Maatosa 8 - ጌሻ ማፃፋ

ባሮ ሀርጋንቾይ ፓፅስ

¹ የሱሲ ዙማፐ ዎያ ዎደ ዳሮ አሳይ እያ ካልዶሶና።

² ሄኮ እስ ባሮ ሀርጋንቾይ እያኮ ሺቅድ፥ እያ ስንን ጉልባትድ፥ “ጎዳዉ፥ ነ ሸነ ግድኮ ታና ጌሻዳ ፓናዉ ዳንዳኣሳ” ያግስ።

³ የሱሲ ባ ኩሽያ የድድ እያ ቦችድ፥ “ኤ፥ ታ ሸነ፥ ፓፃ” ያግስ። ኡራይ ኢራካ ጌይ አግስ።

⁴ የሱሲ እያኮ፥ “ነ ፓፁዋ ኦደስካ ኦዶፓ። ሽን ባዳ ነ ጌያዳ ፓፆይሳ ካህነ በሳ። ነ ፓፁዋስ ማርካ ግዳና መላ ባዳ ሙሰይ ኪትዳ ያርሹዋ ያርሻ” ያግስ።

ማቶ ሀላቃ አማኖ

⁵ የሱሲ ቅፍርናሆማ ካታማ ጋክዳ ዎደ፥ እስ ማቶ ሀላቃይ እያኮ ሺቅድ፥

⁶ “ጎዳዉ፥ ታ አይለይ አሳተይ ጉንድን ዳሮ ሀርገትድ፥ ሶን ዝንእድ ደኤስ” ያግድ ዎስስ።

⁷ የሱሲ ዛሪድ፥ “ታኒ ባዳ እያ ፓና” ያግስ።

⁸ ሽን ማቶ ሀላቃይ ዛሪድ፥ “ጎዳዉ፥ ነ ታ ሶ ገላናዉ በሲያ አስ ግድከ፥ ሽን ነ ሀን ኡታዳ ቃላ ፃላላ ኦዳ፥ ታ አይለይ ፓፃና።

⁹ አይስ ጊኮ፥ ታፐ ቦላራ ታና ኪትያ አሳት ደኦሶና፥ ቃስ ታፐ ጋርሳራ ታዉ ኪተተይሳት ደኦሶና። ኤንታፈ እሱዋ፥ ‘ባ’ ግያደ ቤስ፤ ሀንኩዋ ቃስ ‘ሃያ!’ ግያደ ዬስ። ታ አይልያ፥ ‘ሀይሳ ኦ’ ግያደ ኦስ” ያግስ።

¹⁰ የሱሲ ሄሳ ስእዳ ዎደ ማላለትድ፥ ባና ካልያ አሳኮ፥ “ታ ህንተዉ ቱማ ኦዳይስ፤ ታኒ ሀይሳ መላ አማኖ እስራኤለ አሳንካ በአብከ።

¹¹ ታ ህንተዉ ኦዳይስ፤ ዳሮት ዶሎሀፐነ ዉሎሀፐ ይድ፥ ሳሎ ካዎተን አብራሃመራ፥ ይሳቃራነ ያይቆባራ እስፈ እማቶ ቦላ ኡታና።

¹² ሽን ሳሎ ካዎተ ላታናዉ በስሽን አትዳይሳት ካረ ማን ሆለታና። ያን ኤንታዉ ዬሆነ አቻ ጋርጨ ግዳና” ያግስ።

¹³ የሱሲ ማቶ ሀላቃኮ፥ “ነ ሶ ባ፥ ነ አማኑዋ ነዉ ሀኖ” ያግስ። እያ አይለይ ኢራካ ፓፅ አግስ።

የሱሲ ዳሮ ሀርጋንቾታ ፓስ

¹⁴ የሱሲ ጰፅሮሳ ሶ ገልያ ዎደ፥ ጰፅሮሳ ማቸ አይያ ቆፆ ምሻ ሀርገን ሳከታዳ ዝንእዳሮ በእስ።

¹⁵ የሱሲ እ ኩሽያ ቦችዳ ዎደ ቆፆይነ ምሻይ አጋግስ። ፓፃ ደንዳዳ እያ ሞካሱ።

¹⁶ ሄ ዎደ ኦማርስ ቱና አያናን ኦይከትዳ ዳሮ አሳታ፥ አሳይ የሱሳኮ ኤህዶሶና። እካ ቱና አያናታ ባ ቃላን ከስስ፥ ሀርጋንቾታ ኡባ ፓስ።

¹⁷ ሄሳንካ ናብያ እሳያስ፥ “እ ኑ ሀርግያ ባዉ ኤክስ፥ ኑ ዳቡራ ቶክስ” ግዳ ቃላይ ፖለትስ።

የሱሳ ካሎይ ጭግስያ ጋተ

¹⁸ የሱሲ ዳሮ አሳይ እያ ዩሹዋን ኤቅዳይሳ በእድ፥ አባፈ ሄፍን ፕናና መላ ባ ታማረታ ኪትስ።

¹⁹ ህገ አስታማረታፐ እሶይ፥ “አስታማርያዉ፥ ነ ብያ በሳ ኡባ ታ ካላና” ያግስ።

²⁰ የሱሲ እያኮ “ዎርካናታስ ኦል ደኤስ፥ ሳሎ ካፎታስ ኬ ደኤስ። ሽን አሳ ናኣስ ባ ሁጵያ ሸምፕስያ በሲ ባዋ” ያግስ።

²¹ የሱሳ ካልያ አሳታፐ እሶይ፥ “ጎዳዉ፥ ታኒ ስንታ ባዳ ታ አዋ ሞጋዳ ያና” ያግስ።

²² ሽን የሱሲ፥ “ሀይቅዳይሳት ባንታ ሀይቆታ ሞጎ፤ ኔኒ ታና ካላ” ያግስ።

የሱሲ ሆቢያ ሴርስ

²³ የሱሲ ባናዉ ዎጎሉዋን ገልዳ ዎደ፥ እያ ታማረትካ እያራ ባናዉ ገልዶሶና።

²⁴ ኤንቲ ቆፖና ደእሽን፥ ዎልቃማ ሆበይ ሃ ቦላ ደንድን ዎጎሎይ ምተታናዉ ጋክስ። ሽን የሱሲ ስክስ።

²⁵ እያ ታማረት እያኮ ሺቅድ እያ ባርከድ፥ “ጎዳዉ፥ ኑ ዮስ ኑና አሻርክ” ያግዶሶና።

²⁶ የሱሲ ኤንታኮ፥ “ህንተኖ፥ አማኖይ ፓጭዳይሳቶ፥ አይስ ያየቲ?” ያግስ። ደንድድ፥ ሆቢያነ ጎትያ ኤስስ። ኤለስድ ኡባባይ ስእ ግስ።

²⁷ እያ ታማረት ማላለትድ፥ “ሀይስ፥ ሀር አቶሽን፥ ሆበይነ ጎተይ ኪተተይስ ዋንዳ አሴ?” ያግዶሶና።

ቱና አያን ኦይክዳ ናምኡ አሳታ

²⁸ የሱሲ አባፈ ሄፍንን ደእያ ገርገሶነ ቢታ ጋክዳ ዎደ ቱና አያናይ ኦይክዳ ናምኡ አሳት ዱፎፐ ከይድ እያራ ጋሄትዶሶና። ኤንቲ ዳሮ ኢታነ ያሽያ አሳታ ግድያ ግሾ አስ ሄ በሳራ አናዉ ዳንዳኤና።

²⁹ ኤንትካ፥ “ፆሳ ናአዉ፥ ኑናነ ነና አይበ ጋይ? ዎደይ ጋኮና ደእሽን ኑና ፕርዳናዉ ያዲ?” ግድ ዋስዶሶና።

³⁰ ኤንታፈ ዳሮ ሃኮና ጉዱን ዉደይ ሄመቴስ።

³¹ ቱና አያናት የሱሳ፥ “ነ ኑና ከሳናባ ግድኮ፥ ህን ጉዱን ዉድያ ግዶ የዳርክ” ያግድ ዎስዶሶና።

³² የሱሲ፥ “ቢተ” ያግስ። ቱና አያናት አሳታፐ ከይድ ጉዱንታን ገልዶሶና። ጉዱንት ኡባይ አፎ ዶናራ ድርግድ ብድ አባን ምተትድ ሀይቅዶሶና።

³³ ጉዱን ዉድያ ሄመይሳት ባቃትድ ካታማ ብድ፥ ሀንዳባነ ቱና አያናይ ኦይክዳ አሳታ ቦላ ኦሰትዳባ ኡባ ኦድዶሶና።

³⁴ ያትን፥ ካታማን ደእያ አሳ ኡባይ የሱሳ በአናዉ ከይዶሶና። ኤንቲ የሱሳ በእዳ ዎደ ባንታ ቢታፈ ከይድ ባና መላ ዎስዶሶና።