Marqoosa 4 - ጌሻ ማፃፋ

ዘረ ዘርያ ኡራ ሌምሶ

¹ የሱሲ ዛሪድ ጋልላ አባ ማታን ታማርሴስ። ዳሮ አሳይ እያ ማታን ዩሹዋን ሺቅን፥ አባን ደእያ ዎጎሉዋ ግዶ ገልድ ኡትስ፥ አሳ ኡባይ አባ ማታን ደኤስ።

² እ ኤንታ ዳሮባ ሌምሶን ታማርስስ። ታማርስሸ ሀይሳዳ ያግስ፦

³ “ስእተ! እስ ኡራይ ዘረ ዘራናዉ ከይስ።

⁴ እ ዘርሽን፥ እስ እስ ዘረይ ኦገ ጋፃን ዎስ፤ ካፎት ይድ ምዶሶና።

⁵ እስ እስ ዘረይ ጋርሳን ሻሎይ ደእያ ቢታ ቦላ ዎስ። ዳሮ ቢት ባይና ግሾ፥ ሄ ዘረይ ኤለስድ ዶልስ።

⁶ ሽን አው ከይዳ ዎደ ሹልስ። ሎይድ ፃጶ የድቦና ግሾ፥ ኤለስ መልስ።

⁷ እስ እስ ዘረይ አጉን ግዶን ዎስ። ዶልዳይሳ አጉንይ ድጭድ ጩልዳ ግሾ አይፈ አይፎና አትስ።

⁸ እስ እስ ዘረይ አራዳ ቢታን ዎድ ዶልስ። ድጭድ እሶይ ሀስታማ፥ እሶይ ኡሱፑን ታማ እሶይ ፄታ አይፍስ” ያግስ።

⁹ “ስእያ ሀይ ደእያ ኦንካ ስኦ” ያግስ።

¹⁰ የሱሲ ኦድዳይሳ ስእዳ እስ እስ አሳትነ ታማነ ናምኡ ታማረት የሱሲ ባርካ ደእሽን፥ እያኮ ሺቅድ ሄ ሌምሱዋ ብርሸ ኦይችዶሶና።

¹¹ የሱሲ ኤንታኮ ሀይሳዳ ያግስ፦ “ህንተዉ ፆሳ ካዎተ ፁራ ኤሮይ እመትስ። ሽን ሀራታስ ካዎተፈ ካረን ደኤይሳታስ ኡባባይ ሌምሶን ኦደቴስ።

¹² ጋሶይካ፥ “ ‘ኤንቲ ፄሎሶና፥ ሽን ደሞኮና። ስኦሶና፥ ሽን አኬኮኮና። ኤንቲ ደምያኮነ አኬክያኮ፥ ፆሳኮ ስማና እካ ኤንታ ማራናሽን’ ” ያግስ።

¹³ የሱሲ ኤንታኮ፥ “ሀ ሌምሶይ ህንተዉ ገለኔ? ያትን፥ ሌምሶ ኡባ ህንተ ዋት አኬካኔ?

¹⁴ ዘረይስ ፆሳ ቃላ ዘሬስ።

¹⁵ ቃላይ ዘረትያ ዎደ ኦገ ጋፃን ዎዳይሳት ቃላ ስእዳይሳታ። ሽን ፃላሄይ ኤለስድ፥ ይድ ኤንታ ዎዛናን ዘረትዳ ቃላ ማፅ ድጌስ።

¹⁶ ሄሳዳካ፥ ጋርሳን ሻሎይ ደእያ ቢታን ዘረትዳይስ ቃላ ስእድ፥ ኤለስድ ኡፋይሳን ኤከይሳ።

¹⁷ ሽን እያዉ ምኖ ፃጶይ ባይና ግሾ ሀእሳፈ አትሽን፥ ጋምኦኮና። ጉ ዎደፐ ጉየ ቃላ ጋሶን ዋየይ ዎይኮ ጎድ ጋክያ ዎደ ኤለስድ በቶሶና።

¹⁸ አጉን ግዶን ዘረትዳይስ ቃላ ስኤይሳታ።

¹⁹ ሽን ሀ ሳአ ደኡዋስ ህርጎይ፥ ዱረተ ዶሶይነ ሀራባ አሞተይስ እያ ዎዛናን ገልድ ቃላ ጩልያ ግሾ አይፈ አይፎና አትስ።

²⁰ ሽን አራዳ ቢታን ዘረትዳይሳት ቃላ ስእድ ኤከይሳታ። ኤንቲ እሶይ ሀስታማ፥ እሶይ ኡሱፑን ታማ እሶይ ፄታ አይፍስ” ያግስ።

ጌማን ደእያ ፆምፐ

²¹ የሱሲ ጉጅድ፥ “ፆምፐ ኤክድ፥ ዳቾፈ ዎይኮ አልጋፈ ጋርሳን ዎያ አስ ደኢ? ቃ በሳን ዎነዬ?

²² ህዛ፥ ቆሰትዳባይ ኡባይ ቆንጨ ከያና፤ ጌምዳባይ ኡባይ ኤረቶና አተና።

²³ ስእያ ሀይ ደእያ ኦንካ ስኦ” ያግስ።

²⁴ ቃስ ኤንታኮ፥ “ህንተ ስእያባ አኬክድ ስእተ! ፆሳ ቃላ ህንተ ስኤይሳ መላ እ ህንተዉ አኬካ እማና። ኡባካ ህንተዉ ዳርስድ እማና።

²⁵ እስባይ ደእያ ኡራስ ጉጅ እመታና፥ ባይናይሳፈ ሀር አቶሽን፥ እያዉ ደእያ ሄ ጉያካ ኤከታና” ያግስ።

ድጭያ ዘረ ሌምሶ

²⁶ የሱሲ ዛሪድ፥ “ፆሳ ካዎተይ ባ ጋደን ዘረ ዘርያ አሳ መላ።

²⁷ ሄ ኡራይ ቃማ ስኬስ፤ ዎንታ ደንዴስ። እ ባ ሁጰን ዋንያኮ ኤሮና ደእሽን ሄ ዘረይ ዶሌስነ ድጬስ።

²⁸ ቢታይ ካ ባርካ እሜስ። ኮይሮ ዶልድ ድጬስ፥ ካልድ አይፋናዉ ጋምቡፄስ፥ ዉርሰን ኩመ አይፈ አይፌስ።

²⁹ ሽን ካይ ጋክያ ዎደ ኡራይ ኤለስድ ባጫራ ገል አጌስ” ያግስ።

አይፈ ጉ ም ሌምሶ

³⁰ የሱሲ፥ “ኑኒ ፆሳ ካዎተ አይ ዳኔስ ጋኔ? ዎይኮ አይብራ ሌምሳኔ?

³¹ ፆሳ ካዎተይ አይፈ ጉ ም ዳኔስ። ሄ ም አይፍያ ዘርያ ዎደ ሳአን ደእያ ም አይፈ ኡባፈ ጉፄስ።

³² ዘርን ዶልድ አታክልተ ኡባፈ ግታቴስ፤ ዳሮ ዳሽ ዳዬስ። ካፎት እያ ታሽያ ቦላ ኬፅድ ኡታና ጋካናዉ ዳዬስ” ያግስ።

³³ የሱሲ ሀይሳ መላ ዳሮ ሌምሶን አሳይ አኬካናዉ ዳንዳኤይሳ መላ ቃላ ኦድስ።

³⁴ አሳስ ሌምሶይ ባይና ኦደና። ሽን የሱሲ ባ ታማረታ ፃላላራ ደእያ ዎደ፥ ኤንታዉ ኡባባ ብርሽድ ኦድስ።

የሱሲ ሆቢያ ሴርስ

³⁵ ሄ ጋላስ ሳእ ኦማርስን፥ የሱሲ ባ ታማረታኮ፥ “አባፈ ሄፍን ፕኖስ” ያግስ።

³⁶ እያ ታማረት ዳሮ አሳ የግ አግድ፥ የሱሲ ካሰ ገል ኡትዳ ዎጎሉዋን ገልድ የሱሳ ባንታራ ኤፍዶሶና። ሀራ ዎጎሎትካ ያን ደኦሶና።

³⁷ ዎልቃማ ጎተይ ደንድድ፥ ሆበይ ዎጎሉዋ ሾጭን፥ ኩማና ጋካናዉ ዎጎሉዋ ግዶ ሃ ገልስ።

³⁸ ሄ ዎደ የሱሲ ዎጎሉዋን ጉየ ባጋራ ቦርኮትድ ስክስ። እያ ታማረት እያ ደንድ፥ “አስታማርያዉ፥ ኑኒ ይያ ዎደ ነ ስእ ጋዳ ፄላይ?” ያግዶሶና።

³⁹ ያትን፥ እ ባርክድ ጎትያ፥ “ስእ ጋ” ግድ፥ አባካ፥ “ዎፑ ጋ” ግስ። ጎተይካ ስእ ግን ኡባባይ ዎፑ ግስ።

⁴⁰ የሱሲ ባ ታማረታኮ፥ “አይስ ሀይሳዳ ባበቲ? ህንተዉ አማኖይ ዋንድ ይዴ?” ያግስ።

⁴¹ ኤንቲ ዳሮ ባብድ ባንታ ግዶን፥ “ሀይስ ሀር አቶሽን፥ ጎተይነ አባይ ኪተተይስ ኦኔ?” ያግዶሶና።