Marqoosa 15 - ጌሻ ማፃፋ

የሱሲ ጵላፆሳ ስንን

¹ ዎንታ ጉራ ኤለስድ ካህነ ሀላቃት፥ ጭማት፥ ህገ አስታማረትነ አይሁደ ሻንጎት ኡባይ ሺቅድ ማቀትዶሶና። ኤንቲ የሱሳ ቃች ኤፍድ ጵላፆሳስ አድ እምዶሶና።

² ጵላፆስ እያኮ፥ “ኔኒ አይሁደ ካዎ?” ያግድ ኦይችስ። የሱሲ ዛሪድ፥ “ነ ጋዳሳ” ያግስ።

³ ካህነ ሀላቃት የሱሳ ዳሮባን ሞትዶሶና።

⁴ ሽን ጵላፆስ ዛሪድ የሱሳኮ፥ “ነዉ ዛርያባይ ባዌ? ኤንቲ ነ ቦላ አይ መላ ሞቱዋ ኤህያኮ በእኪ?” ያግስ።

⁵ ሽን የሱሲ ሀራባ ዛሮና እፅን፥ ጵላፆስ ማላለትስ።

የሱሲ ሀይቆ ፕርደትስ

⁶ ጵላፆሳስ ፓስካ ባኣለ ቦንችያ ጋላሳን አሳይ ኮያ እስ አስ ቃሾፐ ብልያ ሜዘይ ደኤስ።

⁷ ሄ ዎደ እስ ባርባና ጌተትያ ኡራይ ኦሹ ከስድ ሸምፖ ዎዳ አሳራ እስፈ ቃሾ ኬን ደኤስ።

⁸ ሺቅዳ ዳሮ አሳይ ጵላፆስ ካሰይሳዳ ኦና መላ እያ ኦይችዶሶና።

⁹ ጵላፆስ አሳ ዛሪድ፥ “ታኒ ህንተዉ አይሁደታ ካዋ ብላናይሳ ኮዬቲ?” ያግድ ኦይችስ።

¹⁰ ሄሳ እ ግዳይ፥ ካህነ ሀላቃት የሱሳ ቃናትድ አድ እምዳይሳ ኤርያ ግሾሳ።

¹¹ ሽን ካህነ ሀላቃት የሱሳ ግሾ ባርባና ብላናዳ፥ ሄ ሺቅዳ አሳይ ጵላፆሳ ዎሳና መላ አሳ ማቅዶሶና።

¹² ጵላፆስ ዛሪድ፥ “ያትን፥ ሀ ህንተ አይሁደ ካዎ ገይሳ ዋቶ?” ያግስ።

¹³ አሳይ ጵላፆሳ ቦላ ዋስድ፥ “ማስቃለ ቦላ እያ ካቃ” ያግዶሶና።

¹⁴ ጵላፆስ፥ “አይስ? እ አይ ኢታባ ኦዴ?” ያግስ። ሽን አሳይ ካሰይሳፈ ጉጅ ዋስድ፥ “ማስቃለ ቦላ እያ ካቃ” ያግዶሶና።

¹⁵ ጵላፆስ አሳ ኡፋይሳናዉ ኮይድ፥ ባርባና አሳስ ብልስ፤ ያትድ ልሶን የሱሳ ጋራፍድ፥ ማስቃልያ ቦላ ካቃና መላ ኤንታዉ አድ እሚስ።

የሱሲ ቶሸትስ

¹⁶ ሄሳፈ ጉየ፥ ዎታዳረት የሱሳ ደርያ ሃረይሳ ኦሶ ኬ ኤፍድ፥ ሀራ ዎታዳረታ ኡባ እስፈ ፄግዶሶና።

¹⁷ ቃስ ዞኦ አፍላ እያ ማይዝዶሶና፤ አጉን ካላቻ ጊግስድ፥ እያ ሁጰን ዎዶሶና።

¹⁸ ሄሳፈ ጉየ፥ እያኮ፥ “አይሁደታ ካዋዉ መርናዉ ካዎታ” ያግድ፥ እያዉ ዝግዶሶና።

¹⁹ እያ ሁጵያ ፃምአን ሾጭዶሶና፤ ቃስ እያ ቦላ ጩትዶሶና፤ ጉልባትድ እያዉ ጎይንዶሶና።

²⁰ እያ ቶችዳፐ ጉየ ዞኦ አፍላ እያፐ ቃር ኤክድ፥ እያ አፍላ እያ ማይዝድ ማስቃለ ቦላ እያ ካቃናዉ ኤፍዶሶና።

የሱሲ ካቀትስ

²¹ ኤንቲ ብሸ፥ እስክንድረነ ሩፎሳ አዋ፥ ስሞና ጌተትያ ቀሬና ቢታ አስ፥ ጋፃረፐ ካታማ የይሳራ ጋሄትድ፥ የሱሳ ማስቃልያ ዎልቃን ቶስዶሶና።

²² ያትድ ጎልጎታ ጌተትያ በሳ የሱሳ ኤፍዶሶና። “ጎልጎታ” ጉሳይ “ሁጰ ጉገ” ጉሱ።

²³ ሳኮይ ስኤቶና መላ ካርበራ ዋላከትዳ ዎይነ ኡዮ ግድ እያዉ እምዶሶና፤ ሽን እ ኡዮና እፅስ።

²⁴ ኤንቲ ማስቃለ ቦላ እያ ካቅዶሶና። ኦና አይብ ጋካኔኮ ግድ እያ አፍላ ሻክድ ሳማ የግዶሶና።

²⁵ ኤንቲ ማስቃለ ቦላ እያ ካቅያ ዎደ ዎንታፈ ሄ ሳተ።

²⁶ ኤንቲ፥ “አይሁደ ካዋ” ያግድ እያ ሞትያ ፁፈ ፃፍድ ዎዶሶና።

²⁷ የሱሳራ ናምኡ ፓንጋታ እሱዋ እያፐ ኡሻቻ ባጋራ ሀንኩዋ እያፐ ሀድርሳ ባጋራ ማስቃለ ቦላ ካቅዶሶና።

²⁸ ጌሻ ማፃፋይ፥ “ኢታባ ኦዳ አሳታራ እ ፓይደትስ” ጌተትዳይስ ፖለትስ።

²⁹ ኦገራ አያ አሳይ የሱሳ ካድ፥ ባንታ ሁጵያ ቃድ ጫይዶሶና፤ “ሄኮ! ፆሳ ኬ ላላዳ ሄ ጋላሳ ግዶን ኬፀይሶ፥ ነ ሁጵያ አሻ፤

³⁰ አነ ማስቃልያ ቦላፈ ዎ” ያግዶሶና።

³¹ ሄሳዳካ፥ ካህነ ሀላቃት ህግያ ታማርሰይሳታራ እስፈ የሱሳ ቶችድ፥ “ሀራታ አሽስ፥ ሽን ባና አሻናዉ ዳንዳኤና፤

³² ኑኒ በእድ አማናና መላ ክርስቶስ፥ እስራኤለ ካዎይ፥ አነ ማስቃለ ቦላፈ ሀእ ዎ” ያግዶሶና። ቃስ ሀር አቶሽን፥ እያራ ማስቃለ ቦላ ካቀትዳይሳትካ እያ ቶችዶሶና።

የሱሳ ሀይቁዋ

³³ ኡሱፑን ሳተፐ ዶምድ፥ ኡዱፉን ሳተ ጋካናዉ ቢታ ኡባይ ምስ።

³⁴ ኡዱፉን ሳተን የሱሲ፥ “ኤሎሄ፥ ኤሎሄ፥ ላማ ሳባቅታኒ?” ያግድ ዋስስ። ሄሳ ጉሳይ፥ “ታ ፆሳዉ፥ ታ ፆሳዉ፥ ታና አይስ አጋዲ?” ጉሱ።

³⁵ ሄሳን ኤቅዳ አሳፐ እሶይ እሶይ ሄሳ ስእድ፥ “ሄኮ፥ ኤልያሳ ፄጌስ” ያግስ።

³⁶ ሄ አሳፐ እሶይ ዎፅድ፥ እስፖንጀን ጫላ ዎይነ ኩንስ፤ ሄሳ ፃምአ ፄራን ዎድ፥ “ናግተ፤ ኤልያስ ማስቃለ ቦላፈ እያ ዎሳናዉ ያነኮ አነ በኦስ” ያግድ የሱሳ ዶናኮ ኡሻናዉ ሺሽስ።

³⁷ የሱሲ ባ ቃላ ቁ ኦ ዋስድ፥ ሀይቅስ።

³⁸ ፆሳ ኬን ካቀትዳ ማጋራጆይ ቆሞፈ ዱገ ጋካናዉ፥ ናምኡ ከይድ ዳከት ዎስ።

³⁹ ማስቃልያፐ ስን ባጋራ ያን ኤቅዳ እስ ማቶ ሀላቃይ፥ የሱሲ ዋንድ ሀይቅዳኮ በእዳ ዎደ፥ “ሀ ኡራይ ቱማ ፆሳ ናአ” ያግስ።

⁴⁰ ሄሳ ሃሆን ኤቅድ በእያ ጉ ማጫሳት ደኦሶና። ኤንታ ግዶን ማግደላ ማይራማ፥ ካሉዋ ያይቆባነ ዮሳ አይያ ማይራማነ ሳሎማ ደኦሶና።

⁴¹ ሄ ማጫሳት የሱሲ ጋልላን ደእያ ዎደ እያ ካልዳይሳታነ እያ ሞክዳይሳታ ቃስ የሱሳራ እስፈ የሩሳላመ ብዳ ሀራ ዳሮ ማጫሳት ያን ደኦሶና።

የሱሲ ሞገትስ

^42-43 ሳእ ኦማርስዳ ዎደ፥ ሺቅዳ አሳን ቦንቸትዳ አይሁደ ሻንጎታፐ እሶይ፥ ዮሰፋ ጌተትያ ኡራይ፥ ፆሳ ካዎተይ ያናይሳ ናግሸ ደኤይስ፥ አርማተ ካታማ አስ ደኤይስ ይስ። ዎንተ ሳምባታስ ጊገትያ ጋላስ ግድዳ ግሾ፥ ዮሰፍ ምንድ ጵላፆሳኮ ብድ፥ የሱሳ አሀ ኤካናዉ ዎስስ።

⁴⁴ ጵላፆስ፥ የሱሲ ሀይቅዳይሳ ስእዳ ዎደ ማላለትስ፤ ማቶ ሀላቃ ፄግድ፥ “እ ሀይቅድ ጋምእዴ?” ያግድ ኦይችስ።

⁴⁵ ጵላፆስ፥ የሱሲ ሀይቅዳይሳ ማቶ ሀላቃፐ ስእድ እያ አሀ ዮሰፋስ እሚስ።

⁴⁶ ዮሰፍ ሞጎ አፍላ ሻምስ፤ የሱሳ አሀ ማስቃልያፐ ዎድ፥ አፍላን ፃፅድ፥ ሹቻፈ ዎጨትዳ ዱፎን እያ አሀ ሞግስ። ቃስ ሄ ዱፉዋ ዶናን ግታ ሹቹ ጎንዶርስድ ዎስ።

⁴⁷ ማግደላ ማይራማነ ዮሳ አይያ ማይራማ የሱሳ አሀ ኤንቲ አዉን ዎያኮ በኦሶና።