Luqaasa 7 - ጌሻ ማፃፋ

ማቶ ሀላቃ አማኖ

¹ የሱሲ ሄሳ ኡባ አሳ ስንን ታማርስድ ኦንግዳፐ ጉየ፥ ቅፍርናሆማ ካታማ ብስ።

² ሄ በሳን እስ ማቶ ሀላቃይ ደኤስ። እ ዳሮ ዶስያ አይለይ ሀርገትድ ሀይቆስ ጋክስ።

³ እ የሱሳባ ስእዳ ዎደ ባ አይልያ ፓና መላ እያ ዎሶ ግድ እስ እስ አይሁደ ጭማታ የሱሳኮ ኪትስ።

⁴ ኪተትዳይሳት፥ የሱሳኮ ብድ፥ “ነ እያዉ ሀይሳ ኦናዉ በሴስ።

⁵ አይስ ጊኮ፥ ሀ ኡራይ ኑ አሳ ዶሴስ፥ አይሁደ ዎሳ ኬካ ኬፅስ” ግድ ምን ዎስዶሶና

⁶ የሱሲካ ኤንታራ ብስ። ማቶ ሀላቃ ሶኮ ማትያ ዎደ ባ ላገታ እያኮ ኪትድ፥ “ጎዳዉ፥ ታ ካራፐ ጋርሳን ነ ገላናዉ ታ በሶና ግሾ፥ ዳቡሮፓ።

⁷ ታካ ታና ነ ስን ሺቃናዉ በሲያ አስ ጋዳ ቆፕከ። ሽን ነ እስ ቃላ ኦዳ፤ ታ አይለይ ፓፃና።

⁸ ታዉ ታፐ ቦላራ ሀላቃይ ደኤስ፥ ታፐ ጋርሳን ታ ኪትያ ዎታዳረት ደኦሶና። እሱዋ፥ ‘ባ’ ጊኮ ቤስ፥ ሀንኩዋ፥ ‘ሃያ’ ጊኮ ዬስ። ታ አይልያኮ፥ ‘ሀኖ ኦ’ ጊኮ ኦስ” ያግስ።

⁹ የሱሲ ሄሳ ስእዳ ዎደ ማላለትስ። ጉየ ስሚድ ባራ ያ አሳኮ፥ “ታኒ ህንተዉ ቱማ ኦዳይስ፤ ሀር አቶሽን እስራኤለንካ ሀይሳ መላ ግታ አማኖ ደማብከ” ያግስ።

¹⁰ ኪተትዳ አሳት ሶ ስምያ ዎደ አይለይ ፓፅን ደምዶሶና።

አምኤ ናአ

¹¹ ጉ ዎደፐ ጉየ የሱሲ ናይነ ካታማ ብስ። እያ ታማረታራነ ሀራ ዳሮ አሳት እያራ ብዶሶና።

¹² እ ካታማ ገላና ሀንያ ዎደ አሀ ቶክዳ ዳሮ አሳት ካታማፐ ከዮሶና። ሀይቅዳ ናአይ ባ አየስ እሱዋ፥ እያካ አምኦ ግዳዳ ደአዉሱ። ካታማ አሳፐ ዳሮት ኢራ ደኦሶና።

¹³ ጎዳይ እዮ በእዳ ዎደ ቃትድ፥ “ዬኮፋ” ያግስ።

¹⁴ ሺቅድ ሀላ ቦችን ቶክዳ አሳት ኤቅዶሶና። የሱሲ፥ “ላ፥ ያላጋዉ ደንዳ” ያግስ።

¹⁵ ሀይቅዳይስ ደንድ ኡትድ ኦዳ ኦይክስ። የሱሲ ናኣ ኤክድ አየስ እሚስ።

¹⁶ አሳ ኡባይ ያሸትድ፥ “ግታ ናበይ ኑ ግዶን ደንድስ፤ ፆሳይ ባ አሳ በእስ” ያግድ ፆሳ ጋላትዶሶና።

¹⁷ እያ ሱንይ ይሁዳንነ ሄ ሄራን ደእያ ቢታ ኡባን ስኤትስ።

የሱሳነ ፃማቅያ ዮሃንሳ

¹⁸ ፃማቅያ ዮሃንሳ ታማረት ሄሳ ኡባ ዮሃንሳስ ኦድዶሶና። እ ኤንታ ግዶፈ ናምአታ ፄግድ፥

¹⁹ “ያና ጌተትዳይ ነነዬ? ዎይኮ ሀራ ናግኖ?” ያግድ ኦይችተ ግድ ጎዳኮ ኪትስ።

²⁰ አሳት “የሱሳኮ ብድ፥ ፃማቅያ ዮሃንስ፥ ‘ያና ጌተትዳይ ነነዬ? ዎይኮ ሀራ ናግኖ?’ ጊተ ግድ ኑና ኔኮ ኪትስ” ያግዶሶና።

²¹ ሄ ሳተንካ የሱሲ ዳሮ አሳ ሀርግያፈ ፓስ። ቱና አያናታ ከስስ፥ ቆቅዳ አይፍያካ ፄልስስ።

²² ዮሃንሳ ማታፐ ኪተትድ ይዳይሳታኮ፥ “ብድ ህንተ በእዳይሳነ ስእዳይሳ ዮሃንሳስ ኦድተ። አይፈ ቆቀት ፄሎሶና፥ ጉንዳት ብርሸትድ ሄመቶሶና፥ ባሮ ሀርጋንቾት ጌዮሶና፥ ቱለት ስኦሶና፥ ሀይቅዳይሳት ሀይቆፐ ደንዶሶና፥ ማንቆታስ ዎንገላይ ሳባከቴስ።

²³ ታናን በቶና ኦንካ አንጀትዳይሳ።”

²⁴ ዮሃንስ ኪትዳይሳት ብዳፐ ጉየ የሱሲ አሳስ ዮሃንሳባ ያግድ ኦድስ፦ “ህንተ አይ በአናዉ መላ ቢታ ከይደቲ? ጫርኮይ ቃያ ማታ በአናሰዬ?

²⁵ ያትን፥ አይ በአናዉ ከይደቲ? ኮይሰ ማኦ ማእዳ አሳ በአናሰዬ? ኮይሰ ማኦ ማእዳይሳትነ ሳእ እንጀትዳ አሳይ ካዎ ጋን ደኦሶና።

²⁶ ያትን፥ አይ በአናዉ ከይደቲ? ናብያ በአናሰዬ? ኤ፥ ታ ያጋይስ፦ ህንተ በአናዉ ከይዳይ ናበፐ አይሳ።

²⁷ “ ‘ነ ኦግያ ነ ስንን ጊግስያ ታ ኪታንቹዋ ኔፐ ስን ታ ኪታና’ ጌተትድ ፃፈትዳይ እያሳ።

²⁸ ታ ህንተዉ ኦዳይስ፤ ማጫሳፐ የለትዳይሳታ ግዶፈ ዮሃንሳፐ አይ ባዋ። ፆሳ ካዎተን ኡባፈ ጉፀይስ፥ እ ኡባፈ ግታ ግዳና” ያግስ።

²⁹ ሀር አቶሽን፥ የሱሳ ቃላ ስእዳ ቃራፃ ቃንፅሰይሳት ኡባይ ዮሃንሳ ኩሸን ፃማቀትድ ፆሳይ ፅሎ ግደይሳ ቆንጭስዶሶና።

³⁰ ሽን ፋርሳወትነ ህገ አስታማረት ዮሃንሳ ኩሸን ፃማቀቶና እፅድ ፆሳ ዞርያ ለቅስዶሶና።

³¹ የሱሲ ካልድ ሀይሳዳ ያግስ፦ “ህዛ፥ ሀ ዎድያ የለተ አይብራ ዳንሶ? ኤንትካ ኦና ዳኖና?

³² ግያ ግዶን ኡትድ ዎል ፄግድ፥ ‘ኑ ህንተዉ ሱሱልኤ ፑንን፥ ህንተ የፀከታ። ኑ ሳቢድ ዘሌልን፥ ህንተ ዬከከታ’ ግያ ናይታ ዳኖሶና።

³³ ፃማቅያ ዮሃንስ ሞናነ ኡዮና ይን፥ ‘ኢታ አያናራ ደኤስ ግደታ።’

³⁴ አሳ ናአይ ምሸነ ኡይሸ ይን፥ ‘ያራምባነ ኡሻንቾ፥ ቃራፃ ቃንፅሰይሳታነ ናጋራንቾታ ዳቦ’ ግደታ።

³⁵ ህዛ፥ ጭንጫተ ቱማተይ እያ ናይታ ኡባ ማታን ኤረትስ” ያግስ።

የሱሳ ሽቶ ትይዳ እስ ማጫስዉ

³⁶ እስ ፋርሳወይ የሱሳ ካ ሙዛናዉ ባ ሶ ፄግስ። እ ፋርሳውያ ሶ ብድ ጋይታ ቦላ ኡትስ።

³⁷ ሄ ካታማን እስ ናጋራንቾ ማጫስ፥ የሱሲ ፋርሳውያ ሶን ግብራ ቦላ ደኤይሳ ስእዳ ዎደ ዳሮ አልኦ ጵልቃፀ ሽቶ ኤካዳ ያሱ።

³⁸ የሱሳፐ ጉየ ባጋራ፥ እያ ቶሁዋ ማታን ኤቃዳ ዬካሸ እያ ቶሁዋ ባ አፉራ ላኮዉሱ። ባ ብናናራ እያ ቶሁዋ ቁቻሸነ ዬራሸ ሽቶ ትያሱ።

³⁹ ግብራ ጊግስዳ ፋርሳወይ ሄሳ በእዳ ዎደ ባ ዎዛናን፥ “ሀይስ ናበ ግድያኮ ሀ ማጫስያ፥ እያ ቦችያራ ኦነኮ ቃስ እያ ናጋራንቾ ግደይሳካ እ ኤራናሽን” ያግስ።

⁴⁰ የሱሲ፥ “ስሞና፥ ታ ነዉ ኦድያባይ ደኤስ” ያግስ። እ፥ “አስታማርያዉ፥ ታዉ ኦዳ” ያግስ።

⁴¹ የሱሲ እያኮ፥ “ናምኡ አሳት እስ ኡራፐ ሚሸ ታልእዶሶና። እሶይ እቻሹ ፄቱ ብራ ሀንኮይ ቃስ እሻታሙ ብራ ታልእዶሶና።

⁴² ናምአይካ ታልእያ ጭጋናዉ ፆነትን፥ ናምአታስካ ታልእያ ማርስ። ህዛ፥ ሀ ናምአታፐ ሄ ኡራ ዳሮ ዶሳናይ ነዉ ኦና ዳን” ያግስ።

⁴³ ስሞን፥ “ዳሮ አጮይ ማረትዳ ኡራይ ዳሮ ዶሳና ዳኔስ” ያግስ። የሱሲ፥ “ነ ቱማ ፕርዳዳሳ” ያግስ።

⁴⁴ ሄሳፈ ጉየ፥ የሱሲ ማጫሴኮ ስም ፄልድ፥ ስሞናኮ፥ “ሀኖ ማጫስዉ በአይ? ታኒ ነ ሶ ገልን ሀር አትሽን፥ ነ ታዉ ቶሆ ሃ እማባካ፥ ሽን እያ ታ ቶሁዋ ባ አፉን ላኮዳ ባ ብናናን ቁቻሱ።

⁴⁵ ኔኒ ታና ዬራ ኤካባካ፥ ሽን እያ ታ ነ ሶ ገሎሳፐ ዶማዳ ታ ቶሁዋ ዬሮ አጋቡኩ።

⁴⁶ ኔኒ ታ ሁጵያን ዛይተ ትያባካ፥ ሽን እያ ታ ቶሁዋ ሽቶ ትያዉሱ።

⁴⁷ እያ ታና ዳሮ ዶስዳ ግሾ፥ እ ዳሮ ናጋራይ አቶ ጌተትስ። ጉ ናጋር አቶ ጌተትዳ ኡራይ ጉራ ዶሴስ።”

⁴⁸ የሱሲ ማጫሴኮ፥ “ነ ናጋራይ አቶ ጌተትስ” ያግስ።

⁴⁹ እያራ እስፈ ጋይታን ኡትድ ምያ እማት፥ “ናጋራ አቶ ያገይ፥ እ ሀይስ ኦኔ?” ያግድ ባንታ ዎዛናን ቆፕዶሶና።

⁵⁰ የሱሲ ማጫሴኮ፥ “ነ አማኖይ ነና አሽስ፤ ሳሮ ባ” ያግስ።