Luqaasa 24 - ጌሻ ማፃፋ

የሱሳ ሀይቆፐ ደንዱዋ

¹ ሳምንታፈ ኮይሮ ጋላስ፥ ዎጋ ዎደ ዎንታ ዳሮ ጉራ፥ ማጫሳት ባንታ ጊግስዳ ሽቱዋ ኤክድ ዱፉዋ ብዶሶና።

² ኤንቲ ያ ጋክያ ዎደ ዱፉዋ ዶናን ደእያ ሹቻይ ጎንደረትድ ክቾይሳ ደምዶሶና።

³ ኤንቲ ዱፉዋ ጋ ገልዶሶና፥ ሽን ጎዳ የሱሳ አሀ ደምቦኮና።

⁴ ኤንቲ ያን ኤቅድ አይብ ሀንደ ግድ ቆፕሽን አኬኮና ዳሮ ጶልያ አፍላ ማእዳ ናምኡ አሳት ኤንታ ማታን ኤቅዶሶና።

⁵ ማጫሳት ያሸትድ ባንታ ሁጵያ ሳአን ዝቅ ኦድ ደእሽን፥ አሳት ኤንታኮ፥ “ደኦን ደኤይሳ ሀይቆታ ግዶን አይስ ኮዬቲ?

^6-7 እ ሀይሳን ዴና፤ ሀይቆፐ ደንድስ፥ ‘አሳ ናአይ ናጋራንቾታ ኩሸን አድ እመታና፤ ኤንትካ እያ ካቃና። እ ሄን ቃማን ሀይቆፐ ደንዳና’ ያግድ፥ እ ህንተራ ጋልላን ደእሸ ህንተዉ ኦድዳ ቃላ ቆፕተ” ያግስ።

⁸ ማጫሳት ሄ ዎደ እያ ቃላ ቆፕዶሶና።

⁹ ማጫሳት ዱፉዋፐ ስሚድ ሀንዳባ ኡባ ታማነ እሶታስነ ሀራታስካ ኦድዶሶና።

¹⁰ ሄሳ ሀዋረታስ ኦድዳይ ማግደላ ማይራሞ፥ ዮሃና፥ ያይቆባ አይዉ ማይራሞነ ኤንታራ ደእያ ሀራ ማጫሳታ።

¹¹ ሽን ኤንታዉ ማጫሳት ኦድዳይስ ኤልሞ ዳንን አማንቦኮና።

¹² ሽን ጰፅሮስ ደንድ ዎፅድ ዱፎ ብስ። ሄ በሳ ጋክድ፥ ሆክድ ጋ ፄልያ ዎደ ሞጎ አፍላ ፃላላ በእስ። ሀንዳባን ማላለትሸ ባ ሶ ስምስ።

ኤማሆሰ ኦገ ቦላ

¹³ ሄ ጋላስ ካልያ ታማረታፐ ናምአት የሩሳላመፐ ታማነ እስ ክሎ ምትረ ሃክያ ኤማሆሰ ጉታ ቦሶና።

¹⁴ ኤንቲ ዎላ ሀንዳባ ኡባ ኦደቶሶና።

¹⁵ ኤንቲ ሄ ሀኖታባ ቆፕሸነ ኦደትሸ ብያ ዎደ የሱሲ ባ ሁጰን ሺቅድ ኤንታራ ቤስ።

¹⁶ ሀኖሽን፥ ኤንቲ እያ ኤሮና መላ ኤንታ አይፈይ ኦይከትስ።

¹⁷ እ፥ “ህንተ ዎላ ኦገ ቦላ ደእሸ ኦደተይስ አይቤ?” ያግስ። ኤንቲ አዛንድ ስእ ግድ ኤቅዶሶና።

¹⁸ ኤንታፈ እሶይ ቀልዮጰ ጌተተይስ፥ “ሀ ቃማታ ግዶን የሩሳላመን ሀንዳባ ኤሮናይስ፥ ነ ቢታስ እማዬ?” ያግስ።

¹⁹ እ ዛሪድ፥ “እ ሀንዳይስ አይቤ?” ያግድ ኦይችስ። ኤንቲ፥ “ፆሳ ስንንነ አሳ ስንን ኦሶንነ ኦዳን ምኖ ናበ ግድዳ ናዝረተ የሱሳባ።

²⁰ እያ ካህነ ሀላቃትነ ሃረይሳት ሀይቆ ፕርዳስ አ እምድ፥ ካቅዶሶና።

²¹ ኑኒ እስራኤለ አሳ ዎዛንደ ግድ ኡፋይትድ ናግዳሽን ሀይስ ሀንን ሀች ሄን ቃማ።

²² ቃስ ኑ ግዶፈ እስ እስ ማጫሳት ኑና ማላልስዶሶና። ኤንቲ ሀች ዎንታ ጉራ ዱፉዋ ብዶሶና።

²³ እያ አሀ ይዳ ዎደ ስም ይድ፥ ‘እ ፓፃ ደኤስ’ ግያ ኪታንቾት ቆንጭን በእዳ ያግድ ኦድዶሶና።

²⁴ ኑ ግዶፈካ እሶት እሶት ዱፉዋ ብድ ማጫሳት ኦድዳይሳ ሀንን በእዶሶና፥ ሽን እያ በእቦኮና” ያግስ።

²⁵ እ ኤንታኮ፥ “ህንተኖ፥ አኬኮና አሳቶ፥ ህንተ ዎዛናይ ናበት ኦድዳባ ኡባ አማናናዉ ጋምኤይሳቶ፥

²⁶ ክርስቶስ ሀ መቱዋ ኤካናዉነ ባ ቦንቹዋን ገላናዉ በሰኔ?” ያግስ።

²⁷ ሙሰፐነ ናበታ ኡባፈ ደንድድ ጌሻ ማፃፋን እያባይ ፃፈትዳይሳ ኡባ ኤንታዉ ቆንጭስስ።

²⁸ ኤንቲ ብያ ጉታኮ ማታትዳ ዎደ የሱሲ አድ ሃሆ ሶ ብያ ዳንን፥

²⁹ ኤንቲ፥ “ሳአይ ቃምዳ ግሾ ኑራ አቃ” ያግድ ምንድ ዎስዶሶና። ሄሳ ግሾ፥ ኤንታራ አቃናዉ ገልስ።

³⁰ ኤንታራ እስፈ ጋይታ ቦላ ኡትድ፥ ኡይ ደንድ፥ መንድ፥ አንጅድ ኤንታዉ እሚስ።

³¹ ሄ ዎደ ኤንቲ ኤራና መላ ኤንታ አይፈይ ዶየትስ። ኤንትካ ኤርዶሶና። ሽን እ ኤንታፈ ጌምስ።

³² ኤንቲ፥ “ኑ ኦግያ ቦላ ደእሽን እ ኑስ ጌሻ ማፃፋ ብርሽሽንነ ኑና ኦድስሽን፥ ኑ ዎዛናይ ፁገትቤኔ?” ያግዶሶና።

³³ ሄ ዎደ ደንድድ ጉየ የሩሳላመ ይዶሶና። ታማነ እሶትነ ሀራት እስ ቦላ ሺቅድ ደእሽን ደምዶሶና።

³⁴ ኤንቲ፥ “ጎዳይ ቱማ ደንድስ፤ ስሞናስ ቆንጭስ” ያግዶሶና።

³⁵ ሄ ናምኡ ታማረት ኤማሁሰ ኦግያ ቦላ ደእሽን ሀንዳይሳነ ኡይ መንዳ ዎደ ዋት እያ ኤርዳኮ ኤንታዉ ኦድዶሶና።

የሱሲ ባ ታማረታስ ቆንጭስ

³⁶ ናምኡ ታማረት ሄሳ ኦዳ ቦላ ደእሽን፥ የሱሲ ኤንታ ግዶን ኤቅድ፥ “ሳሮይ ህንተዉ ግዶ” ያግስ።

³⁷ ግዶሽን፥ ኤንቲ ዳጋምድ፥ ሞይትለ በእዳ ዳንን ያይዶሶና።

³⁸ እ ኤንታኮ፥ “አይስ ባብደቲ? አይስ ስይ ህንተ ዎዛናን ገልዴ?

³⁹ ታ ኩሽያነ ታ ቶሁዋ በእተ፤ ታኒ ታና። ቃስ ኦይክድ በእተ፤ ታናን ህንተ በኤይሳዳ፥ ሞይትለስ አሾይነ መቀ ባዋ” ያግስ።

⁴⁰ ያግድ፥ ባ ቶሁዋነ ባ ኩሽያ ኤንታ በስስ።

⁴¹ ኤንቲ ኡፋይሳፈ ደንዶይሳን አማኖና ማላለተን ደእሽን፥ የሱሲ ኤንታኮ፥ “ሀይሳን ህንተዉ ምያባይ ደኢ?” ያግስ።

⁴² ኤንቲ እስ ጫጨትዳ ሞሎ እያዉ እምዶሶና።

⁴³ እ ኤክድ ኤንታ ስንን ምስ።

⁴⁴ እ፥ “ታ ህንተራ ጋምእዳ ዎደ ኡባን ሙሰ ማፃፋታን፥ ናበታ ማፃፋታንነ ማዝሙረ ማፃፋታን፥ ታ ግሾ ፃፈትዳባይ ኡባይ ፖለታናዉ በሴስ ያጋዳ ታ ህንተዉ ኦድዳ ቃላይ ሀይሳ” ያግስ።

⁴⁵ ሄ ዎደ ጌሻ ማፃፋታ አኬካና መላ ኤንታ ዎዛና ዶይስ።

⁴⁶ ሄሳዳካ፥ “ክርስቶስ ዋየ ኤካና፥ ሄን ቃማን ሀይቆፐ ደንዳና ያግድ ፃፈትስ።

⁴⁷ የሩሳላመፐ ደንድድ አሳ ኡባስ ናጋራፐ ማሮተይነ አቶተይ እያ ሱንን ማርካታና።

⁴⁸ ህንተ ሄሳስ ማርካታ።

⁴⁹ ሄኮ፥ ታካ ታ አዋይ እምዳ ኡፋይሳ ህንተዉ የዳና። ህንተ ሳሎፐ ዎልቃ ማአና ጋካናዉ የሩሳላመ ካታማን ጋምእተ” ያግስ።

የሱሲ ፑደ ሳሎ ብስ

⁵⁰ ሄሳፈ ጉየ፥ ብታነ ካታማ ኤንታና ኤክድ ብስ። ባ ኩሽያ ደንድ አንጅስ።

⁵¹ ኤንታና አንጅሸ ኤንታፈ ሻከትድ ፑደ ሳሎ ኤከትስ።

⁵² ኤንቲ ዝግ ጎይንድ ዳሮ ኡፋይሳን የሩሳላመ ስምዶሶና።

⁵³ ፆሳ ኡባ ዎደ ጋላትሸ ፆሳ ኬን ጋምእዶሶና።