Marqoosa 1 - ጌሻ ማፃፋ

ፃማቅያ ዮሃንስ ኦገ ፕተ

¹ ሀይስ ፆሳ ናአ የሱስ ክርስቶሳ ዎንገላ ዶመ።

² ናብያ እሳያስ ፃፍዳ ማፃፋን ፆሳይ፥ “ሄኮ፥ ታኒ ታ ኪታንቹዋ ታኒ ኔፐ ስን የዳና። እ ነ ኦግያ ጊግሳና።

³ እሶይ መላ ቢታን ባ ቃላ ቁ ኦድ፥ ‘ጎዳ ኦግያ ጊግስተ፤ እ ሄመታና ሆሮጋ እያዉ ሱርስተ ግስ’ ” ያጌስ።

⁴ ፃማቅያ ዮሃንስ አሳ ፃማቅሸ፥ “ህንተ ናጋራፐ ስሚድ ፃማቀትተ፤ ፆሳይ ህንተ ናጋራ አቶ ጋና” ያግድ ቃላ ኦድሸ መላ ቢታፈ ይስ።

⁵ ይሁዳ ቢታን ደእያ አሳ ኡባይነ የሩሳላመ ካታማ አሳ ኡባይ ዮሃንሳኮ ዮሶና። ባንታ ናጋራ ፓፅን፥ ዮሃንስ ኤንታ ዮርዳኖሰ ሻፋን ፃማቄስ።

⁶ ዮሃንስ ግማለ እክሰፐ ዳደትዳ አፍላ ማኤስ። ባ ፄሳን ዳፎ ዳንጬስ፤ ቃስ ቦለነ ደገራ ኤስ ሜስ።

⁷ ዮሃንስ ቃላ ኦድሸ፥ “ታፐ ጉየራ ዳሮ ምነይስ ዬስ። ሀር አቶሽን፥ ታኒ እያ ጫማ ዎዶሩዋ ሆካዳ ብላናዉ በስከ።

⁸ ታኒ ህንተና ሃን ፃማቃይስ፥ ሽን እ ህንተና ጌሻ አያናን ፃማቃና” ያግስ።

የሱሳ ፃማቀተነ ፓጨተ

⁹ የሱሲ ሄ ዎደ ጋልላ ቢታን ደእያ ናዝረተ ካታማፐ ይን፥ ዮሃንስ ዮርዳኖሰ ሻፋን እያ ፃማቅስ።

¹⁰ የሱሲ ሃፈ ከይያ ዎደ ሳሎይ ዶየትን፥ ጌሻ አያናይ ባ ቦላ ሆለዳ ዎሽን በእስ።

¹¹ ቃስ ሳሎፐ፥ “ታኒ ዶስያ ታ ናአይ ነና፤ ታ ነናን ኡፋይታይስ” ግያ ቃላይ ይስ።

¹² ኢራ ጌሻ አያናይ የሱሳ መላ ቢታ ኤፍስ።

¹³ የሱሲ መላ ቢታን ፃላሄን ፓጨትሸ ኦይታሙ ጋላስ ጋምእስ። ዶአታራ ደእስ፥ ሽን ኪታንቾት ይድ እያ ማድዶሶና።

የሱሲ ፄግዳ ኮይሮ ታማረታ

¹⁴ ዮሃንስ ቃሸትዳፐ ጉየ፥ የሱሲ ፆሳ ካዎተ ዎንገላ ኦድሸ ጋልላ ቢታ ብስ።

¹⁵ ያን፥ “ዎደይ ጋክስ፤ ፆሳ ካዎተይ ማታትስ። ህንተ ናጋራፐ ስሚድ፥ ዎንገላን አማንተ” ያግስ።

¹⁶ የሱሲ ጋልላ አባ ማታራ አሸ፥ ሞሎ ኦይክያ፥ ስሞናነ እያ እሻ እንድርያሳ፥ ባንታ ግትያ አባን የገይሳታ በእስ።

¹⁷ ኤንታኮ፥ “ታና ካልተ፤ ታኒ ህንተና አሰ ኦይ ታማርሳና” ያግስ።

¹⁸ ኤንቲ ኤለስድ ባንታ ግትያ የግ አግድ የሱሳ ካልዶሶና።

¹⁹ የሱሲ ጉ ስን ብድ፥ ናምኡ እሻታ ዛብድዮሳ ናይታ፥ ያይቆባነ ዮሃንሳ ዎጎሉዋ ግዶን ባንታ ግትያ ጊግሰይሳታ በእስ።

²⁰ እ ኤንታ በእዳ መላ ፄግስ። ኤንቲ ባንታ አዋ ዛብድዮሳ፥ እያ ኦሳንቾታራ ዎጎሉዋ ግዶን የግ አግድ የሱሳ ካልድ ብዶሶና።

ቱና አያን ኦይክዳ ኡራ

²¹ ኤንቲ ቅፍርናሆማ ካታማ ገልዶሶና። ሳምባት ገልዳ መላ የሱሲ ኤለስድ አይሁደ ዎሳ ኬ ገልድ ታማርሶ ኦይክስ።

²² ማታራ ደእያ አሳዳ ታማርሰስፐ አትሽን፥ ህገ አስታማረታ ታማርሶና ግሾ፥ አሳይ እያ ትምርትያን ማላለትዶሶና።

²³ ሄ ዎደ ቱና አያናይ ኦይክዳ እስ ኡራይ አይሁደ ዎሳ ኬ ገልድ ባ ቃላ ቁ ኦድ፥

²⁴ “ናዝረተ የሱሳ፥ ኔኒ ኑፐ አይ ኮያይ? ኑና ይሳናዉ ያዲ? ኔኒ ኦነኮ ታ ኤራይስ፤ ኔኒ ፆሳ ጌሻ ግድኪ?” ያግስ።

²⁵ የሱሲ ሄ ቱና አያና፥ “ሀይዛ፥ ሀ አድያፈ ከያ” ግድ ኪትስ።

²⁶ ቱና አያናይ ኡራ ዳፈረድ፥ ዋስድ እያፐ ከይስ።

²⁷ አሳ ኡባይ ማላለትድ፥ “ሀይስ አይቤ? ሀ ኡራይ ባ ማታን ሀር አቶሽን ቱና አያናታካ ኪቴስ። ኤንቲ እያዉ ኪተቶሶና፤ ሀይስ አይብ ኦራ ትምርቴ?” ግድ፥ ባንታ ግዶን እሶይ እሱዋ ኦይችዶሶና።

²⁸ የሱሳ ሱንይ ኤለስድ ጋልላ ቢታን ደእያ ሄራ ኡባን ከይስ።

ዳሮ ሀርጋንቾት ፓፅዶሶና

²⁹ የሱሲ አይሁደ ዎሳ ኬፈ ከይድ፥ ያይቆባራነ ዮሃንሳራ ስሞና ሶነ እንድርያሳ ሶ ብስ።

³⁰ ስሞና ማቸ አይያ ቆፆ ምሻ ሀርጋዳ ዝንእዳሮ የሱሲ ያ ጋክያ ዎደ እያዉ ኦድዶሶና።

³¹ እ ኢኮ ሺቅድ፥ እ ኩሽያ ኦይክድ፥ እዮ ደንድ ኤስስ። ቆፆይነ ምሻይ አግን እያ ኤንታ ሞካሱ።

³² ሀርግዳ አሳ ኡባነ ቱና አያናት ኦይክዳ አሳ ኡባ ኦማርስ አዋይ ዉልዳፐ ጉየ፥ እያኮ ኤህዶሶና።

³³ ካታማን ደእያ አሳ ኡባይ ሄ ኬ ካረ ሺቅዶሶና።

³⁴ የሱሲ ዱማ ዱማ ሀርገን ኦይከትዳ ዳሮ አሳ ፓድ፥ ዳሮ ቱና አያናታ ከስስ። እ ኦነኮ ቱና አያናት ኤርዳ ግሾ፥ ኤንታ ኦድሶና ድግስ።

የሱሲ ጋልላን ታማርሶ ዶመ

³⁵ የሱሲ ዎንታ ጉራ ደንድድ፥ አስ ባይና በሲ ብድ፥ ያን ፆሳ ዎስስ።

³⁶ ስሞንነ እያራ ደኤይሳት እያ ኮይሸ ብዶሶና።

³⁷ ኤንቲ እያ ደምድ፥ “አሳ ኡባይ ነና ኮዬስ” ያግዶሶና።

³⁸ የሱሲ ቃስ ኤንታ፥ “ሄ ሄራን ደእያ ሀራ ካታማታ የተ። ታኒ ይዳይ ዎንገላ ኦዳናዉ ግድያ ግሾ ያንካ ቃላ ኦዳናዉ በሴስ” ያግስ።

³⁹ አይሁደ ዎሳ ኬታን ቃላ ኦድሸነ ቱና አያናታ ከስሸ፥ ጋልላ ቢታ ኡባን ዩይስ።

ባሮ ሀርጋንቹዋ

⁴⁰ ባሮይ ኦይክዳ እስ ኡራይ የሱሳኮ ይድ፥ እያ ስንን ጉልባትድ፥ “ኔኒ ኮይኮ ታና ጌሻናዉ ዳንዳኣሳ” ያግድ ዎስስ።

⁴¹ የሱሲ እያዉ ቃትድ፥ ባ ኩሽያ የድድ እያ ቦችድ፥ “ታኒ ኮያይስ፥ ጌይያ” ያግስ።

⁴² ኤለስድ ባሮይ ኡራ የድን ኡራይ ፓፅስ።

⁴³ የሱሲ ኡራ ምን ናግስድ ከስ የድስ።

⁴⁴ የሱሲ እያ፥ “ነና ኤራ፥ ሀይሳ ኦደስካ ኦዶፓ። ሽን ባዳ ነ አሳተ ካህነ በሳ። ኔኒ ሀእ ጌሽ ግድዳይሳ አሳ ኤርሳናዉ፥ ሙሰይ ኪትዳ ያርሹዋ ያርሻ” ያግስ።

⁴⁵ ሽን ኡራይ ብድ፥ ጉታ ኡባን አሳ ኡባስ ኦድስ። ሄሳ ግሾ፥ የሱሲ ቆንጨ ከይድ፥ ካታማ ገላናዉ ዳንዳእቤና። ሽን አስ ባይና በሳን ጋፃን ደእስ፤ ቃስ አሳይ ኡባ በሳፈ እያኮ ዮሶና።