምኔስ። እያፐ ሀ ቱና አያና ከሳና መላ፥ ነ ታማረታስ ኦዳስ፥ ሽን ከሳናዉ ዳንዳእቦኮና” ያግስ።

¹⁹ የሱሲ ዛሪድ ኤንታኮ፥ “አማኖና ሀ ዎድያ አሳዉ! ታኒ ህንተራ አዉደ ጋካናዉ ዳኔ? ቃስ ህንተና አዉደ ጋካናዉ ዳንዳአኔ? ናኣ ታኮ ሃ ኤክ ዪተ” ያግስ።

²⁰ ኤንቲ ናኣ እያኮ ኤህዶሶና፤ ሄ ቱና አያናይ የሱሳ በእዳ መላ ናኣ ኮኮርስስ፤ ናአይ ሳአን ኩንድድ፥ ዶናራ ጎፖንቶይ ቶፉ ግሽን ጎንዶረትስ።

²¹ የሱሲ ሄ ናኣ አዋኮ፥ “ሀይስ ነ ናኣ ኦይኮሳፐ አይ መላ ዎደ ግዳኔ?” ያግድ ኦይችስ። ናኣ አዋይ፥ “እ ጉን ደእሽን ኦይክስ።

²² እያ ዎናዉ ዳሮ ዎደ ታማንነ ሃን የጌስ፥ ሽን ነ ዳንዳእኮ፥ ኑስ ቃታርክ፥ ኑና ማዳርክ” ያግስ።

²³ የሱሲ እያ፥ “ ‘ኔኒ ዳንዳእኮ ጋይ?’ አማንያ ኦደስካ ኡባባይ ዳንዳኤቴስ” ያግስ።

²⁴ ኤለስድ ናኣ አዋይ ባ ቃላ ቁ ኦድ፥ “ታኒ አማናይስ፥ ሽን ጉጃ አማናናዳ ታና ማዳርክ” ያግስ።

²⁵ የሱሲ አሳይ ዳር ዳር በይሳ በእድ፥ ቱና አያና፥ “ሀ ቱለነ ሙመ አያናዉ፥ ሀ ናኣፐ ከያ ጋዳ ነና ታ ኪታይስ፤ ቃስ ናምአን እያን ገሎፓ” ያግስ።

²⁶ ሄ ቱና አያናይ ዋስድ፥ ናኣ ዳሮ ኮኮርስድ፥ እያፐ ከይስ። ናአይ ሀይቅዳ ዳንን፥ ዳሮ አሳይ፥ “ናአይ ሀይቅስ” ያግዶሶና።

²⁷ ሽን የሱሲ ናኣ ኩሽያ ኦይክድ ደንን፥ ናአይ ደንድ ኤቅስ።

²⁸ የሱሲ ሶ ገልዳይሳፈ ጉየ፥ እያ ታማረት፥ “ኑኒ ሄ ቱና አያና ከሳናዉ አይስ ዳንዳእቦኮ?” ያግድ የሱሳ ዱማ ኦይችዶሶና።

²⁹ የሱሲ ዛሪድ፥ “ሄሳ መላይ ዎሳፐነ ፆማፐ አትሽን፥ ሀራባን ከያናዉ ዳንዳኤና” ያግስ።

የሱሲ ባ ሀይቁዋባ ዛሪድ ኦድስ

³⁰ ኤንቲ ሄ በሳፈ ደንድድ፥ ጋልላራ አድ ብዶሶና፤ የሱሲ ባ ደእያሱዋ ኦንካ ኤራና መላ ኮይቤና።

³¹ እ ባ ታማረታኮ፥ “አሳ ናኣ፥ አስ አሳስ አድ እማናነ ዎና፤ እ ሄ ጋላሳፐ ጉየ፥ ሀይቆፐ ደንዳና” ያግድ ታማርሴስ።

³² ሽን ኤንታዉ እ ገይስ ገልቤና፤ ቃስ እያ ኦይቻናዉካ ያይዶሶና።

ኡባፈ አይ ኦኔ?

³³ ኤንቲ ቅፍርናሆማ ካታማ ብድ ሶ ገልዳይሳፈ ጉየ፥ የሱሲ ኤንታኮ፥ “ኦገን አይ ኦደቴቲ?” ያግድ ኦይችስ።

³⁴ ሽን ኤንቲ፥ “ኑ ግዶን ኡባፈ አናይ ኦኔ?” ያግድ ፓላምዳ ግሾ፥ ስእ ግዶሶና።

³⁵ የሱሲ ኡትድ፥ ታማነ ናምኡ ታማረታ ፄግድ፥ “ኦንካ ስን አናዉ ኮይኮ፥ ኡባፈ ጉየ አድ፥ ኡባስ አይለ ግዳናዉ በሴስ” ያግስ።

³⁶ እስ ጉ ናኣ ኤክድ፥ ኤንታ ግዶን ኤስስ፤ ሄ ጉ ናኣ እድምድ ኤንታኮ፥

³⁷ “ሀይሳ መላ ጉ ናይታፐ እሱዋ ታ ሱንን ሞክያ ኦንካ ታና ሞኬስ፤ ቃስ ታና ሞክያ ኦንካ ታና ኪትዳይሳካ ሞኬስፐ አትሽን፥ ታ ፃላላ ሞከና” ያግስ።

ኑና እፆናይ ኑ ባጋ

³⁸ ዮሃንስ፥ “አስታማርያዉ፥ እስ አስ ነ ሱንን ቱና አያናታ ከስሽን ኑኒ በእድ፥ ኑ ባጋ ግዶና ግሾ፥ እያ ድግዳ” ያግስ።

³⁹ ሽን የሱሲ፥ “ኦንካ ታ ሱንን ፆሳይ ኦያ ማላታታ ኦድ፥ ኤለስድ ታ ቦላ ኢታባ ኦደታናዉ ዳንዳኤይ ባይና ግሾ ድጎፍተ።

⁴⁰ ኑባ እፆና ኡራይ ኑ ባጋ።

⁴¹ ታኒ ህንተዉ ቱማ ኦዳይስ፤ ህንተ ታባ ግድያ ግሾ፥ ኦንካ ህንተዉ ታ ሱንን ሀሎ ሃ ኡያናዉ እምኮካ፥ ባ ዎይቱዋ ኤካና።

ሀራ አሳስ በ ግዶፓ

⁴² “ታና አማንያ ሀ ጉታፐ እሱዋ ባለያ ኦንካ፥ ጋቻ ዎጋ ዎፃ ባ ቆን ቃችድ፥ አባን ዉልያኮ እያዉ ሎኦ።

^43-44 ነ ኩሸይ ነና ባለኮ፥ ቃንፃ ሆላ። ኔኒ ናምኡ ኩሸራ ቶኦና ጋናመ ታማን የገተይሳፈ፥ ዱፃ ኩሸራ ደኡዋ ገሎይ ነዉ ሎኦ።

^45-46 ነ ቶሆይ ነና ባለኮ፥ ቃንፃ ሆላ። ኔኒ ናምኡ ቶሁዋራ ጋናመ ታማን የገተይሳፈ፥ ዎበ ግዳዳ ደኡዋ ገለይስ ነዉ ሎኦ።

⁴⁷ ነ አይፈይ ነና ባለኮ፥ ዎጫ ከሳ ሆላ። ኔኒ ናምኡ አይፍያራ ጋናመ ታማን የገተይሳፈ፥ እስ አይፍያራ ፆሳ ካዎተ ገለይስ ነዉ ሎኦ።

⁴⁸ ያን ኤንታ ምያ ጉፁነይ ሀይቀና፥ ታማይካ ቶኤና።

⁴⁹ “ያርሾይ ማፅነን ጌየይሳ መላ አስ ኡባይ ታማን ሀርቀታና።

⁵⁰ ማፅነይ ሎኦ፥ ሽን እ ማልኦና እፅኮ፥ ዛሪድ ዋት ማልኤኔ? ህንተናን ማፅነይ ደኦ። ያንድ፥ እሶይ እሱዋራ ሳሮተን ደእተ” ያግስ።