Marqoosa 3 - ጌሻ ማፃፋ

ኩሸይ ስልዳ ኡራ

¹ የሱሲ አይሁደ ዎሳ ኬ ስም ገልስ። ያን ኩሸይ ጉንድዳ እስ ኡራይ ደኤስ።

² እስ እስ አሳይ የሱሳ ሞታናዉ ኮይድ፥ ኩሸይ ጉንድዳ ኡራ ሳምባታ ጋላስ እ ፓኮነ አግኮ በአናዉ ኮይድ ምንድ ናጎሶና።

³ የሱሲ ኩሸይ ጉንድዳ ኡራ፥ “ደንዳ ኤቃዳ ሃ ስን ያ” ያግስ።

⁴ ሄሳፈ ጉየ፥ አሳኮ፥ “ሳምባታ ጋላስ ሎኦባ ኦይስ ዎገየ ኢታባ ኦይስ ዎጌ? አሳ ሸምፖ አሾየ ዎይኮ ዎ?” ያግድ ኦይችስ። ሽን አሳይ ስእ ግስ።

⁵ የሱሲ ሀንቀትድ፥ ኤንታ ዩሽ አ ፄልድ፥ ኤንቲ ኦድን ስኦናይሳታ ግድያ ግሾ፥ ኤንታ ቦላ ዳሮ አዛንስ። ሄ አድያኮ፥ “ነ ኩሽያ ፕድ ኦ” ያግስ። ኡራይ ፕድ ኦን እያ ኩሸይ ፓፅስ።

⁶ ኤለስድ ፋርሳወት አይሁደ ዎሳ ኬፈ ካረ ከይድ፥ የሱሳ ዋት ዎነኮ ማቀታናዉ ሄሮዲሳ ባጋታራ እስ ሶ ሺቅዶሶና።

ዳሮ አስ የሱሳ ካሌስ

⁷ የሱሲ ባ ታማረታራ ጋልላ አባኮ ብስ። ጋልላፐነ ይሁዳፐ ይዳ ዳሮ አሳይ እያ ካልዶሶና።

⁸ ቃስካ የሩሳላመፐ፥ ኤዶምያሳፐ፥ ዮርዳኖሰ ሻፋ ፕንፈ፥ ፅሮሳ ካታማፐነ ስዶና ካታማፐ የሱሲ ኦዳባ ስእድ፥ ዳሮ አሳይ እያኮ ይዶሶና።

⁹ አሳ ዳሮተፈ ደንዶይሳን እያ ኡንኤና መላ እያ ታማረት ዎጎሎ እያዉ ጊግሳና መላ ኪትስ።

¹⁰ ዳሮ አሳ እ ፓዳ ግሾ፥ ሀርግያ አሳ ኡባይ እያ ቦቻናዉ ሱገቶሶና።

¹¹ ቱና አያናይ ኦይክዳ አሳት እያ በእዳ ዎደ እያ ስንን ኩንድድ፥ ባንታ ቃላ ቁ ኦድ፥ “ኔኒ ፆሳ ናኣ ግድኪ?” ያጎሶና።

¹² ሄ ቱና አያናት እያ ኦናተ ኦደስካ ቆንጭሶና መላ ኤንታዉ ምንድ ኦድስ።

ታማነ ናምኡ ሀዋረታ

¹³ የሱሲ ደርያ ቦላ ከይድ፥ ባ ኮይዳ አሳታ ባኮ ፄግስ፤ ኤንትካ እያኮ ብዶሶና።

¹⁴ ኤንቲ ባራ ዳና መላነ ቃላ ታማርሳና መላ ታማነ ናምአታ ዶርድ፥ ኤንታ፥ “ሀዋረታ” ግድ ሱንስ።

¹⁵ ቱና አያናታካ ከሳና መላ ኤንታዉ ማታ እሚስ።

¹⁶ እ ዶርዳ ታማነ ናምአት ሀይሳታ፦ ጰፅሮሳ ያግድ ሱንዳ ስሞና፥

¹⁷ ቦአነርገስ (ዳዳ ናይታ) ያግድ ሱንዳይሳታ፥ ዛብድዮሳ ናይታ ያይቆባነ ያይቆባ እሻ ዮሃንሳ፥

¹⁸ እንድርያሳ፥ ፍልጶሳ፥ ባርተለሞሳ፥ ማቶሳ፥ ቶማሳ፥ እልፍዮሳ ናአ ያይቆባ፥ ታድዮሳ፥ ባ ቢታስ ምሸትያ ስሞናነ፥

¹⁹ የሱሳ አድ እምዳ አስቆሮታ ይሁዳ።

የሱሳነ ብኤል-ዘቡላ

²⁰ ሄሳፈ ጉየ፥ የሱሲ ሶ ብስ። ቃስ ዳሮ አሳይ ሺቅን፥ እነ እያ ታማረት ሀር አቶሽን ካ ማናዉካ ዳንዳእቦኮና።

²¹ አሳይ እያ፥ “ጎዬስ” ግያ ግሾ፥ እያ ዳቦት ሄሳ ስእድ እያ ኤካናዉ ብዶሶና።

²² ህገ አስታማረታፐ እሶት እሶት የሩሳላመፐ ይድ፥ “እያ ቦላ ብኤል-ዘቡል ደኤስ”፥ እ፥ “ፃላሄይ ዎልቃን ቱና አያናታ ከሴስ” ያግድ ኦደትዶሶና።

²³ የሱሲ አሳ ባኮ ፄግድ ሌምሶ ኦድስ። “ፃላሄይ ፃላሄ ዋት ከሳናዉ ዳንዳኢ?

²⁴ እስ ካዎተይ ባ ግዶን ሻከትኮ ሄ ካዎተይ ኤቃናዉ ዳንዳኤና።

²⁵ ሄሳዳካ፥ እስ ኬ አሳይ ባንታ ግዶን ሻከትኮ ያናፐ አትሽን፥ ዳናዉ ዳንዳኦኮና።

²⁶ ህዛ፥ ፃላሄይ ባራ ካጨትድ ሻከትኮ ዮፐ አትሽን፥ ዳናዉ ዳንዳኤና።

²⁷ “ሽን ኮይሮትድ ዎልቃማ ኡራ ቃቾና ደእሸ እያ ኬ ገልድ፥ እያ ሚሽያ ቦንቃናዉ ዳንዳእያ አስ ባዋ። ቃች ስሚድ እያ ኬ ቦንቃናዉ ዳንዳኤስ።

²⁸ “ታኒ ህንተዉ ቱማ ኦዳይስ፤ ፆሳይ አሳ ናይታስ ናጋራ ኡባነ ኤንቲ ጫይያ ጫሸ ኡባ አቶ ጋና።

²⁹ ሽን ጌሻ አያና ቦላ ኢታባ ኦደትያ ኦደስካ መርና ናጋራ ግዳናፐ አትሽን፥ ፆሳይ ኡባራካ እያ ማረና” ያግስ።

³⁰ የሱሲ ሄሳ ግዳይ፥ እስ እስ አሳት፥ “እያ ቦላ ቱና አያናይ ደኤስ” ያግዳ ግሾሳ።

የሱሳ አይዉነ እያ እሻታ

³¹ እያ አያነ እያ እሻት ይድ ካረን ኤቅድ፥ እያኮ አሰ ኪትድ እያ ፄግዶሶና።

³² እያ ማታን ኡትዳ ዳሮ አሳት፥ “ሄኮ፥ ነ አየራነ ነ እሻታራ ካረን ኤቅድ ነና ኮዮሶና” ያግዶሶና።

³³ የሱሲ ዛሪድ፥ “ታ አይያ ኦኔ? ቃስ ታ እሻት ኦናንቴ?” ያግስ።

³⁴ ባ ማታን ኡትዳ አሳ ዩሽ አ ፄልድ፥ “ሄኮ፥ ታ አያነ ታ እሻት ሀይሳታ።

³⁵ ፆሳይ ሸንያ ኦያ ኡባይ ታ እሻ፥ ታ ምቾነ ታ አዮ” ያግስ።