Marqoosa 12 - ጌሻ ማፃፋ

ጎሻንቾታ ሌምሶ

¹ የሱሲ ኤንታዉ ሌምሶን ያግድ ኦድስ፦ “እስ ኡራይ ዎይነ ቶክድ፥ እያ ዩሾን ድርስ ድርስ። ቃስ ሄ ዎይነ ጉምእያ ኦላ ቦክስ። እያ ናጋናዉ አዱሳ ሻኮ ሻክስ። ሄሳፈ ጉየ፥ ኮ ኦያ አሳስ እምድ፥ ሀራ ቢታ ብስ።

² ዎይነ አይፍያ ማፅያ ዎደይ ጋክን፥ ባና ጋክያ ግሹዋ ኤሀና መላ፥ እስ ባ አይልያ ኮ አዋታኮ የድስ።

³ ኮ አዋት እያ አይልያ ኦይክድ ዋድ፥ መላ ኩሸ የድዶሶና።

⁴ ናምአን ሀራ አይለ ኤንታኮ ኪትን፥ ኤንቲ ሄ አይልያ ሁጵያ ቆእድ ካዉሽድ የድዶሶና።

⁵ ዎይነ አታክልትያ ጎዳይ ቃስካ ሀራ አይለ ኪትስ። ሄ አይልያ ዎዶሶና፥ ቃስ ሀራ ዳሮታ ሄሳዳ ኦዶሶና፥ እሶታ እሶታ ዋድ፥ ሀራታ ዎዶሶና።

⁶ “ዎይነ አታክልትያ ጎዳስ ኪታናዉ ኡባፈ ዉርሰን እ ዳሮ ዶስያ ባ ናኣ ፃላል አትስ። እ፥ ‘ኤንቲ ታ ናኣ ቦንቾና አጎኮና’ ግድ፥ ባ ናኣ ኤንታኮ ኪትስ።

⁷ “ሽን ኮ አዋት ባንታ ግዶን፥ ‘ላታናይስ ሀይሳ፤ የተ እያ ዎኦስ፤ እያ ላታይ ኑባ ግዳና!’ ያግዶሶና።

⁸ ናኣ ኦይክድ ዎድ፥ እያ አሀ ዎይነ ጋድያ ግዶፈ ጋፃ ከስድ የግዶሶና።

⁹ “ህዛ፥ ዎይነ ጋድያ ጎዳይ ዋታኔ? ይድ ሄ ኮ አዋታ ዎ ኦንግድ፥ ዎይንያ ኮ ኦያ ሀራ አሳስ እማና።

^10-11 “ ‘ግምበይሳት ቦርድ እፅዳ ሹቻይ ጎዳ ፃጱዋ ምንያ፥ ኡባፈ አያ ሹቹ ግድስ። ሀይስ ጎዳይ ኦዳባ፤ ቃስ ኑ አይፍያስካ ማላልስያባ’ ያገይሳ ጌሻ ማፃፋፐ ናባብበከቲ?” ያግስ።

¹² ካህነ ሀላቃት፥ ህገ አስታማረትነ ጭማት የሱሲ ሄ ሌምሱዋ ባንታ ቦላ ሌምስዳይሳ ኤርዳ ግሾ፥ እያ ኦይካናዉ ኮይዶሶና፥ ሽን አሳስ ያይድ፥ አግድ ብዶሶና።

ጊራባ

¹³ ቃስ እያ ኦዳፐ ባላ ደምድ፥ እያ ኦይካና መላ፥ ፋርሳወታፐነ ሄሮዲሳ ባጋታፐ ጉ አሳታ እያኮ ኪትዶሶና።

¹⁴ ኤንቲ እያኮ ይድ፥ “አስታማርያዉ፥ ኔኒ ቱማ ኦደተይሳነ አሳፐ አሰ ሻኮናይሳ ኑኒ ኤሮስ። ኔኒ አሰ ዱማያካ፤ ቃስ ፆሳ ኦግያ ቱማተን ታማርሳሳ። ኑኒ ሮመ ቢታ ካዋ ቄሳረስ ጊራ ጊረይስ ዎገየ ዎጋ ግደኔ? ጊራ ጊራነ አጋኔ?” ያግዶሶና።

¹⁵ ሽን የሱሲ ኤንታ ጩቦተ ኤርድ፥ “ታና አይስ ፓጨቲ? አነ እስ ሳንትመ ታና በስተ” ያግስ።

¹⁶ ኤንቲ እያዉ ኤህዶሶና፥ “ሀ ምስለይነ ሱንይ ኦደባዬ?” ያግድ ኤንታ ኦይችስ። ኤንቲ፥ “ሮመ ካዋ ቄሳረይሳ” ያግዶሶና።

¹⁷ የሱሲ ዛሪድ፥ “ያትኮ፥ ቄሳረባ ቄሳረስ፥ ፆሳባ ፆሳስ እምተ” ያግን ኤንቲ እያባ ማላለትዶሶና።

ሀይቆፐ ደንዶባ

¹⁸ ሀይቅዳ አስ ደንደና ግያ ሳዱቃወታፐ እስ እስ አሳት የሱሳኮ ይድ፥ ሀይሳዳ ያግድ፥ እያ ኦይችዶሶና።

¹⁹ “አስታማርያዉ፥ ሙሰይ ኑስ ህግያ ፃፍሸ፥ ‘ማቾ ኤክዳ አስ ናአ የሎና ሀይቅኮ፥ ሄ ሀይቅዳይሳ እሻይ እያ ማችዉ ኤክድ፥ ባ እሻስ ናአ የላናዉ በሴስ’ ያግስ።

²⁰ በን ዎደ ላፑን እሻት ደኤይሳታፐ ባይራይ ማቾ ኤክድ፥ ናአ የሎና ሀይቅስ።

²¹ ናምአንይ እዮ ኤክስ፥ እካ ናአ የሎና ሀይቅስ። ሄንይካ ሄሳዳ ሀንስ።

²² ላፑናትካ ሄሳ እዮ ኤክድ፥ ናአ የሎና ሀይቅዶሶና። ኡባፈ ጉየ፥ ቃስ ሄ ማጫስያ ሀይቃሱ።

²³ ያትን፥ ላፑናት እዮ ኤክዳ ግሾ ሀይቅዳ አሳይ ሀይቆፐ ደንድያ ጋላስ፥ እያ ኤንታፈ አዉሳስ ማቾ ግዳኔ?” ያግዶሶና።

²⁴ የሱሲ ዛሪድ፥ “ህንተ ባለተይ፥ ጌሻ ማፃፋታ ዎይኮ ፆሳ ዎልቃ ኤሮና ግሾሳ!

²⁵ ሀይቅዳ አሳይ ሀይቆፐ ደንድያ ጋላስ፥ ሳሎን ደእያ ኪታንቾታ መላ ግዳናፐ አትሽን፥ ኤኮኮና፤ ገለኮና።

²⁶ ሽን ሀይቅዳይሳታ ደንዱዋባ ግድኮ፥ ሙሰ ማፃፋን ፃፈትዳ ፁገትያ ቱሽያባ ኦድያ በሳን፥ ፆሳይ ሙሰኮ፥ ‘ታኒ፥ አብራሃመ ፆሳ፥ ይሳቃ ፆሳ፥ ያይቆባ ፆሳ’ ግዳይሳ ናባብበከቲ?

²⁷ ሄሳ ግሾ፥ እ፥ ፓፃ ደኤይሳታ ፆሳፈ አትሽን፥ ሀይቅዳይሳታ ፆሰ ግደና። ህንተ ዳሮ ባልደታ” ያግስ።

ኡባፈ ባይራ ኪታ

²⁸ ህገ አስታማረታፐ እሶይ ኤንቲ ፓላመይሳ ሺቅድ ስእስ። ቃስ የሱሲ ኤንታዉ ሎይ ዛርዳይሳ ስእድ፥ “ኪታ ኡባፈ አያ ኪታይ አዉሴ?” ያግድ የሱሳ ኦይችስ።

²⁹ የሱሲ ዛሪድ፥ እያ ሀይሳዳ ያግስ፦ “ኪታ ኡባፈ አያ ኪታ ስእተ፤ ‘እስራኤለ አሳዉ፥ ጎዳይ ኑ ፆሳይ እስ ጎዳ።

³⁰ ነ ጎዳ ነ ፆሳ ነ ኩመ ዎዛናፐ፥ ነ ኩመ ሸምፑዋፈ፥ ነ ኩመ ቆፋፐ፥ ነ ኩመ ዎልቃፈ ዶሳ’ ያጌስ።

³¹ ቃስ ኪታ ኡባፈ አያ ናምአን ኪታይ ሀይሳ፤ ‘አሰ ኡባ ነ ሁጵያዳ ዶሳ’ ያገይሳ፤ ሀይሳታፐ አያ ሀራ ኪት ባዋ” ያግስ።

³² ህገ አስታማረይ የሱሳኮ፥ “አስታማርያዉ፥ ቱማ ጋዳሳ፤ ኔኒ ‘ፆሳይ እስ ፆሳ ፃላላ። እያፐ አትሽን፥ ሀር ባዋ’ ግዳይስ ቱማ።

³³ ፆሳ ኩመ ዎዛናፐ፥ ኩመ ቆፋፐነ ኩመ ዎልቃፈ ዶሰይስነ ቃስ አሰ ኡባ ባ ሁጵያዳ ዶሰይስ፥ ፁሳ ያርሾፈነ ሀራ ያርሾ ኡባፈ አስ” ያግስ።

³⁴ የሱሲ ህገ አስታማርያ ዛሮይ አዳ ኤራንቾ አሳ ዛሮ ግድዳይሳ በእድ፥ “ኔኒ ፆሳ ካዎተፈ ሃካባካ” ያግስ፤ ሄሳፈ ጉየ፥ የሱሳ ሀራባ ኦይቻናዉ ኦንካ ምንቤና።

ክርስቶስ ኦደ ናኤ?

³⁵ የሱሲ ፆሳ ኬን ታማርስሸ፥ ሀይሳዳ ያግስ፦ “ህገ አስታማረት ክርስቶሳ ዎይግድ ዳዊታ ናአ ጎና?

³⁶ ዳዊቲ ጌሻ አያናን ኩምድ፥ “ ‘ጎዳይ፥ ታ ጎዳ፥ “ታኒ ነ ሞርከታ ነ ቶሆይ የያሶ ኦና ጋካናዉ፥ ሀይሳን ታፐ ኡሻቻ ባጋራ ኡታ” ግስ’ ያግስ።

³⁷ ዳዊቲ ባ ሁጰን ክርስቶሳ፥ ‘ጎዳ’ ግድ ፄግኮ፥ ያትን፥ ክርስቶስ ዋንድ፥ ዳዊታ ናአ ግድ?” ያግስ። ዳሮ አሳይ የሱሲ ገይሳ ኡፋይሳን ስእዶሶና።

ህገ አስታማረታነ ፋርሳወታ አየ!

³⁸ የሱሲ ታማርስሸ፥ ሀይሳዳ ያግስ፦ “ህገ አስታማረታፐ ናገትተ፤ ኤንቲ አዱሳ ማኦ ማእድ ዩየይሳነ ግያንካ አሳይ ኤንታ ቦንችድ ሳሮይሳ ዶሶሶና።

³⁹ ኤንቲ አይሁደ ዎሳ ኬታን ዳሮ ሎእያ ኦይድያ ዶሶሶና፤ ቃስ አስ ባንታና ሞክያ በሳን ቦንቾ በሲ ዶሶሶና።

⁴⁰ ኤንቲ አምኤታ ኬ ቦንቅድ፥ ባንታዉ ሎኦ ዳናናዉ ዎሳ አዱሶሶና፤ ኤንቲ ኡባፈ አያ ፕርዳ ኤካና” ያግስ።

አምኤ ሙፃታ

⁴¹ የሱሲ ፆሳ ኬን ሙፃታ የግያ ሳፅንያ ማታን ኡትድ፥ አሳይ ባ ሚሽያ ሄ ሳፅንያን የገይሳ በእስ፤ ዳሮ ዱረ አሳይ ዳሮ ሚሽያ ሄ ሳፅንያን የጎሶና።

⁴² እስ ማንቆ አምእያ ያዳ፥ ናምኡ ባካና ሄ ሳፅንያን የጋሱ።

⁴³ የሱሲ ባ ታማረታ ፄግድ፥ “ታኒ ህንተዉ ቱማ ኦዳይስ፤ ሙፃታ ሳፅንያን የግዳ አሳ ኡባፈ ሀ ማንቆ አምእያ ዳርሳዳ የጋሱ።

⁴⁴ አይስ ጊኮ፥ ሀራት ኡባይ ባንታዉ ፓላህዳ ሚሽያፐ የግዶሶና። ሽን እያ ባ ፓጫፐ፥ ባዉ ደእያ አቁዋ ኩመ እማሱ” ያግስ።