Marqoosa 11 - ጌሻ ማፃፋ

ግታ ቦንቾን የሩሳላመ ገሉዋ

¹ ኤንቲ የሩሳላመ ማትሸ፥ ሻማሆ ዙማ ማታን ደእያ ቤተፋገነ ብታነ ካታማታ ጋክዶሶና። የሱሲ ባ ታማረታፐ ናምአታ ስን ኪትድ፥

² “ህንተፈ ስንን ደእያ ጉታ ቢተ፤ ያ ገልዳ መላ ኦንካ ቶግቦና ቃሾን ደእያ ሀረ ማር ህንተ ደማና፥ እያ ብልድ፥ ሃ ኤክ ዪተ።

³ ኦንካ ህንተና፥ ‘ሀይሳ አይስ ኦቲ?’ ያግድ ኦይችኮ፥ ‘ጎዳይ እያ ኮዬስ፥ ኤለስድ ሃ የዳና’ ያግተ” ያግስ።

⁴ ኤንቲ ብድ፥ ሀረ ማር ካረ ቦላ ኦገ ማታን ቃሸትድ ደኤይሳ ደምድ ብልዶሶና።

⁵ ሄ በሳን ኤቅዳ እስ እስ አሳት ኤንታኮ፥ “ሀረ ማራ ዋታናዉ ብሌቲ?” ያግድ ኦይችዶሶና።

⁶ እያ ታማረት የሱሲ ባንታና ኪትዳይሳ ኦድን፥ አሳት የድ አግዶሶና።

⁷ ኤንቲ ሀረ ማራ የሱሳኮ ኤህድ፥ ባንታ ማኡዋ እያ ዞኮን ሂፅን የሱሲ ሄ ሀረ ማራ ቶግስ።

⁸ ዳሮ አሳይ ባንታ ማኡዋ ኦግያን ሂፅዶሶና፤ ቃስ ሀራት ም ታሸ ታሽድ፥ ኦገን ሂፅዶሶና።

⁹ የሱሳፐ ስንራ ሄመትያ አሳይነ እያ ካልያ አሳይ ባንታ ቃላ ቁ ኦድ፥ “ሆሳና! ፆሳይ ጋላተቶ! ጎዳ ሱንን የይስ አንጀትዳይሳ።

¹⁰ ጎዳ ሱንን ያ ኑ አዋ ዳዊታ ካዎተይ አንጀትዳይሳ። ኡባፈ ቦላ ሳሎን ደእያ ፆሳይ ጋላተቶ” ያግዶሶና።

¹¹ የሱሲ የሩሳላመ ብድ፥ ፆሳ ኬ ገልስ። ቃስ ኡባባ ዩይ ፄልዳፐ ጉየ፥ ሳእ ቃምያ ግሾ፥ ታማነ ናምኡ ታማረታራ ብታነ ካታማ ብስ።

የሱሲ ባድዳ ባላሰ ምዉ

¹² ዎንተ ጋላስ ኤንቲ ብታነፐ ከይድ ብሽን፥ የሱሲ ኮሻትስ።

¹³ ሃሆን እስ ባላሰ ምዉ ሀይ ፃላላ ማአ ኡትዳሮ በእድ፥ እ ቦላ አይፈይ በንትኮ ግድ፥ በአናዉ ኢኮ ብስ፥ ሽን ኢኮ እ ብያ ዎደ፥ ሀይ ፃላላፐ አትሽን፥ እስ አይፈካ ደምቤና፤ አይስ ጊኮ፥ ባላሰይ አይፍያ ዎደይ ጋክቤና።

¹⁴ የሱሲ ሄ ባላስዉ፥ “ህዛ፥ አስ ኔፐ መርናዉ አይፈ ሞፖ” ያግስ። እያ ታማረት እ ገይሳ ስእዶሶና።

ፆሳ ኬን ዛልኤይሳታ ከስስ

¹⁵ ኤንቲ የሩሳላመ ብዶሶና፤ የሱሲ ፆሳ ኬ ገልድ፥ ያን ባይዘይሳታነ ሻመይሳታ ካረ ጎዶ ኦይክስ፤ ቃስ ሚሸ ላመይሳታ ፃርጴዛነ ሆለ ባይዘይሳታ ኦይድያ ሽር የግድ፥

¹⁶ አስ አይብባካ ቶክድ፥ ፆሳ ኬ ግዶራ አና መላ ድግስ።

¹⁷ የሱሲ አሳ ሀይሳዳ ያግድ ታማርስስ፦ “ጌሻ ማፃፋን፥ ‘ታ ኬይ አስ ኡባይ ፆሳ ዎስያ ኬ ግዳና’ ጌተትድ ፃፈትስ። ሽን ህንተ እያ ፓንጋት ቆሰትያ ጎንጎሎ ኦደታ” ያግስ።

¹⁸ ካህነ ሀላቃትነ ህገ አስታማረት ሄሳ ስእድ፥ እያ ዎናዉ ኦገ ኮይዶሶና። ሽን ዳሮ አሳይ እያ ትምርትያን ማላለትያ ግሾ፥ እያዉ ባብዶሶና።

¹⁹ ሳአይ ኦማርስያ ዎደ የሱሲነ እያ ታማረት ካታማፐ ጋፃ ከይዶሶና።

ባላሰ ምያ መላሱ

²⁰ ኤንቲ ዎንተ ጋላስ ሄ ኦግያራ አሸ፥ ሄ ባላስያ ፃጶራ መልዳሮ በእዶሶና።

²¹ ጰፅሮስ አኬክድ፥ “አስታማርያዉ፥ ሄኮ፥ ኔኒ ባድዳ ባላስያ መላሱ” ያግስ።

²² የሱሲ ዛሪድ፥ “ፆሳ አማንተ።

²³ ታኒ ህንተዉ ቱማ ኦዳይስ፤ ኦንካ ባ ዎዛናን ስና ግዳባይ ሀናናይሳ አማንድ፥ ሀ ዙማ፥ ‘ደንዳዳ አባን ኩንዳ’ ያግኮ እያዉ ሀናና።

²⁴ ሄሳ ግሾ፥ ታኒ ህንተዉ ኦዳይስ፤ ፆሳ ህንተ ዎስያባነ ኦይችያባ አይባ ግድኮካ ኤክዳዳ አማንተ፥ ህንተ ኤካና።

²⁵ ፆሳ ዎሳናዉ ህንተ ኤቅያ ዎደ፥ ሳሎን ደእያ ህንተ አዋይ ህንተ ናጋራ አቶ ጋና መላ፥ ኦንካ ህንተና ናቅዳባይ ደእኮ፥ እያዉ አቶ ጊተ።

²⁶ ሽን አሳ ናጋራ ህንተ አቶ ጎና እፅኮ፥ ሳሎን ደእያ ህንተ አዋይካ ህንተ ናጋራ ህንተዉ አቶ ጌና” ያግስ።

የሱሳ ማታይ ኦይሸትስ

²⁷ ኤንቲ ዛሪድ የሩሳላመ ብዶሶና። የሱሲ ፆሳ ኬን ሄመትሽን፥ ካህነ ሀላቃት፥ ህገ አስታማረትነ ጭማት እያኮ ይድ፥

²⁸ “ኔኒ ሀይሳ ኦናዉ ነዉ አይ ማት ደኢ? ዎይኮ ነዉ ሀ ማታ እምዳይ ኦኔ?” ያግዶሶና።

²⁹ የሱሲ ዛሪድ፥ “ታ ህንተና እስባ ኦይቻና፥ ታዉ ኦድተ። ታ ቃስ ሀይሳ አይ ማታን ኦያኮ፥ ህንተዉ ኦዳና።

³⁰ ዮሃንሳ ፅንቃተይ ፆሳፈየ ዎይኮ አሳፔ? ታዉ ኦድተ” ያግስ።

³¹ ኤንቲ ባንታ ግዶን ፓላማ ዶምድ፥ “ኑኒ፥ ‘ፆሳፈ’ ጊኮ፥ እ ኑኮ፥ ‘ያትን፥ ዮሃንስ ኦድዳይሳ አይስ አማንበከቲ?’ ያጋና።

³² ‘አሳፐ ጊኮ’ አሳ ኡባይ ዮሃንስ ናበ ግደይሳ ኤሮሶና።” ሄሳ ግሾ፥ አሳስ ያይዶሶና።

³³ ሄሳ ግሾ፥ ኤንቲ የሱሳኮ፥ “ኑኒ ኤሮኮ” ያግድ ዛርዶሶና። የሱሲ፥ “ታንካ ሀይሳ አይ ማታን ኦያኮ፥ ህንተዉ ኦድከ” ያግስ።