Marqoosa 8 - ጌሻ ማፃፋ

ኦይዱ ሙኩሉ አሳ

¹ ጉ ዎደፐ ጉየ፥ ዳሮ አሳይ የሱሳኮ ሺቅዶሶና። አሳስ ምያባይ ይን የሱሲ ባ ታማረታ ባኮ ፄግድ፥

² “ሀ አሳይ ታራ ሄ ጋላስ ጋካናዉ ጋምእድ፥ አይኮካ ምያባ ደምቦና ግሾ፥ ታና አሳይ ቃስ።

³ ታኒ አሳ ኮሻራ ሶ የድኮ አሳይ ብሸ ኦገን ዳቡርድ ኩንዳና፥ ባጋ አሳይ ሃሆሶፐ ይዶሶና” ያግስ።

⁴ የሱሳ ታማረት ዛሪድ፥ “ሀ መላ ቢታን ሀ አሳ ኡባ ሙዛናዉ ግድያ ካ ደማናዉ ዳንዳኤይ ኦኔ?” ያግዶሶና።

⁵ የሱሲ ኤንታኮ፥ “ህንተዉ አፑን ኡይ ደኢ?” ያግድ ኦይችስ። ኤንቲ ዛሪድ፥ “ላፑን ኡይ ደኤስ” ያግዶሶና።

⁶ የሱሲ አሳይ ሳአን ኡታና መላ ኪትስ። ያትድ፥ ላፑን ኡይ ኤክድ ፆሳ ጋላት ስሚድ ሄ ኡይ መንድ፥ አሳስ ግሻና መላ ባ ታማረታስ እሚስ። እያ ታማረት አሳስ ግሽዶሶና።

⁷ ኤንታዉ ቃስ ጉ ላፋ ሞሎት ደኦሶና። የሱሲ ሄ ሞሎታ ግሾ ፆሳ ጋላትድ፥ አሳስ ግሻና መላ ባ ታማረታ ኪትስ።

⁸ አሳ ኡባይ ምድ ካልዶሶና። እያ ታማረት አትዳ ቲፍያ ላፑን ጋይታ ኩመ ደንዶሶና።

⁹ ካ ምዳ አሳ ታይቦይ ኦይዱ ሙኩሉ ግዳና። ሄሳፈ ጉየ፥ የሱሲ አሳ የድስ።

¹⁰ እ ቃስ ባ ታማረታራ ኤለስ ዎጎሎን ገልድ ዳልማኑታ ቢታ ብስ።

ማላታ በአናዉ ኦይችዳ ኦይሻ

¹¹ ፋርሳወት ይድ የሱሳ ፓጫናዉ ኮይድ፥ ሳሎፐ ባንታና ማላታ በሳና መላ የሱሳራ ፓላማ ኦይክዶሶና።

¹² የሱሲ ቶክ ሸምፕድ፥ “ሀ ዎድያ አሳይ አይስ ማላታ ኮዪ? ታኒ ህንተዉ ቱማ ኦዳይስ፤ ሀ ዎድያ አሳስ አይ ማላትካ እመተና” ያግስ።

¹³ እ ኤንታ ያን የግ አግድ ዛር ዎጎሎን ገልድ አባፈ ሄፍን ፕንስ።

ፋርሳወታነ ሄሮዲሳ እርሾ

¹⁴ እያ ታማረት ካ ኤፋናይሳ ዶግዶሶና፤ ኤንታዉ ዎጎሉዋ ግዶን እስ ኡይፈ ሀር ባዋ።

¹⁵ የሱሲ ኤንታኮ፥ “ህንተና ኤርተ። ፋርሳወታ እርሹዋፈነ ሄሮዲሳ እርሹዋፈ ናገትተ” ያግድ ኪትስ።

¹⁶ ኤንቲ ባንታ ግዶን፥ “እ ሀይሳ ገይ ኑስ ኡይ ባይና ግሾሳ” ያግዶሶና።

¹⁷ የሱሲ ኤንቲ ገይሳ ኤርድ ኤንታኮ፥ “ህንተዉ ኡይ ባይና ግሾ አይስ ኦደቴቲ? ሀእካ ኤረከቲ? ዎይኮ አኬከከቲ? ህንተ ዎዛናይ ዶጭዴ?

¹⁸ ህንተዉ አይፈይ ደእሽን በኤከቲ? ሀይ ደእሽን ስኤከቲ? ህንተ አኬከቲ?

¹⁹ ታኒ እቻሹ ኡይ እቻሹ ሙኩሉ አሳስ ባዳ ዎደ አፑን ጋይታ ኩመ ቲፈ ደንደቲ?” ያግስ። ኤንትካ፥ “ታማነ ናምኡ ጋይታ ኩመ” ያግዶሶና።

²⁰ “ሄሳዳካ፥ ታኒ ላፑን ኡይ ኦይዱ ሙኩሉ አሳስ ባዳ ዎደ አፑን ጋይታ ኩመ ቲፈ ደንደቲ?” ያግስ። ኤንቲ፥ “ላፑን ጋይታ ኩመ ደንዳ” ያግዶሶና።

²¹ ያትን፥ “ሀእካ አኬክበከቲ?” ያግስ።

ቤተሳይዳን ደእያ እስ ቆቀ

²² ኤንቲ ቤተሳይዳ ካታማ ብዶሶና። ጉ አሳት ቆቀ ኡራ የሱሳኮ ኤህድ ሄ ኡራ ቦቻና መላ እያ ዎስዶሶና።

²³ የሱሲ ቆቀ ኡራ ኩሽያ ኦይክድ ካታማፐ ጋፃ ከስስ። እያ አይፍያን ጩትድ ባ ኩሽያ እያ ቦላ ዎድ፥ “ነዉ አይኮይ በንቲ?” ያግድ ኦይችስ።

²⁴ ኡራይ ቁ ግድ ፄልድ፥ “ታዉ አሳይ በንቴስ፥ ሽን አሳይ ሄመትሸ ም ዳኔስ” ያግስ።

²⁵ ሄሳፈ ጉየ፥ የሱሲ ዛሪድ፥ ኡራ አይፍያን ባ ኩሽያ ዎስ። ኡራይ ሎይ ፄልስ፥ እያ አይፈይ ፓፅስ፥ ኡባባ ጌሽድ በእስ።

²⁶ የሱሲ አድያኮ፥ “ነ ሶ ባ፥ ሽን ጉታ ገሎፓ” ያግድ ኪትስ።

ጰፅሮሳ ማርካተ

²⁷ የሱሲ ባ ታማረታራ ቅሳረ ፍልጶሳ ማታን ደእያ ጉታ ብስ። ኤንቲ ብሽን ኦገ ቦላ የሱሲ፥ “ታና አሳይ ኦና ጎና?” ያግድ ባ ታማረታ ኦይችስ።

²⁸ እያ ታማረት፥ “እስ እስ አሳይ ነና፥ ‘ፃማቅያ ዮሃንሳ’ ጎሶና፤ ሀራት፥ ‘ኤልያሳ ጎሶና’ ቃስ ሀራት፥ ‘ናበታፐ እሱዋ’ ጎሶና” ያግዶሶና።

²⁹ የሱሲ ኤንታኮ፥ “ያትን ህንተ ታና ኦና ጌቲ?” ያግድ ኦይችስ። ጰፅሮስ፥ “ኔኒ ክርስቶሳ” ያግድ ዛርስ።

³⁰ የሱሲ፥ “ታባ ኦደስካ ኦዶፕተ” ያግድ ኤንታ ኪትስ።

የሱሲ ባና ጋካና ዋያ ኦድስ

³¹ የሱሲ ባ ታማረታኮ፥ “አሳ ናአይ፥ ዳሮ መቶ ኤካናዉ በሴስ፤ ጭማት፥ ካህነ ሀላቃትነ ህገ አስታማረት እያ እፃናዉ በሴስ። ኤንቲ እያ ዎናዉነ እ፥ ሄ ጋላሳፐ ጉየ፥ ሀይቆፐ ደንዳናዉ በሴስ” ያግድ ኤንታ ታማርስስ።

³² እ ሄሳ ኤንታዉ ጌሽድ ኦድስ። ጰፅሮስ እያ እስ ባጋ ዛሪድ ሀንቀትስ።

³³ ሽን የሱሲ ጉየ ስሚድ፥ ባ ታማረታ ፄልድ፥ ጰፅሮሳ ሀንቀትድ፥ “ሀ ፃላሄይ፥ ታፐ ሃካ። ኔኒ አስ ዶስያባ ቆፓሳፐ አትሽን፥ ፆሳይ ዶስያባ ቆፓካ” ያግስ።

የሱሳ ካሎይ ጭግስያ ጋተ

³⁴ ቃስካ የሱሲ ዳሮ አሳነ ባ ታማረታ ባኮ ፄግድ፥ “ታና ካላናዉ ኮይያ ኦንካ ባና ካዶ፤ ባ ማስቃልያ ቶክድ ታና ካሎ።

³⁵ ባ ሸምፑዋ አሻናዉ ኮይያ ኡራይ ይሳና። ሽን ታ ግሾነ ዎንገላ ግሾ ባ ሸምፑዋ ይስያ ኡራይ አሻና።

³⁶ እስ አስ ሳአን ደእያ ኡባባ ባዉ ሺሽድ፥ ባ ሸምፑዋ ይስኮ እያ አይ ማዳኔ?

³⁷ እስ አስ ባ ሸምፑዋ ዎዛናዉ አይ እማናዉ ዳንዳኢ?

³⁸ ፆሳ አማኖና ሀ ኢታ የለተን፥ እስ አስ ታናንነ ታ ቃላን ዬላትኮ፥ አሳ ናአይ፥ ቃስ ባ አዋ ቦንቾን ጌሻ ኪታንቾታራ ያ ዎደ እያን ዬላታና” ያግስ።