Luqaasa 23 - ጌሻ ማፃፋ

የሱሲ ጵላፆሳ ስንን

¹ ሄ በሳን ሺቅዳ ሻንጎት ኡባይ ደንድድ የሱሳ ጵላፆሳኮ ኤፍዶሶና።

² “ሀ ኡራይ ኑ አሳ ባለሽን፥ ካዋስ ጊራ ጊሮና መላ ድግሽንነ፥ ቃስ ‘ታኒ ክርስቶሳ ህንተ ካዋ’ ያግሽን ደምዳ” ያግድ ሞትዶሶና።

³ ጵላፆስ የሱሳ፥ “ኔኒ አይሁደታ ካዎ?” ያግድ ኦይችስ። የሱሲ፥ “ኤ፥ ነ ግዳይሳ መላ” ያግስ።

⁴ ጵላፆስ ካህነ ሀላቃታኮነ አሳኮ፥ “ሀ ኡራ ቦላ ታኒ እስ ባላካ ደማብከ” ያግስ።

⁵ ሽን ኤንቲ፥ “ሀ ኡራይ ጋልላፐ ዶምድ ሀይሳ ጋካናዉ ይሁዳ ኩመ ኢታባስ ደንስ” ያግድ ምን ኦድዶሶና።

⁶ ጵላፆስ ሄሳ ስእዳ ዎደ የሱሲ ጋልላ አሴኮ ኤራናዉ ኮይድ እያ ኦይችስ።

⁷ የሱሲ ሄሮዲሳ ቢታፈ ይዳ አስ ግደይሳ ጵላፆስ ኤርዳ ዎደ ሄሮዲስ ሄ ዎደ የሩሳላመን ደእያ ግሾ እያኮ የድስ።

⁸ ሄሮዲስ የሱሳ በአናዉ ዳሮ ዎደፐ ኮይሸ ደእያ ግሾ፥ እያ በእዳ ዎደ ዳሮ ኡፋይትስ። አይስ ጊኮ፥ እያባ ስእዳ ግሾ ማላልስያባ ኦን በአናዉ አሞትሸ ደኤስ።

⁹ ሄሮዲስ የሱሳ ዳሮ ኦይሾታ ኦይችስ፥ ሽን እ አይኮካ ዛርቤና።

¹⁰ ካህነታ ሀላቃትነ ህገ አስታማረት ያን ኤቅድ ምንድ እያ ሞቶሶና።

¹¹ ሄሮዲሳራነ እያ ዎታዳረታራ የሱሳ ካዶሶናነ ለቅስዶሶና። ቦንቾ አፍላ ማይዝድ ጵላፆሳኮ ዛሪድ የድዶሶና።

¹² ሄሮዲሳራነ ጵላፆሳራ ካሰ ሞርከሽን ሄ ጋላስ ዎላ ጊግዶሶና።

¹³ ጵላፆስ ካህነ ሀላቃታ፥ አሳ ሃረይሳታነ አሳ ፄግድ፥

¹⁴ “ ‘ሀ ኡራይ አሳ ጌላተስ ደንስ’ ግድ ታኮ ኤህደታ። ታካ ህንተ ስንን ፕልጋዳ ህንተ ሺሽዳ ሞቱዋስ አይብ ባላካ ደማብከ።

¹⁵ ሄሮዲስ፥ ሄሳ አይብ ባላካ እያ ቦላ ደምቦና ግሾ ኑኮ የድስ። ቱማካ ሀ ኡራይ ሀይቆስ ጋያ አይብ ባላካ ኦቤና።

¹⁶ ሄሳ ግሾ፥ እያ ጋራፋዳ ብላ የዳና” ያግስ።

¹⁷ ሄሳ እ ግዳይ ፓስካ ባኣለ ዎደ እስ አስ ኤንታዉ ብላናይስ እያዉ አቶናባ ግድያ ግሾሳ።

¹⁸ ደረይ ኡባይ እስ ቦላ፥ “ሀ ኡራ ገደ ድጋ፥ ኑስ ባርባና ብላ” ያግድ ዋስዶሶና።

¹⁹ ባርባን ካታማ ግዶን አሳ ኢታባስ ደንድ አሰ ዎድ ቃሸትዳ አስ።

²⁰ ጵላፆስ የሱሳ ብላናዉ ኮይድ አሳስ ዛር ኦድስ።

²¹ ግዶሽን፥ አሳይ፥ “ካቃ! ካቃ!” ያግድ ዋስዶሶና።

²² ጵላፆስ ሄን፥ “ሀ ኡራይ ቆህዳባይ አይቤ? ዎስ ጋያ ባላ ታ ደማብከ። ሄሳ ግሾ፥ ጋራፋዳ የዳ አጋና” ያግስ።

²³ ኤንቲ ባንታ ቃላ ቁ ኦድ፥ “ካቀታናዉ በሴስ” ግድ ምን ዋስዶሶና። ኤንታ ዋሶይካ ፆንስ።

²⁴ ኤንታ ኦይሻ ግሾ፥ ግድ ጵላፆስ እያ ቦላ ፕርድስ።

²⁵ አሰ ኢታባስ ደንዳይሳነ አሰ ዎድ ቃሸትዳይሳ ብላና መላ ዎስዳ ግሾ ሄ ኡራ ኤንታዉ ብልስ። ሽን የሱሳ ኤንቲ ኮይዳባ ኦና መላ ኤንታዉ አድ እሚስ።

የሱሳ ካቀተ

²⁶ የሱሳ ኦይክድ ኤፍሽን ስሞና ጌተትያ ቀሬና ቢታ አደይ ጋፃረፐ ይሽን፥ ደምድ ማስቃልያ ቶስድ የሱሳ ካልድ ባና መላ ኡንኤዶሶና።

²⁷ ዳሮ አሳይነ ባንታ ትራ እጭሸ ዬክያ ማጫሳት እያ ጉየራ ካሎሶና።

²⁸ ሽን የሱሲ ኤንታኮ ጉየ ስሚድ፥ “ህንተኖ፥ የሩሳላመ ማጫሳቶ፥ ህንተ ሁጰስነ ህንተ ናይታስ ዬክተፐ አትሽን፥ ታዉ ዬኮፍተ።

²⁹ ‘ሄኮ ማይንት፥ የሎና ኡሎትነ ንና ንት አንጀትዶሶና’ ህንተ ያጋና ጋላሳይ ያና።

³⁰ ሄ ዎደ ደረታ፥ ‘ኑ ቦላ ኩንድተ’፥ ዙማታካ፥ ‘ኑና ካምተ’ ያጋና።

³¹ ህዛ፥ ቃየ ም ሄሳ ኦኮ መላ ም ዋታንደሻ?” ያግስ።

³² እያራ ዎናዉ ሀራ ናምኡ ዎራንታ ኤፍዶሶና።

³³ ቀራንዮ ጌተትያ በሳ ጋድ ካቅዶሶና። ዎራንታፐ እሱዋ ኡሻቻ ባጋራ ሀንኩዋ ሀድርሳ ባጋራ ካቅዶሶና።

³⁴ የሱሲ፥ “ታ አዋዉ፥ ኤንቲ አይ ኦያኮ ኤሮና ግሾ፥ ኔኒ ኤንታዉ አቶ ያጋ” ያግስ። ኤንቲ እያ አፍላ ቦላ ሳማ የግድ ሻከትድ ኤክዶሶና።

³⁵ አሳይ ኤቅድ ፄሎሶና፥ ሽን ደርያ ሃረይሳት፥ “ሀራታ አሽስ፤ ፆሳይ ዶርዳ ክርስቶስ እያ ግድኮ አነ ባና አሾ” ያግድ ለቅስዶሶና።

³⁶ ዎታዳረት እያኮ ሺቅድ፥ ጫላ ዎይነ ኡሻ እምዶሶና።

³⁷ ያትድ፥ “ኔኒ አይሁደታ ካዎ ግድኮ ነ ሁጵያ አሻ” ያግድ ለቅስዶሶና።

³⁸ እያዉ ሁጰ ባጋራ፥ “ሀይስ አይሁደታ ካዎ” ግያ ፁፈይ ደኤስ።

³⁹ ካቀትዳ ዎራንታፐ እሶይ ጫሸ ሳአራ ጎችሸ፥ “አነ ኔኒ ክርስቶሳ ግድኮ፥ ነናካ ኑናካ አሻ” ያግስ።

⁴⁰ ሽን ሀንኮ ዎራንይ፥ “ኔኒ ሀይሳ መላ ፕርዳን ደአሸ ሀር አቶሽን፥ ፆሳስ ያይኪ?

⁴¹ ኑኒ ኑ ኦዳ ናጋራ ግሾ በሲያ ፕርዳ ኤኮስ፥ ሽን ሀ ኡራይ እስ ኢታባ ኦቤና” ያግድ ሀንቀትስ።

⁴² ቃስካ፥ “የሱሳ፥ ነ ነ ካዎተራ ያ ዎደ ታና ቆፓ” ያግስ።

⁴³ የሱሲ፥ “ታ ነዉ ቱማ ኦዳይስ፤ ሀች ኔኒ ታራ ጋናተን ግዳና” ያግስ።

^44-45 ሄ ጋላስ ኡሱፑን ሳተፐ ብድ ኡዱፉን ሳተ ጋካናዉ አዋይ ፖኡዋ ድግዳ ግሾ፥ ቢታ ኡባ ቦላ ማ ግድስ። ፆሳ ኬ ማጋራጆይ ዳከትድ ናምአን ሻከትስ።

⁴⁶ የሱሲ፥ ቃላ ቁ ኦድ፥ “ታ አዋዉ፥ ታ ታ ሸምፕዉ ነ ኩሸን ሼይስ” ያግድ ሀይቅስ።

⁴⁷ ማቶ ሀላቃይ፥ ሀንዳይሳ በእድ፥ “ሀይስ ኡራይ ቱማካ ፅሎ” ያግድ ፆሳ ጋላትስ።

⁴⁸ ሀ ሀንያባ በአናዉ ሄ በሳ ሺቅዳ አሳ ኡባይ ሀንዳባ በእዳ ዎደ ባንታ ትራ እጭሸ ባንታ ሶ ስምዶሶና።

⁴⁹ ግዶሽን፥ የሱሳ ማታን ኤርያ አሳ ኡባይ፥ ሄሳዳካ ጋልላፐ ካልድ ይዳ ማጫሳት ሄሳ በእሸ ሃሆን ኤቅዶሶና።

^50-51 አይሁደ ሻንጎታፐ እሶይ፥ ዮሰፋ ጌተትያ ኡራይ ደኤስ። እ አርማተ ጌተትያ ይሁዳ ካታማፐ ይስ። እ ሎኦነ ፅሎ አስ ግድያ ግሾ ፆሳ ካዎተ ዩሳ ናጌስ። ሻንጎታፐ እሱዋ ግድሸ ኤንታ ዞረተንነ ኦሱዋን ዴና።

⁵² ሄ ኡራይ ጵላፆሳኮ ብድ፥ የሱሳ አሀ ሞጋናዉ ታዉ እማ ግድ ዎስስ።

⁵³ ጵላፆስ ኤካ ያግን፥ የሱሳ አሀ ዎስድ አፍላራ ፃፅስ። ዛላፈ ዎጭድ ከስዳ ሀራ አስ ሞገቶና ኦራ ዱፎን ዎስ።

⁵⁴ ሳምባት ገላና ሀንያ ግሾ፥ ሄ ጋላሳይ ጊገተ ቃማ።

⁵⁵ ጋልላፐ ደንድድ የሱሳ ካልድ ይዳ ማጫሳት ዮሰፋራ ብድ እያ አሀ ዋት ሞግያኮ ዱፉዋ አኬክድ በእዶሶና።

⁵⁶ ያፐ ስሚድ ሽቶነ ቅባተ ጊግስዶሶና። ህገይ ኪተይሳ መላ ሳምባታ ጋላስ ሸምፕ ፔእዶሶና።