Marqoosa 7 - ጌሻ ማፃፋ

ፋርሳወታ ዎጋ

¹ የሩሳላመፐ ይዳ ጉ ፋርሳወትነ ህገ አስታማረት የሱሳ ማታን ሺቅዶሶና።

² የሱሳ ታማረታፐ እሶት እሶት ጌዮና ኩሽያን፥ ሄስካ ኩሸ ሜጨቶና ካ መይሳታ በእዶሶና።

³ ፋርሳወትነ አይሁደ አሳ ኡባይ ባንታ አዋታ ዎጋ ባንታ ኩሽያ ሜጨቶና ሞኮና።

⁴ ሄሳዳካ፥ ኤንቲ ግያፐ ሻመትዳባ ሜጮና ደእሸ ሞኮና። ቃስ ኤንቲ ባንታ አዋታፐ ኤክዳ ሀራ ዳሮ ዎግ ደኤስ፦ ሄስካ ስነታ፥ ከረታ፥ ብራታ ሚሸታነ አርሳ ሜጭያ ዎጋ ናገይሳ።

⁵ ፋርሳወትነ ህገ አስታማረት የሱሳ፥ “ነ ታማረት አይስ አዋታ ዎጋ መንድ ባንታ ኩሽያ ሜጨቶና ካ ሞና?” ያግድ ኦይችዶሶና።

⁶ የሱሲ ኤንታኮ፥ “እሳያስ ህንተና ጩቦታ፥ “ ‘ሀይስ አሳይ ታና ባ እንፃርሳ ፃላላን ቦንቼስ፥ ሽን ኤንታ ዎዛናይ ታፐ ሃሆን ደኤስ።

⁷ አስ መዳ ዎጋ ፆሳ ህገ ዳንስድ ታማርስያ ግሾ፥ ኤንቲ ታዉ መላ ጎይኖሶና’ ” ግድ ፃፍዳይስ ቱማ።

⁸ “ህንተ ፆሳ ኪታ አግድ አሳ ዎጋ ምንድ ናገታ” ያግስ።

⁹ ቃስካ የሱሲ፥ “ህንተ ህንተ ዎጋ ናግድ ፆሳ ኪታ የግ አጋናዉ ሎኦ ኦገ ደምደታ።

¹⁰ ሙሰይ፥ ‘ነ አዋነ ነ አይዉ ቦንቻ’፥ ቃስ ‘ባ አዋነ ባ አይዉ ጫየይስ ሀይቃናዉ በሴስ’ ያግስ።

¹¹ ሽን እስ አስ ባ አዋ ዎይኮ ባ አይዉ ማዳናይሳ አግድ፥ ‘ሀይስ ታኒ ፆሳስ እምዳ ያርሾ’ ጊኮ፥

¹² እ ባ አዋ ዎይኮ ባ አይዉ ማዶና መላ ኦታ።

¹³ ሄሳዳካ፥ ህንተ ሀራታ ታማርስዳ ህንተ ዎጋን ፆሳ ቃላ ካደታ። ሄሳ መላ ሀራ ዳሮባ ኦታ” ያግስ።

አሰ ቱንስያባታ

¹⁴ የሱሲ ዳሮ አሳ ቃስካ ባኮ ፄግድ፥ “ኡባይ ታኒ ኦደይሳ ስእተነ አኬክተ።

¹⁵ አሳ ዎዛናፐ ከያባይ አሰ ቱንሴስፐ አትሽን፥ ካረፐ አሳ ኡሎ ገልድ አሰ ቱንስያባይ አይብካ ባዋ።

¹⁶ ስእያ ሀይ ደእያ ኦንካ ስኦ” ያግስ።

¹⁷ የሱሲ ዳሮ አሳ የግ አግድ ሶ ገልን እያ ታማረት ሄ ሌምሱዋባ እያ ኦይችዶሶና።

¹⁸ እ ኤንታኮ፥ “ህንተዉካ ቃስ ገልቤኔ? ካረፐ አሳን ገልያባይ አይብካ አሰ ቱንሳናዉ ዳንዳኦናይሳ አኬከቲ?

¹⁹ አይስ ጊኮ፥ ካ አሳ ኡሎ ግዶ ገልድ ካንድ አስፐ አትሽን፥ አሳ ዎዛና ግዶ ገለና” ያግስ። ሄሳን የሱሲ ካ ኡባይ ጌሽ ግደይሳ ኤርስስ።

²⁰ ካልድካ፥ የሱሲ፥ “አሳ ቱንስያባይ አሳ ዎዛና ግዶፈ ከያባ።

²¹ አሳ ዎዛና ግዶፈ ከያባይ ኢታ ቆፋ፥ ላይማተ፥ ካይሶ፥ አሰ ዎ፥ ላመ፥

²² ኢታ አሞ፥ ኢታተ፥ ገነ፥ ቃይፀ፥ ጭሞ፥ ቃናተ፥ ጫሸ፥ ኦቶሮነ ቦዛተ።

²³ ሀ ኢታባይ ኡባይካ አሳ ዎዛና ግዶፈ ከይድ አሰ ቱንሴስ” ያግስ።

እስ ማጫሰ አማኖ

²⁴ የሱሲ ያፐ ከይድ፥ ፅሮሳ ካታማ ማታን ደእያ ቢታ ብስ። እ እስ ኬ ገልድ ያን ደኤይሳ ኦንካ ኤራና መላ ኮይቤና። ሽን ቆሰትድ ጋምአናዉ ዳንዳእቤና።

²⁵ ሽን እ ጉ ናእዉ ቱና አያናይ ኦይክዳ እስ ማጫስያ የሱሳባ ስአዳ ኤለሳ እያኮ ያዳ እያ ቶሁዋ ቦላ ኩንዳሱ።

²⁶ እያ አይሁደ ማጫስ ግዱኩ፤ እያ የለትዳይ ስሮፍንቀ ቢታና። እያ፥ ባ ናኤፐ ቱና አያና ከሳና መላ የሱሳ ዎሳሱ።

²⁷ ሽን የሱሲ ዛሪድ፥ “ናይት ኮይሮትድ ካ ካሎ፤ ናይታ ካ ኤክድ ካናታስ የገይስ ሎኦ ግደና” ያግስ።

²⁸ ማጫስያ ዛራዳ፥ “ታ ጎዳዉ ሄስ ቱማ፥ ሽን ጋይታ ማታን ደእያ ካናት ናይታፐ ዎያ ቲፍያ ሞሶና” ያጋሱ።

²⁹ የሱሲ ቃስ ኢኮ፥ “ሀ ነ ቃላ ግሾ፥ ነ ሶ ባ፤ ቱና አያናይ ነ ናኤፐ ከይስ” ያግስ።

³⁰ ማጫስያ ባ ሶ ብያ ዎደ ቱና አያናይ ኢፐ ከይን ሂፃን ዝንእዳሮ ደማሱ።

ቱለነ ሙመ ኡራ

³¹ የሱሲ ፅሮሳ ካታማፐ ከይድ፥ ስዶናራነ ታሙ ካታማታ ጌተትያ ቢታራ ካንድ ጋልላ አባኮ ብስ።

³² አሳይ ቱለነ ዋይድ ኦደትያ አስ የሱሳኮ ኤህድ፥ ባ ኩሽያ እያ ቦላ ዎና መላ እያ ዎስዶሶና።

³³ የሱሲ ባርካ ሄ ኡራ ዳሮ አሳፐ ጋፃ ከስድ፥ ባ ብራያ እያ ሀይን የድስ። ቃስ ጩቹ ጩትድ እያ እንፃርሳ ቦችስ።

³⁴ ሳሎ ፑደ ፄልድ፥ ቶክ ሸምፕድ፥ “ኤፍታህ” ግስ። ብርሸይካ “ዶየታ” ጉሱ።

³⁵ ኡራ ሀይይ ኤለስድ ዶየትስ፥ ቃሸትዳ እንፃርሳይካ ብርሸትስ፥ ኡራይ ጌሽድ ኦደትስ።

³⁶ የሱሲ አሳኮ፥ “ሀይሳ ኦደስካ ኦዶፕተ” ያግስ። ሽን እ ዳሮ ምንድ ኦዶፕተ ግን፥ አሳይ ኦዳ ያ ዳርስስ።

³⁷ ሄሳ ስእዳ አሳ ኡባይ ዳሮ ማላለትድ፥ “ኡባባ እ ሎይ ኦስ። ሀር አቶሽን፥ ቱልያ ስሴስ፥ ሙምያ ኦድሴስ” ያግዶሶና።