Luqaasa 5 - ጌሻ ማፃፋ

ኮይሮ ታማረታ ፄገ

¹ እስ ጋላስ የሱሲ ገንሳሬፀ አባ ማታን ኤቅዳሽን ዳሮ አሳይ እያ ዩሹዋ ኡንኤድ፥ እ ታማርስያ ፆሳ ቃላ ስኦሶና።

² ያን ሃ ጋፃን ደእያ ናምኡ ዎጎሎታ በእስ። ሞሎ ኦይክያ አሳት ዎጎሎታፐ ዎድ ባንታ ግትያ ሜጮሶና።

³ ሄ ዎጎሎታፐ ስሞናይሳን ገልድ ቢታፈ ጉ ግዶ ሺሻና መላ ኦይችስ። ያትድ፥ ሄ ዎጎሉዋ ቦላ ኡትድ አሳ ታማርስስ።

⁴ ባ ትምርትያ ኦንግዳፐ ጉየ ስሞናኮ፥ “ገደ ጪሙዋኮ ሺሻዳ ሞሉዋ ኦይካናዉ ህንተ ግትያ የግተ” ያግስ።

⁵ ስሞን ዛሪድ፥ “አስታማርያዉ፥ ቃማ ኩመ ዳቡርሸ አቅድ አይኮካ ኦይክቦኮ፥ ሽን ነ ጊኮ ግትያ የጋና” ያግስ።

⁶ ኤንቲ ግትያ የግዳ ዎደ ግተይ ዳከታና ጋካናዉ ዳሮ ሞሎ ኦይክዶሶና።

⁷ ሀራ ዎጎሎን ደእያ ባንታ ላገት ይድ፥ ባንታና ማዳና መላ ዉትድ ፄግዶሶና። ኤንቲ ይድ ናምኡ ዎጎሎት፥ ሃን ምተታና ጋካናዉ ሞሎን ኩንዶሶና።

⁸ ስሞን ጰፅሮስ ሄሳ በእዳ ዎደ፥ የሱሳ ስንን ኩንድድ፥ “ጎዳዉ፥ ታኒ ናጋራንቾ አስ ግድያ ግሾ፥ ታፐ ሻከታ” ያግስ።

⁹ እ ሄሳ ግዳይ፥ እነ እያራ ደኤይሳት ኦይክዳ ሞሉዋ ዳሮተን ማላለትዳ ግሾሳ።

¹⁰ ቃስ ስሞና ላገ ግድዳ ዛብድዮሳ ናይት ያይቆባራነ ዮሃንሳራ ማላለትዶሶና። የሱሲ ስሞናኮ፥ “ባቦፋ! ህዛፐ ኔኒ አሰ ኦይክያ አስ ግዳና” ያግስ።

¹¹ ኤንቲ ዎጎሎታ ጋፃ ሺሽዳፐ ጉየ ኡባ አግድ የሱሳ ካልዶሶና።

ባሮ ሀርጋንቾይ ፓፅስ

¹² የሱሲ ካታማታፐ እሱዋን ደእሽን እስ ባሮ ሀርገን ኦይከትዳ አስ ሄ ካታማን ደኤስ። ሄ ኡራይ የሱሳ በእድ እያ ስንን ጉፋንድ፥ “ጎዳዉ፥ ነ ሸነ ግድኮ ታና ጌሻናዉ ዳንዳኣሳ” ግድ ዎስስ።

¹³ የሱሲ ባ ኩሽያ የድ ቦችድ፥ “ኤ፥ ታ ሸነ፤ ጌይያ” ያግስ። ኢራ ባሮ ሀርገይ ኡራፐ ክችስ።

¹⁴ የሱሲ፥ “ሀይሳ ኦደስካ ኦዶፓ፥ ሽን ባዳ ነናተ አይሁደ ካህነ በሳ። ነ ጌይዳይሳስ ማርካ ግዳና መላ ሙሰይ ኪትዳ ያርሾ ያርሻ” ግድ ኪትስ።

¹⁵ ግዶሽን፥ እያ ሱንይ ካሰፐ አድ ኤረትሸ ብስ። ዳሮ አሳይ እ ኦድያባ ስአናዉነ ባንታ ሀርግያፈ ፓፃናዉ ዮሶና።

¹⁶ ሽን የሱሲ ዳሮ ዎደ ጌማ በሲ ብድ ዎሴስ።

ጉንዳ ኡራ

¹⁷ እስ ጋላስ የሱሲ ታማርስሽን ጋልላፐነ ይሁዳ ሄራ ኡባፈ ቃስ የሩሳላመፐ ይዳ ፋርሳወትነ ህገ አስታማረት ያን ኡትዶሶና። አሳ ፓያ ጎዳ ዎልቃይካ እያራ ደኤስ።

¹⁸ ሄ ዎደ አሳይ እስ ጉንዳ አስ ሀላራ ቶክድ ኤህዶሶና። ሶ ገልስድ እያ ስንን ዎናዉ ቆፕዶሶና።

¹⁹ ሽን አሳ ዳሮተፈ ደንዶይሳን ሶ ገልሳናዉ ፆነትድ ኬ ቦላ ከይድ፥ ካራ ቃዉፅድ፥ ሀርጋንቹዋ ሀላራ አሳ ሻክድ የሱሳ ስንን የግዶሶና።

²⁰ የሱሲ ኤንታ አማኑዋ በእድ፥ “ላ አድያዉ፥ ነ ናጋራይ አቶ ጌተትስ” ያግስ።

²¹ ህገ አስታማረትነ ፋርሳወት፥ “ሀይስ ፆሳ ቦላ ያግድ ኦደተይ ኦኔ? እስ ፆሳፈ አትሽን፥ ሀር ናጋራ አቶ ጋናዉ ዳንዳኤይ ኦኔ?” ያግድ ቆፕዶሶና።

²² የሱሲ ኤንታ ቆፋ ኤርዳ ግሾ ኤንታኮ፥ “ህንተ ዎዛናን ሄሳ አይስ ቆፔቲ?

²³ ‘ነ ናጋራይ ቁሸትስ ገይሳፈነ ደንዳዳ ባ ገይሳፈ አዉስ ካዉዪ?’

²⁴ ሽን ታ ሄሳ ግዳይ አሳ ናእ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላሳ።” ሄሳፈ ካልድ፥ ጉንዳ ኡራኮ፥ “ደንዳ፤ ነ አልጋ ቶካዳ ነ ሶ ባ” ያግስ።

²⁵ እ ኤለስ ደንድድ ኤንታ ስንን ኤቅስ፤ እ ቶከትድ ይዳ አልጋ ቶክድ ፆሳ ጋላትሸ ባ ሶ ብስ።

²⁶ ሄ ዎደ ኡባይካ ማላለትዶሶና። ፆሳ ጋላትሸ፥ “ሀች ግታ ማላታ በእዳ” ያግድ ያሸትዶሶና።

ሌወ ፄገተ

²⁷ ሄሳፈ ጉየ፥ የሱሲ ያፐ ከይድ ብስ። ሌወ ጌተትያ እስ ቃራፃ ቃንፅሰይስ ቃራፃ ቃንፅስያ በሳን ኡትዳይሳ በእድ፥ “ታና ካላ” ያግስ።

²⁸ እ ኡባባ አግድ፥ ደንድድ እያ ካልስ።

²⁹ ሄ ሌወይ ባ ሶን ግታ ግብራ ጊግስስ። ዳሮ ቃራፃ ቃንፅሰይሳትነ ሀራ አሳት ካ ቦላ ኡትዶሶና።

³⁰ ፋርሳወትነ ህገ አስታማረት፥ “ቃራፃ ቃንፀይሳታራነ ናጋራንቾታራ አይስ ሜትነ ኡዬቲ?” ያግድ የሱሳ ታማረታ ቦላ ዙዙምዶሶና።

³¹ የሱሲ ኤንታኮ፥ “ሀርጋንቾታሳፈ አትሽን፥ ፓፃታስ አክመ ኮሸና።

³² ታኒ ናጋራንቾታ ማሮታኮ ዛራናሳፈ አትሽን፥ ጌሻታ ፄጋናዉ ያቢከ” ያግድ ዛርስ።

³³ ኤንቲ የሱሳኮ፥ “ዮሃንሳ ታማረት ዳሮ ዎደ ፆሞሶና፥ ዎሶሶና፤ ቃስ ፋርሳወታ ታማረትካ ሄሳ ኦሶና። ሽን ነይሳት ኡባ ዎደ ሞሶናነ ኡዮሶና” ያግዶሶና።

³⁴ የሱሲ ኤንታኮ፥ “ማችዉ ኤከይስ ኤንታራ ደእሽን ፄገትዳ አሳይ ፆማና መላ ኦናዉ ዳንዳኤቲ?

³⁵ ሽን ሙሹራይ ኤንታፈ ሻከታና ጋላሳይ ያና፥ ሄ ዎደ ኤንቲ ፆማና።”

³⁶ ቃስ ያግድ ሌምሶ ኦድስ፤ “ኦራ ማኦፐ ፔድ ጋልአ ማኦ ቦላ ስከይ ኦንካ ባዋ። ሄሳ ኦኮ ኦራ ማኡዋ ፔስ፥ ኦራይ ጋልኣስ ጊገና።

³⁷ ማልአንቶ ዎይነ ጋልአ ኦጎሮን ቆልያ ኦንካ ባዋ። ሄሳ ኦኮ፥ ኦራ ዎይነይ ጋልአ ኦጎሩዋ ሴስ፤ ዎይነይ ጉኬስ ኦጎሮይካ ማዶናባ ግዴስ።

³⁸ ሄሳ ግሾ፥ ኦራ ዎይነይ ኦራ ኦጎሮን ቆለታናዉ በሴስ።

³⁹ ህዛ፥ ጫላይ ሎኦ ግያ ግሾ፥ ጫላ ዎይነ ኡይ ስሚድ ማልአንቶ ኮየይ ኦንካ ባዋ” ያግስ።