Marqoosa 5 - ጌሻ ማፃፋ

ቱና አያን ኦይክዳ ኡራ

¹ የሱስነ እያ ታማረት አባ ፕንድ፥ ገርገሶነ ቢታ ጋክዶሶና።

² የሱሲ ዎጎሉዋፐ ዎያ ዎደ ቱና አያናይ ኦይክዳ እስ ኡራይ ዱፎፐ ከይድ እያራ ጋሄትስ።

³ ሄ ኡራይ አቅ ፔእድ ደኤይ ዱፎና። እያ ኦንካ ሳንላታን ቃቻናዉ ዳንዳኤና።

⁴ እ ዳሮ ቶሆ ዱንነ ሳንላታን ቃሸትድ ደኤስ። ሽን ሳንላታ ዱሰረስ፥ ዱ መንረስ። እያ ተቃናዉ ዳንዳእያ ኦንካ ባዋ።

⁵ እ ቃማነ ጋላስ ሄ ዱፉዋንነ ደረ ቦላ ዋሴስ፥ ባ አሳተ ሹቻን ጋሬስ።

⁶ የሱሳ ሃሆን በእዳ ዎደ ዎፅ ብድ እያ ስንን ጉልባትስ።

⁷ ሄ ኡራይ ባ ቃላ ቁ ኦድ፥ “ኡባፈ ቦላ ፆሳ ናአዉ የሱሳ፥ ነናነ ታና አይበ ጋይ? ታና ይሶና መላ ታኒ ነና ፆሳ ሱንን ዎሳይስ” ያግስ።

⁸ እ ሄሳ ግዳይ የሱሲ እያ፥ “ላ ሀ ቱና አያናዉ፥ ሀ አድያፈ ከያ” ያግዳ ግሾሳ።

⁹ የሱሲ እያኮ፥ “ነ ሱንይ ኦኔ?” ያግድ ኦይችስ። እ፥ “ኑኒ ዳሮ ግድያ ግሾ፥ ታ ሱንይ ሌግዮና” ያግስ።

¹⁰ ቱና አያናት ባንታና ሄ ቢታፈ ከስ የዶና መላ የሱሳ ምንድ ዎስዶሶና።

¹¹ ሄ ደርያ ቦላ ዳሮ ጉዱን ዉደይ ሄመቴስ።

¹² ቱና አያናት የሱሳኮ፥ “ኑና ህን ጉዱን ዉድያኮ የዳርክ፥ ኤንታን ብድ ገሎስ” ያግድ ዎስዶሶና።

¹³ የሱሲ ኤንታኮ፥ “ቢተ” ያግስ። ያትን ቱና አያናት አድያፈ ከይድ ጉዱንታን ገልዶሶና። ናምኡ ሙኩሉ ግድያ ጉዱን ዉደይ አፎ ዶናራ ድርግድ ብድ አባን ገልድ ምተትዶሶና።

¹⁴ ጉዱን ዉድያ ሄመይሳት ባቃት ብድ ሀንዳባ ካታማንነ ጋፃርያን ኦድዶሶና። ያትን አሳይ ሀንዳባ በአናዉ ከይዶሶና።

¹⁵ አሳይ የሱሳኮ ያ ዎደ ቱና አያናን ኦይከትዳ ኡራ በእዶሶና። እ ባ ዎዛናኮ ስሚድ፥ ማኦ ማእድ፥ ያን ኡትዳይሳ በእዳ ዎደ ኡባይ ያይዶሶና።

¹⁶ ሄሳ በእዳ አሳት ቱና አያናት ኦይክዳ ኡራ ቦላነ ጉዱንታ ቦላ ሀንዳባ ኡባ አሳስ ኦድዶሶና።

¹⁷ ሄሳ ግሾ፥ አሳይ ባንታ ቢታፈ የሱሲ ባና መላ ዎስዶሶና።

¹⁸ የሱሲ ዎጎሉዋን ገልያ ዎደ ካሰ ቱና አያናይ ኦይክድ የድዳ ኡራይ፥ የሱሳ ካላናዉ እያ ዎስስ።

¹⁹ ሽን የሱሲ እፅድ እያኮ፥ “ነ ሶ ስማዳ፥ ጎዳይ ነዉ አይ መላ ግታባ ኦዳኮነ ነዉ አይ መላ ኬህዳኮ ነ ሶ አሳስ ኦዳ” ያግስ።

²⁰ ኡራይ ብድ ታሙ ካታማ ጌተትያ በሳን ዩይድ፥ የሱሲ ባዉ አይ መላ ግታባ ኦዳኮ ኦድስ። እ ኦድዳይሳ ስእዳ አሳ ኡባይ ማላለትዶሶና።

ሀይቅዳ ናእዉነ ሀርገትያ ማጫስዉ

²¹ የሱሲ ስሚድ፥ ዎጎሉዋን ገልድ፥ አባ ፕንዳፐ ጉየ ዳሮ አሳይ አባ ጋፃን እያ ዩሹዋን ሺቅዶሶና።

²² እያሮሳ ጌተትያ አይሁደ ዎሳ ኬ ሀላቃታፐ እሶይ፥ የሱሳ በእዳ ዎደ እያኮ ይድ እያ ቶሁዋ ቦላ

²³ ኩንድድ፥ “ታ ናእያ ሀርጋዳ ሀይቃና ሀናዉሱ። እያ ፓፃዳ ደአና መላ ያዳ ነ ኩሽያ እ ቦላ ዎርክ” ያግድ የሱሳ ምንድ ዎስስ።

²⁴ የሱሲ እያሮሳራ ብስ። እ ብሽን ዳሮ አሳይ እያ ካልድ ኡንኤዶሶና።

²⁵ ታማነ ናምኡ ላይ እፔ ሱ ሂያ እስ ማጫስያ ደአዉሱ።

²⁶ ዳሮ አክመት እዮ አክምዶሶና፥ ሽን እያ ፓፃ ካኤታሱ። እያ ባ ሚሽያ ኡባ ዉርስንካ እዉ ሃ ኢትስፐ አትሽን፥ አይኮካ ማድቤና።

²⁷ ሄ ማጫስያ የሱሳባ ስአዳ፥ አሳ ካንዳ የሱሳ ጉየራ ያዳ እያ ማኡዋ ቦቻሱ።

²⁸ እያ፥ “ታኒ ሀር አቶሽን እያ ማኡዋ ቦችያኮ ፓፃና” ጋዳ ቆፓሱ።

²⁹ ኢፐ ጎግያ ሱይ ኢራካ ኤቅ አግስ። እያ ባ ዋያፐ ፓፅዳይሳ ባ አሳተን ኤራሱ።

³⁰ የሱሲ ባፐ ዎልቅ ከይዳይሳ ባ ሁጰን ኤርድ፥ ኤለስድ ዳሮ አሳ ግዶን ጉየ ስሚድ፥ “ታ ማኡዋ ቦችዳይ ኦኔ?” ያግስ።

³¹ እያ ታማረት፥ “አሳይ ነና ሱገይሳ በአሸ፥ ‘ዎይጋዳ ታና ኦነ ቦችዳይ ያጋይ?’ ” ያግዶሶና።

³² የሱሲ ሄሳ ኦን ኦዳኮ በአናዉ ዩሽ አ ፄልስ።

³³ ሽን ማጫስያ ባዉ ሀንዳባ ኤራዳ፥ ያሻን ኮኮራሸ ያዳ የሱሳ ስንን ጉፋናሱ፤ ቃስ ሀንዳባ ኡባ ቱማ እያዉ ኦዳሱ።

³⁴ ያንን፥ የሱሲ ኢኮ፥ “ታ ናተ፥ ነና ነ አማኖይ ፓስ፥ ሳሮን ባ፥ ነ ዋያፐካ ፓፃ” ያግስ።

³⁵ የሱሲ ቡሮ ሄሳ ኦድሽን፥ አይሁደ ዎሳ ኬ ሀላቃ ሶፐ ኪተትዳ አሳት ይድ፥ “ነ ናእያ ሀይቃሱ፥ አስታማርያ አይስ ዳቡርሳይ?” ያግዶሶና።

³⁶ ሽን የሱሲ ኤንቲ ገይሳ ስእድ፥ አይሁደ ዎሳ ኬ ሀላቃኮ፥ “አማኖ ፃላላ አማናፐ አትሽን፥ ባቦፋ” ያግስ።

³⁷ የሱሲ ጰፅሮሳፐ፥ ያይቆባፐነ ያይቆባ እሻ ዮሃንሳፐ ሀር ኦንካ ባና ካሎና መላ ድግስ።

³⁸ ኤንቲ አይሁደ ዎሳ ኬ ሀላቃ ሶ ጋክያ ዎደ የሱሲ አሳይ ካሀ ይድ ዬከይሳነ ዘሌለይሳ በእስ።

³⁹ ገልድ አሳኮ፥ “አይስ ካሀ ይድ ዬከቲ? ናእያ ስካሱፐ አትሽን፥ ሀይቃቡኩ” ያግስ።

⁴⁰ አሳይ እያ ቦላ ሚጭስ። ሽን አሳ ኡባ ካረ ከስድ፥ ናኤ አዋ፥ አይዉነ ሄ ታማረታ ባራ ኤክድ ናእያ ደእያሱዋ ገልስ።

⁴¹ የሱሲ ናኤ ኩሽያ ኦይክድ፥ “ፃልታ፥ ቁም” (ጉ ናተ፥ ነና ጋይስ ደንዳ) ያግስ።

⁴² ናእያ ኤለሳ ደንዳ ኤቃዳ ሄመታሱ። እያ ታማነ ናምኡ ላይ ናአ። ሄሳን አሳይ ዳሮ ማላለትዶሶና።

⁴³ የሱሲ ሄሳ ኤንቲ ኦደስካ ኦዶና መላ ኤንታ ምን ኪትስ። ኤንቲ እዉ ምያባ እማና መላ ኦድስ።