Luqaasa 6 - ጌሻ ማፃፋ

ሳምባታ ቦንቻናዉ በሲ?

¹ እስ ሳምባታ ጋላስ የሱሲ ግስተ ጋደ ግዶራ አስ። የሱሳ ታማረት ትያ ባንጋ ዱድ ባንታ ኩሸን ሽርክድ ሞሶና።

² ሽን ፋርሳወታ ግዶፈ እሶት እሶት፥ “ሳምባታ ጋላስ ኦናዉ በሶናባ አይስ ኦቲ?” ያግዶሶና።

³ የሱሲ ኤንታኮ ዛሪድ፥ “ዳዊቲ ኮሻትዳ ዎደ ባራ ደኤይሳታራ እስፈ ኦይሳ ናባብበከቲ?

⁴ ፆሳ ኬ ገልድ አይሁደ ካህነታ ፃላላስ በሲያ ዳቡዋ ምስ፤ ባራ ደኤይሳታስካ እሚስ” ያግስ።

⁵ ቃስ የሱሲ፥ “አሳ ናአይ ሳምባታ ጎዳ” ያግስ።

⁶ ሀራ ሳምባታ ጋላስ የሱሲ አይሁደ ዎሳ ኬ ገልድ ታማርሴስ። ሄ በሳን ኡሻቻ ኩሸይ ስልዳ እስ አስ ደኤስ።

⁷ ህገ አስታማረትነ ፋርሳወት እያ ሞታናዉ ጋሶ ኮይድ ሳምባታ ጋላስ ፓኮ በአና ግድ ናጎሶና።

⁸ ሽን የሱሲ ኤንታ ቆፋ ኤርድ ኩሸይ ስልዳ ኡራኮ፥ “ደንዳዳ አሳ ግዶን ኤቃ” ያግስ። ኡራይካ ደንድ ኤቅስ።

⁹ የሱሲ፥ “አነ ታ ህንተና እስባ ኦይቻይስ፤ ሳምባታ ጋላስ ኦናዉ በሰይ ሎኦባየየ ኢታባዬ? ሸምፖ አሾየ ዎይኮ ይሶ?” ያግስ።

¹⁰ ቃስ የሱሲ እያ ዩሹዋን ደእያ አሳ ዩሽ ፄልድ ኡራኮ፥ “ነ ኩሽያ ፕድ ኦ” ያግስ። ኡራይካ እ ግዳይሳዳ ኦን ኩሸይ ፓፅስ።

¹¹ ሽን ህገ አስታማረትነ ፋርሳወት ዳሮ ይሎትዶሶና። የሱሳ ቦላ አይ ኦኖ ግድ ባንታ ግዶን ማቀትዶሶና።

ታማነ ናምኡ ሀዋረታ

¹² ሄ ዎደ ጋላሳታፐ እሱዋን የሱሲ ዎሳናዉ ዙማ ቦላ ከይስ። ቃማ ኩመ ዎስሸ አቅስ።

¹³ ዎንተ ባ ታማረታ ፄግድ ኤንታ ግዶፈ ታማነ ናምአታ ዶርድ፥ ኤንታና፥ “ሀዋረታ” ግድ ሱንስ።

¹⁴ ኤንትካ፥ ጰፅሮሳ ግድ ሱንዳ ስሞና፥ እያ እሻ እንድርያሳ፥ ያይቆባ፥ ዮሃንሳ፥ ፍልጶሳ፥ ባርተለሞሳ፥

¹⁵ ማቶሳ፥ ቶማሳ፥ እልፍዮሳ ናኣ ያይቆባ፥ ባ ቢታስ ምሸትያ ስሞና፥

¹⁶ ያይቆባ ናኣ ይሁዳነ የሱሳ አድ እምዳ አስቆሮታ ይሁዳ።

¹⁷ የሱሲ ኤንታራ እስፈ ዙማፐ ዎድ ደምባ በሳን ኤቅስ። እያ ታማረታፐ ዳሮት ሄ በሳን ደኦሶና። ይሁዳ ቢታ ኡባፈ የሩሳላመፐ፥ ፅሮሳፐነ ስዶና አባ ጋፃፐ ይዳ ዳሮ አሳይ ደኤስ።

¹⁸ ኤንቲ ይዳይ፥ እ ታማርስያባ ስአናዉነ ባንታ ሀርግያፈ ፓፃናሳ። ቱና አያናን ዋየትያ አሳትካ ፓፅዶሶና።

¹⁹ ዎልቅ እያፐ ከይድ አሳ ኡባ ፓያ ግሾ አሳይ እያ ቦቻናዉ ኮዮሶና።

²⁰ ባ ታማረታ ፄልድ ሀይሳዳ ያግስ፦ “ህንተኖ፥ ማንቆቶ፥ ህንተ አንጀትዳይሳታ፤ ፆሳ ካዎተይ ህንተሳ።

²¹ ህንተ ሀእ ኮሻተይሳት አንጀትዳይሳታ፥ ህንተ ካላና። ህንተ ሀእ ዬከይሳት አንጀትዳይሳታ ህንተ ሚጫና።

²² አሳይ ህንተና አሳ ናኣ ግሾ፥ እፅያ ዎደ፥ ህንተና ህልያ ዎደ፥ ህንተና ኤንቲ ቶችያ ዎደነ፥ ኢታ ሱን ኤንቲ ህንተዉ እምያ ዎደ ህንተ አንጀትዳይሳታ።

²³ “ሄኮ፥ ህንተ ዎይቶይ ሳሎን ግታ ግድያ ግሾ ሄ ዎደ ኡፋይሳን ጉፕተ። አይስ ጊኮ፥ በን ኤንታ አዋት ናበታ ቦላ ሄሳዳ ኦዶሶና።”

²⁴ “ሽን ዱረቶ ህንተና አየ! ህንተ ሀእ ሎኦ ዱሳ ኤክደታ።

²⁵ ሀእ ካልዳይሳቶ ህንተና አየ! ህንተ ኮሻታና። ሀእ ሚጨይሳቶ ህንተኖሾ ህንተ ካዮታናነ ዬካና።

²⁶ አስ ኡባይ ህንተ ሎኦተ ፃላላ ኦድያ ዎደ ህንተና አየ! ኤንታ አዋት በን ዎርዳንቾ ናበታ ቦላ ሄሳዳ ኦዶሶና።

ህንተ ሞርከታ ዶስተ

²⁷ “ሽን ታና ስእያ ህንተዉ ታ ኦዳይስ፤ ህንተ ሞርከታ ዶስተ፤ ህንተና እፀይሳታስ ሎኦባ ኦተ።

²⁸ ህንተና ባደይሳታ አንጅተ፥ ህንተና ናቀይሳታስ ዎስተ።

²⁹ እስ ባጋ ሻካላ ባቀይሳስ ሀንኮ ባጋ በሳ። ነ ላፃና ኤካና ገይሳስ ነ ሻምዝያ ጉጃዳ እማ።

³⁰ ነና ዎስያ ኡባስ እማ፤ ኔፐ ኤክዳ ኦናካ ዛሮ ጋዳ ኦይቾፋ።

³¹ አሳይ ህንተዉ ኦና መላ ህንተ ኮያባ ኡባ ህንተካ አሳስ ኦተ።

³² “ህንተ፥ ህንተና ዶስያ አሳታ ፃላላ ዶስኮ፥ አይ ጋላት ህንተዉ ደኢ? ሀር አቶሽን፥ ናጋራንቾትካ ባንታና ዶሰይሳታ ዶሶሶና።

³³ ህንተዉ ሎኦባ ኦይሳታ ፃላላስ ሎኦባ ኦኮ ህንተዉ አይ ጋላት ደኢ? ናጋራንቾትካ ሄሳዳ ኦሶና።

³⁴ ታልኤ ዛራና አሳ ፃላላስ ህንተ ታልእኮ አይ ዱማ ጋላተተቲ? ናጋራንቾትካ ጉየ ዛራና አስ በእድ ታልኦሶና።”

ሀራ አሳ ቦላ ፕርዶፋ

³⁵ “ሽን ህንተ ሞርከታ ዶስተ፤ ኤንታዉ ሎኦባ ኦተ። ጉየ ኤካናዉ ቆፖና ታልእተ። ሄሳን ህንተ ኤካና ዎይቶይ ግታ ግዳና። ህንተ ኡባፈ ቦላ ፆሳ ናይታ ግዳና። እ ባና ጋላቶናይሳታስነ ኢታታስ ኬሀ።

³⁶ ህንተ አዋይ ኬሀ ግዶይሳዳ ህንተካ ኬሀ ግድተ።

³⁷ “አሳ ቦላ ፕርዶፍተ፤ ህንተ ቦላ ፕርደተና። ህንተ ቦረቶና መላ ኦናካ ቦሮፕተ። አቶ ጊተ፤ ፆሳይ ህንተዉ አቶ ጋና።

³⁸ እምተ፤ ህንተዉ እመታና። ህንተ ማክዳባን ህንተዉ ዛር ማከታና፥ ኡባራካ ሎኦ ማክያባን ባቅድ፥ ሱድ ኩንድ፥ ላለታና ጋካናዉ ህንተዉ ማከት እመታና” ያግስ።

³⁹ ቃስካ የሱሲ ያግድ ኤንታዉ ሌምሶ ኦድስ፤ “ቆቀይ ቆቀ ካለናዉ ዳንዳኢ? ካለኮ ናምአይካ ዎል ኤክድ አፎን ዉሎኮናዬ?

⁴⁰ ታማረይ አስታማረፐ አና። ሽን ሎይ ታማርዳ ኡራይ ባ አስታማርያ ሀኔስ።

⁴¹ “ነ እሻ አይፈን ደእያ ቡርያ አይስ በአይ? ነ አይፈን ደእያ ቱሱ ዳነይሳ አይስ በእኪ?

⁴² ነ አይፈን ደእያ ቱሱ ዳነይሳ በኦና ነ እሻኮ፥ ‘ታ እሻዉ፥ ነ አይፈን ደእያ ቡርያ ከሶ’ ጋናዉ ዋና ዳንዳኤይ? ነኖ ጩቡዋዉ፥ ኮይሮታዳ ነ አይፈን ደእያ ቱሱ ዳነይሳ ከሳ። ሄሳፈ ጉየ፥ ነ እሻ አይፈን ደእያ ቡርያ ከሳናዉ ጌሻዳ ፄላና።

ምነ እያ አይፈ

⁴³ “ሎኦ ም ኢታ አይፈ አይፈና፤ ሄሳዳካ ኢታ ም ሎኦ አይፈ አይፈና።

⁴⁴ አይፈ አይፍያ ም ኡባይ ባ አይፈን ኤረቴስ። አጉንፈ ባላሰ አይፈይ ማፀተና ቃስ ላደፐ ዎይነ አይፈይ ማፀተና።

⁴⁵ ሎኦ አስ ባ ዎዛናን ኩምዳ ሎኦባፐ ሎኦባ ከሴስ። ኢታ አስ ባ ዎዛናን ኩምዳ ኢታባፐ ኢታባ ከሴስ። አስ ባ ዎዛናን ኩምድ ፓላህዳባፐ ባ ዶናን ኦደቴስ።

ኬ ኬፅያ ናምኡ አሳታ

⁴⁶ “ታ ገይሳ ኦከታ፥ ሽን ያትን አይስ ታና፥ ‘ጎዳዉ፥ ጎዳዉ፥ ጌቲ?’

⁴⁷ ታኮ የይነ ታ ቃላ ስእድ ፖልያ ኡባይ ኦና ዳንያኮ ታ ህንተና በሳና።

⁴⁸ እ ኬ ኬፃናዉ ዝቅ ኦ፥ ኦላ ቦክድ፥ ጋርሳን ደእያ ዛላ ቦላ ኬ ኤስዳ ጭንጫ ኡራ ዳኔስ። ድኦይ ድእድ ሄ ኬ ሱግስ፥ ሽን ምንድ ኬፅዳ ግሾ፥ ቃፃናዉ ዳንዳእቤና።

⁴⁹ ሽን ታ ቃላ ስእድ ኦናይ ባ ኬ ሻፈ ቦላ ኬፅዳ ኡራ ዳኔስ። ድኦይ ድእድ ሄ ኬ ሱግዳ ዎደ ኤለስድ ኩንድስ። ሄ ኬይ ዎልቃማ ኩንደ ኩንድስ” ያግስ።