Luqaasa 21 - ጌሻ ማፃፋ

አምኤ ሙፃታ

¹ ዱረ አሳይ ፆሳ ኬን ሙፃታ ሳፅንያን የግሽን የሱሲ ቁ ግድ አሳ በእስ።

² ቃስ እስ ማንቆ አምእያ ናምኡ ስክና የግሽን በእድ፥

³ “ታ ህንተዉ ቱማ ኦዳይስ፤ ሀ ማንቆ አምእያ ኡባፈ አዳ እማሱ።

⁴ አይስ ጊኮ፥ ሀ አሳ ኡባይ ባንታዉ ደእያባፐ እምዶሶና፥ ሽን እያ ባ ፓጫፐ፥ ባዉ ደእያ አቁዋ ኡባ እማሱ” ያግስ።

ዎደ ዉርሰ ማላታታ

⁵ የሱሳ ታማረታፐ እሶት እሶት ፆሳ ኬይ ዳሮ ሎእያ ሹቻንነ አሳይ ፆሳስ እምዳ እሞታን ሎእዳይሳ ኦደቶሶና።

⁶ ሽን የሱሲ፥ “ሀ ህንተ በእያባይ ኡባይ ላለቶና፥ ሹች ሹቻ ቦላ ግምበትዳ መላ አቶና ዎደይ ያና” ያግስ።

⁷ ኤንትካ፥ “አስታማርያዉ፥ ሀ ኡባይ ሀናናይ አዉዴ? ቃስ ሀይስ ሀናናይሳስ ማላታይ አይቤ?” ያግድ ኦይችዶሶና።

⁸ የሱሲ ያግድ ኤንታዉ ዛሮ እሚስ፦ “ባለቶና መላ ናገትተ። ዳሮት፥ ‘ታኒ ክርስቶሳ፥ ዎደይ ማታትስ’ ያግሸ ታ ሱንን ያና፥ ሽን ህንተ ኤንታ ካሎፍተ።

⁹ ህንተ ኦላባነ አሳ ጌላተ ስእያ ዎደ ዳጋሞፍተ። ሄስ ስንትድ ሀናናይስ አቶናባ ግድያ ግሾ ዎድያ ዉርሰይ ኤለስድ ዬና” ያግስ።

¹⁰ ካልድካ፥ “ደረይ ደርያ ቦላ፥ ካዎተይ ካዎተ ቦላ ደንዳና።

¹¹ ግታ ቢታ ቃፆይ ሀናና፥ ኮሻይነ ጋዶይ ዱማ ዱማ በሳን ዳራና፥ ያሽያባይነ ግታ ማላታት ሳሎፐ ቆንጫና።

¹² ሽን ሀ ኡባይ ሀናናፐ ስን ታ ሱን ግሾ ግድ አሳይ ህንተና ጎዳናነ ኦይካና። አይሁደ ዎሳ ኬንነ ቃሾ ኬን ህንተና የጋና። ካዎታ ስንነ ደርያ ሃረይሳታ ስን ህንተና ኤፋና።

¹³ ሄስካ ታባ ህንተ ኤንታዉ ማርካታናዉ ሎኦ ኦገ ግዳና።

¹⁴ ሄሳ ግሾ፥ ህንተ ኦይሸትያ ዎደ ዎይግድ ዛሮ እማነ ግድ ህንተ ዎዛናን ኡንኤቶና መላ አኬክተ።

¹⁵ አይስ ጊኮ፥ ህንተ ሞርከት ህንተራ ኤቀታናዉነ ፓላማናዉ ዳንዳኦና ዶናነ ጭንጫተ ታ ህንተዉ እማና።

¹⁶ ሀር አቶሽን፥ ህንተና የልዳይሳት፥ ህንተ እሻት፥ ህንተ ዳቦትነ ላገት ህንተና አድ እማና። ህንተ ግዶፈ እሶታ እሶታ ዎና።

¹⁷ ታ ሱን ግሾ አሳ ኡባ ስንን ህንተ እፀትዳይሳታ ግዳና።

¹⁸ ሽን ሀር አቶሽን፥ ህንተ ብናናፐ እሶይካ የና።

¹⁹ ፖሎ ዳንዳአን ህንተ፥ ህንተ ሸምፑዋ አሻና።”

²⁰ “የሩሳላመ ካታማይ ዎታዳረን ድረትድ ኡትዳሽን ህንተ በእኮ እያዉ ዮይ ማታትዳይሳ ኤርተ።

²¹ ሄ ዎደ ይሁዳን ደእያ ኡባይ ደርያኮ ባቃቶ፥ ካታማን ደኤይሳት ያፐ ከዮ፥ ጋፃርያን ደኤይሳት ካታማ ገሎፖ።

²² አይስ ጊኮ፥ ሀ ፃፈትዳባይ ፖለታና መላ ሄስ ፆሳይ ኩሸ ዛርያ ዎደ።

²³ ሳአ ቦላ ግታ መቶይ ያና፥ ሄሳንካ አሳ ቦላ ፆሳ ሀንቆይ ያና። ሄሳ ግሾ፥ ቃንትዳይሳታነ ንይሳታ አየ!

²⁴ ኤንቲ ማሻን ሀይቃና፥ አሳ ኡባይ አላጋ ቢታ ድኤታና። አይሁደ ግዶና አሳ ዎደይ ፖለታና ጋካናዉ የሩሳላመይ ኤንታናን የትዳይሳ ግዳና።

²⁵ “አዋን፥ አጌናንነ፥ ፆልንቶታ ቦላ ማላታት ሀንድ በንታና። አባፈነ ዙልያ ደሹዋፐ ደንዶይሳን ቢታን ደእያ አሳይ ኡንኤታናነ ያርካና።

²⁶ ሳሉዋ ዎልቃት ቡቀታና ግሾ አሳይ ያሻንነ ቢታ ቦላ አይብ ሀናንደሻ ግድ ናጎን ባንታና ባለታና።

²⁷ ሄ ዎደ አሳ ናአይ ዎልቃንነ ግታ ቦንቾን ሻራራ ይሽን ኤንቲ በአና።

²⁸ ህንተ አቶተይ ማታትዳ ግሾ ሀ ሀኖት ፖለተ ኦይክያ ዎደ ጊገት ኤቅተ፥ ህንተ ሁጵያ ቁ ኦድ ፄልተ” ያግስ።

²⁹ ካልድካ፥ ሀይሳዳ ግድ ሌምሶ ኦድስ፤ “ባላሰ ምነ ሀራ ምታ ኡባ በእተ።

³⁰ ኤንቲ አጭያ ዎደ ቶርቸይ ማታትዳይሳ ህንተ ኤሬታ።

³¹ ሄሳዳ ሀ ሀኖት ፖለትሽን ህንተ በእኮ ፆሳ ካዎተይ ማታትዳይሳ ኤርተ።

³² “ታ ህንተዉ ቱማ ኦዳይስ፤ ሀ ኡባይ ፖለታና ጋካናዉ ሀ የለተይ አና።

³³ ሳሎይነ ሳእ አና፥ ሽን ታ ቃላይ አና።

³⁴ “ህዛ፥ ስ ባይና ደኦን፥ ኡሻ ዳሮንነ ዱሳባስ ኡንኤተን ህንተ ዎዛናይ ኦይከቶና መላነ ሄ ቃማይ አኬኮና ፅሄዳ ህንተ ቦላ ጋኮና መላ ናገትተ።

³⁵ ሄ ቃማይ ቢታ ኩመን ደእያ ኡባ ቦላ ጋካና።

³⁶ ሄሳ ግሾ፥ ያ ኢታፐ አታናዉነ አሳ ናአ ስንን ኤቃናዉ ዳንዳአና መላ ኡባ ዎደ ምንድ ዎስተ” ያግስ።

³⁷ ጋላስ ጋላስ የሱሲ ፆሳ ኬን ታማርስሸ፥ ቃማ ቃማ ሻማሆ ዙማ ቦላ ከይድ አቄስ።

³⁸ አሳ ኡባይ እያ ስአናዉ ዎንታ ጉራ እያኮ ፆሳ ኬ ዮሶና።