Luqaasa 8 - ጌሻ ማፃፋ

¹ ሄሳፈ ጉየ፥ የሱሲ ፆሳ ካዎተ ዎንገላ ሳባክሸ ካታማራነ ጉታራ አስ። ሄ ዎደ ታማነ ናምኡ ሀዋረት እያራ ደኦሶና።

² ቃስ ቱና አያናፐነ ዱማ ዱማ ሀርግያፈ ፓፅዳ እስ እስ ማጫሳት እያራ ደኦሶና። ኤንትካ፥ ላፑን ቱና አያናት ከይዳ ማግደላ ማይራሞ፥

³ ሄሮዲሳ ሹማ ኩዛ ማችዉ ዮሃና፥ ሶስናራነ ቃስ ሀራ ዳሮት ኤንታና ሚሸን ማደይሳት ደኦሶና።

ዘረ ዘርያ ኡራ ሌምሶ

⁴ ዳሮ አሳይ ዱማ ዱማ ካታማፐ እያኮ ሺቅን ሌምሶን ኤንታዉ ኦድስ።

⁵ “እስ ጎሻንቾይ ዘረ ዘራናዉ ከይስ። እ ዘርሽን እስ እስ ዘረይ ኦገ ጋፃን ዎድ የትስ፥ ሳሎ ካፎት ማፅዶሶና።

⁶ ሀራት ሻሎይ ጋርሳን ደእያ ቢታ ቦላ ዎዶሶና። ቡሮ ዶልዳ መላ ቢታን ላሆይ ባይና ግሾ ምጭዶሶና።

⁷ ሀራ ዘረይ ቃስ አጉን ግዶን ዎስ። አጉንራ ዎላ ድጭዳ ግሾ አጉንይ ጩልድ በሳን አሽስ።

⁸ ሀራት ሎኦ ቢታ ቦላ ዎዶሶና። ዶልዳ ዎደ ፄቱ ኩሸ አይፍዶሶና።” ሄሳ ኦድ ኦንግድ፥ ባ ቃላ ቁ ኦድ፥ “ስእያ ሀይ ደእያ ኡባይ ስኦ” ያግስ።

⁹ እያ ታማረት፥ “ሀ ሌምሱዋ ብርሸይ አይቤ?” ያግድ ኦይችዶሶና

¹⁰ እ፥ “ፆሳ ካዎተ ፁራ ኤራና መላ ህንተዉ እመትስ። ሽን ሀራት በእሸ ደሞና መላ፥ ስእሸ አኬኮና መላ ሌምሶን ኦዳይስ።

¹¹ “ህዛ፥ ሀ ሌምሱዋ ብርሸይ ሀይሳ፦ ዘረ ያገትዳይ ፆሳ ቃላ።

¹² ኦገ ጋፃን ዎዳ ዘረይ ቃላ ስኤይሳታ። ግዶሽን፥ ኤንቲ አማንድ አቶና መላ ፃላሄይ ቃላ ኤንታ ዎዛናፐ ማፅ ድጌስ።

¹³ ሻሎይ ጋርሳን ደእያ ቢታ ቦላ ዎዳ ዘረይ ቃላ ስእድ ኡፋይሳን ኤከይሳታ። ኤንቲ ሀእስ አማኖሶናፐ አትሽን፥ ፃጶይ ባይና ግሾ ፓጨይ ጋክያ ዎደ ኤለስድ ካዶሶና።

¹⁴ አጉን ግዶን ዘረትዳ ዘረይ ቃላ ስኤይሳታ። ኤንትካ አላምያ ቆፋን፥ ዱረተንነ ሳአ ዱሳ ሚኮተን ጩለትድ በሰይሳዳ አይፍቦኮና።

¹⁵ ሎኦ ቢታን ዎዳ ዘረይ ሎኦ ዎዛናን ቃላ ስእድ ናገይሳታነ ዳንዳአን ምንድ አይፈ አይፈይሳታ።

¹⁶ “ፆምፐ ኦይድ፥ ዳቾ ካመይ ዎይኮ አርሳፈ ጋርሳን ዎይ ዴና። ገልያ አስ በአና መላ ቃ በሳን ዎስ።

¹⁷ “ሄሳ ግሾ፥ ቆንጨ ከዮና ቆሰትድ አትያባይ፥ ኤረቶና ጌምድ አትያባይ ዴና።

¹⁸ “ህዛ፥ ህንተ ቃላ ዋት ስእያኮ አኬክተ። ደእያ ኡባስ ጉዠትድ እመታና፥ ባይናይሳስ ሀር አቶሽን እያዉ ደእያ ጉያካ እያፐ ኤከታና” ያግስ።

የሱሳ አየራነ እሻታራ

¹⁹ የሱሳ አየራነ እሻታራ እያኮ ይዶሶና። ሽን አሳ ዳሮተፈ ደንዶይሳን እያ ደማናዉ ዳንዳእቦኮና።

²⁰ እስ አስ የሱሳኮ፥ “ነ አየራነ ነ እሻታራ ነና ኮይድ ካረን ናጎሶና” ያግስ።

²¹ የሱሲ ዛሪድ፥ “ፆሳ ቃላ ስእድ ኦሶን ፔሸይሳት ኡባይ፥ ታዉ አዮነ ታዉ እሻ” ያግስ።

የሱሲ ሆቢያ ሴርስ

²² እስ ጋላስ የሱሳራነ እያ ታማረታራ እስፈ ዎጎሎን ገልድ፥ “አባ ፕኖስ” ያግስ። ኤንትካ ባናዉ ደንድዶሶና።

²³ አባ ቦላራ ኤንቲ ፕናናዉ ብሽን የሱሲ ስክስ። ቆፖና ምኖ ጫርኮይ አባ ቦላ ደንድስ። ሃ ዎጎሉዋን ገልን ዎጎሎይ ምተተ ኦይክያ ዎደ ኡባይ ባብዶሶና።

²⁴ እያ ታማረት እያኮ ሺቅድ፥ “ጎዳዉ! ጎዳዉ! ኑ ዮስ” ያግድ የሱሳ ደንዶሶና። የሱሲ ደንድድ ጫርኩዋነ ጎትያ ሀንቅስ። ኤለስድ ጫርኮይነ ጎተይ ዎፑ ግስ፤ ሳሮተ ስምስ።

²⁵ የሱሲ ባ ታማረታኮ፥ “ህንተ አማኖይ አዉኔ?” ያግስ። ኤንትካ፥ ያይሸነ ማላለትሸ እሶይ እሱዋኮ፥ “ጫርኮይነ ሃይ ኪተተይስ፥ እ ሀይስ ኦኔ” ያግዶሶና።

ቱና አያን እያፐ ከይዳ ኡራ

²⁶ አባ ፕንድ ጋልላ ባጋራ ደእያ ገርገሶነ ቢታ ጋክዶሶና።

²⁷ የሱሲ ዎጎሎፐ ከይድ ሳአን ዎሽን ቱና አያናን ኦይከትዳ ኡራይ ካታማፐ ከይድ እያራ ጋሄትስ። ዳሮ ላይ ማኦ ማኦና ካሎ ዱፎን ደኤስፐ አትሽን፥ ሶ ገለና።

²⁸ የሱሳ በእዳ ዎደ እያ ስንን ጉፋንድ፥ ባ ቃላ ቁ ኦድ፥ “ኡባፈ ቦላ ፆሳ ናአዉ የሱሳ ኔራ ታዉ አይብ እስፈተ ደኢ? ሀያና ታና ሀእ ኡንኤፋርክ” ያግስ።

²⁹ ሄሳ እ ግዳይ፥ ቱና አያናይ ኡራፐ ከያና መላ የሱሲ ሀንቅዳ ግሾሳ። ዳሮ ዎደ ቱና አያናይ እያ ሃርዳ ግሾ ሳንላታንነ ቶሆ ቃችያ ብራታን ቃሸትድ ናገቴስ። ሽን ቃሹዋ ዱድ ቱና አያናን ላገትድ መላ ቢታ ገልስ።

³⁰ የሱሲ፥ “ነ ሱንይ ኦነ” ያግድ ኦይችስ። እ፥ ዳሮ ቱና አያናት እያ ኦይክዳ ግሾ ባና፥ “ሌግዮና” ግስ።

³¹ ቱና አያናት ባንታና ስኦለ ኪቶና መላ ዎስዶሶና።

³² ሄ በሳን ዞዘ ቦላ ምያ ጉዱን ዉደይ ሄመቴስ። ህን ጉዱንታን ገልኖ ግድ ዎስዶሶና፥ እካ “ገልተ” ግስ።

³³ ቱና አያናት ኡራፐ ከይድ ጉዱንታን ገልዶሶና። ዉደይ ደርያፐ ዱገ ጉርጉፅድ አባን ገልስ።

³⁴ ሄንንቾት ሀንዳይሳ በእዳ ዎደ ዎፅ ብድ፥ ካታማንነ ጉታ ኡባን ኦድዶሶና።

³⁵ አሳይ ሀንዳባ በአናዉ ከይድ የሱሳኮ ይዶሶና። ቱና አያናይ ከይዳ ኡራይ ማኦ ማእድ፥ እያ ዎዛናይ ስምን፥ የሱሳ ቶሆ ማታን ኡትዳይሳ ደምድ ያይዶሶና።

³⁶ እያ በእዳ አሳይ ቱና አያናን ኦይከትዳ ኡራይ ዋንድ ፓፅዳኮ ኦድዶሶና።

³⁷ ገርገሶነ ዩሾን ደእያ አሳይ ግታ ያሽ ያይድ፥ የሱሲ ባንታ ማታፐ ባና መላ ዎስዶሶና። እ ዎጎሉዋን ገልድ ጉየ ስምስ።

³⁸ ቱና አያናይ ከይዳ ኡራይ የሱሳራ ዳናዉ ዎስስ።

³⁹ ሽን የሱሲ እያኮ፥ “ነ ሶ ስማ፥ ፆሳይ አይ መላ ግታባ ነዉ ኦዳኮ ኦዳ” ያግድ ሞይዝስ። ኡራይካ የሱሲ አይ መላ ግታባ እያዉ ኦዳኮ ካታማ ኡባን ማርካትሸ ብስ።

ሀይቅዳ ናእዉነ ሀርገትያ ማጫስዉ

⁴⁰ አሳይ ናግድ ጋምእዳ ግሾ የሱሲ ስምያ ዎደ ሞክ ኤክዶሶና።

⁴¹ አይሁደ ዎሳ ኬ ሀላቃ ግድዳ እያሮሳ ጌተትያ ኡራይ ባ ሶ ያና መላ የሱሳ ቶሁዋ ቦላ ዎድ ዎስስ።

⁴² እያዉ ታማነ ናምኡ ላይ ግድዳ ማጫ ናእ ሳከታዳ ሀይቆስ ጋካዳ ደአዉሱ። የሱሲ ብያ ዎደ አሳይ እያ ኡንኤስ።

⁴³ ታማነ ናምኡ ላይ ሱ ጎግሸ ጋምእዳ ማጫስ ደአዉሱ። እያ ባዉ ደእያ ሚሽያ አክመታስ እማዳ ኦንጋሱ። ሽን ፓፃናዉ ዳንዳአቡኩ።

⁴⁴ እያ የሱሳስ ጉየ ባጋራ ሺቃዳ፥ እያ አፍላ ማጫራ ቦቻሱ፥ ኢራካ ጎግያ ሱይ ኤቅ አግስ።

⁴⁵ የሱሲ፥ “ታና ቦችዳይ ኦኔ?” ያግስ። ኡባይ፥ “ኑ ቦችቦኮ” ያግን፥ ጰፅሮስ፥ “አስታማርያዉ፥ ዳሮ አሳይ ካልሽንነ ኡንኤሽን በአሸ ዋናዳ፥ ‘ታና ቦችዳይ ኦኔ?’ ጋይ” ያግስ።

⁴⁶ ሽን የሱሲ፥ “እስ አስ ታና ቦችስ፤ አይስ ጊኮ፥ ዎልቅ ታፐ ከዮይስ ታዉ ኤረትስ” ያግስ።

⁴⁷ ማጫስያ፥ እባይ ቆንጭዳይሳ ኤርዳ ዎደ ኮኮራሸ ያዳ የሱሳ ቶሁዋ ቦላ ኩንዳሱ። አይስ ቦችዳኮነ ዋናዳ ኤለሳዳ ፓፅዳኮ አሳ ኡባ ስንን ማርካታሱ።

⁴⁸ እ፥ “ታ ናተ፥ ነ አማኖይ ነና ፓስ፤ ሳሮ ባ” ያግስ።

⁴⁹ የሱሲ ኦዳ ኦንጎና ደእሽን፥ አይሁደ ዎሳ ኬ ሀላቃ፥ እያሮሳ ሶፐ እስ አስ ይድ፥ “እያሮሳ፥ ነ ናእያ ሀይቃሱ፤ አስታማርያ መላ ዳቡርሶፋ” ያግስ።

⁵⁰ ሽን የሱሲ ሄሳ ስእድ እያሮሳኮ፥ “ባቦፋ! አማና፥ ነ ናእያ ፓፃና” ያግስ።

⁵¹ የሱሲ እያሮሳ ሶ ጋክዳ ዎደ ጰፅሮሳፐ፥ ዮሃንሳፐ፥ ያይቆባፐ፥ ናኤ አዋፐነ አየፐ አትሽን፥ ሀር ገላና መላ ኮይቤና።

⁵² ሄ በሳን ደእያ አሳ ኡባይ ናኤስ ምሸትድ ዬክሽን፥ የሱሲ፥ “ዬኮፍተ ናእያ ስካሱፐ አትሽን፥ ሀይቃቡኩ” ያግስ።

⁵³ አሳይ ናእያ ሀይቅዳይሳ ኤርያ ግሾ፥ እያ ኦዳ ለቅድ ሚጭዶሶና።

⁵⁴ ሽን የሱሲ ናኤ ኩሽያ ኦይክድ፥ “ናተ ደንዳ” ያግስ።

⁵⁵ ናኤስ ሸምፖይ ስምን ደንዳ ኤቃሱ። የሱሲ ኤንታኮ፥ “እዉ ምያባ እምተ” ያግስ።

⁵⁶ ናኤ አዋራነ አየራ ማላለትዶሶና። ሽን የሱሲ ሀይሳ፥ “ኦደስካ ኦዶፕተ” ያግስ።