Luqaasa 20 - ጌሻ ማፃፋ

የሱሳ ማታይ ኦይሸተ

¹ እስ ጋላስ የሱሲ ፆሳ ኬን አሳ ታማርስሽንነ ዎንገላ ማርካትሽን፥ ካህነ ሀላቃት፥ ህገ አስታማረትነ ደርያ ጭማት እስፈ እያኮ ይድ፥

² “ኔኒ ሀይሳታ አይብ ማታን ኦያኮ ኑስ ኦዳ። ሀ ማታ ነዉ እምዳይ ኦኔ?” ያግድ ኦይችዶሶና።

³ እ ኤንታኮ፥ “ታካ ህንተና እስባ ኦይቻና፥ አነ ታዉ ዛርተ።

⁴ ፃማቅያ ዮሃንሳ ፅንቃተይ ፆሳፈየ አሳፔ?” ያግስ።

⁵ ኤንቲ ዎል ግዶን ያግድ ዞረትዶሶና፦ “ፆሳፈ ጊኮ ያትን፥ አይስ አማንበከቲ?” ያጋና።

⁶ “አሳፐ ጊኮ፥ አሳ ኡባይ ዮሃንስ ናበ ግደይሳ አማንያ ግሾ ኑና ሹቻን ጫዳና።”

⁷ ያንያ ግሾ፥ “አዉፐኮ ኑ ኤሮኮ” ያግድ ዛርዶሶና።

⁸ የሱሲ ዛሪድ፥ “ህዛ፥ ታካ አይ ማታን ሀይሳታ ኦያኮ ህንተዉ ኦድከ” ያግስ።

ጎሻንቾታ ሌምሶ

⁹ ሄሳፈ ጉየ፥ የሱሲ ያግድ ሀ ሌምሱዋ አሳስ ኦድስ፦ “እስ አስ ዎይነ ቶክስ። ጎሻንቾታስ ከራ እምድ ዳሮ ዎደ ጋምእድ ያናዉ ሀራ ቢታ ብስ።

¹⁰ ዎይነ አይፍያ ማፅያ ዎደይ ጋክን ዎይነ አይፍያፐ እያዉ የዳና መላ ጎሻንቾታኮ ባ አይልያ ኪትስ። ሽን ጎሻንቾት ሄ አይልያ ኦይክድ ዋድ መላ ኩሸ የድዶሶና።

¹¹ ካልድካ ሀራ አይልያ ኪትስ። ቃስ ጎሻንቾት እያ ዋድ፥ ካዉሽድ መላ ኩሸ የድዶሶና።

¹² ሀእካ ዛሪድ ሄን አይልያ ኪትስ። ጎሻንቾት እያካ ማዱንፅስድ ዎይነ ጋድያ ግዶፈ ጋፃ ከስድ የግዶሶና።

¹³ “ዎይነ ጋድያ ጎዳይ፥ ‘ያትን ታ አይ ኦ? አነ ቃስ ታ ዶስያ ታ ናአ የዳና፤ ኦን ኤር ኤንቲ እያ ቦንቾና አጎኮና’ ያግስ።

¹⁴ “ሽን ጎሻንቾት ኡራ ናአ በእዳ ዎደ፥ ‘ሀይስ እያ ላታናይሳ፥ ሃ ዪተ እያ ዎና፥ ያትኮ ላታይ ኑስ ግዳና’ ያግድ ዞረትዶሶና።

¹⁵ ዎይነ ጋድያ ግዶፈ ጋፃ ከስድ ዎዶሶና። ያትን፥ ዎይነ ጋድያ ጎዳይ ሄ አሳታ ዋታኔ?

¹⁶ ይድ ሄ ጎሻንቾታ ይሳና፥ ዎይነ ጋድያ ሀራ አሳታስ እማና። አሳይ ሄሳ ስእዳ ዎደ ‘ሽንቻለ ሄሳ መላባ ጋፎ’ ያግዶሶና።

¹⁷ “የሱሲ ኤንታ ጫድ ፄልድ፥ “ ‘ያትን፥ ግምበ ኬፅያ አሳት ቦርዳ ሹቻይ፥ ኬስ ማላነ ምኖተ እምያ ኡባፈ አያ ሹች ግድስ’ ጌተትድ ፃፈትዳይሳ ብርሸይ አይቤ?

¹⁸ ሄ ሹቻ ቦላ ኩንድያ ኡባይ ቆፀታና፥ ሹቻይ እያ ቦላ ዎያ ኡባይ ሊቃና” ያግስ።

¹⁹ ህገ አስታማረትነ ካህነ ሀላቃት ሀ ሌምሶይ ኦደትዳይ ኤንታ ቦላ ግደይሳ ኤርድ ሄ ዎደ እያ ኦይካናዉ ኮይዶሶና፥ ሽን አሳስ ባብዶሶና።

ጊራባ

²⁰ ሄሳ ግሾ፥ የሱሳ ደርያ ሃርያ ሮመ ካዋ ማታስ አድ እማናዉ ኮይድ እያ ዶናፐ ባላ ቃላ ናጎሶና። ሄሳ ፖልሳናዉ ፅሎ ዳንድ ጭምያ አሳታ እያኮ ኪትዶሶና።

²¹ ኪተትድ ብዳ አሳት፥ “አስታማርያዉ፥ ኔኒ ኦደይስነ ታማርሰይስ ልከ ግደይሳ፥ ቃስ ፆሳ ኦግያ ቱማተን ታማርሰይሳነ ኦናካ ሻኮናይሳ ኑ ኤሮስ።

²² ሀኖሽን፥ ሮመ ካዋስ ጊራ ጊራናዉ በሲ በሰኔ?” ያግድ እያ ኦይችዶሶና።

²³ ሽን እ ኤንታ ዎዛና ኢታተ ኤርዳ ግሾ፥

²⁴ “አነ ታና እስ ሳንትመ በስተ፥ እያ ቦላ ደእያ ምስለይነ ሱንይ ኦደባዬ?” ያግስ። ኤንቲ ዛሪድ፥ “ሮመ ካዋ ቄሳረይሳ” ያግዶሶና።

²⁵ እ ዛሪድ፥ “ያትኮ፥ ቄሳረባ ቄሳረስ፥ ፆሳባ ፆሳስ እምተ” ያግስ።

²⁶ ሄሳ ግሾ፥ እ ዛርዳ ዛሩዋን አሳ ስንን ባላ ደማናዉ ዳንዳእቦኮና። እያ ዛሩዋን ማላለትድ ስእ ግዶሶና።

ሀይቆፐ ደንዶባ

²⁷ ሀይቆፐ ደንዶይ ባዋ ግያ ሳዱቃወታፐ እሶት እሶት የሱሳኮ ይድ፥

²⁸ “አስታማርያዉ፥ እስ አስ ማቾ ኤክድ ናአ የሎና ሀይቅኮ፥ እያ እሻይ ሄ ማጫስዉ ኤክድ ናይታ የልድ ባ እሻስ ኮቸ አሻና መላ ሙሰይ ፃፍስ።

²⁹ ሄኮ ላፑን እሻት ደኦሶና። ኮይሮይስ ማቾ ኤክድ ናአ የሎና ሀይቅስ።

³⁰ ናምአንይ እዮ ኤክድ ናአ የሎና ሀይቅስ።

³¹ ሄንይካ ሄሳ ሀንስ። ላፑናት ኡባይ ሄሳዳ ሀንድ እዮ ኤክዶሶና፥ ሽን ናአ የሎና ሀይቅዶሶና።

³² ዉርሰን ማጫስያ ሀይቃሱ።

³³ ህዛ፥ ላፑን አደይ እዮ ኤክዳ ግሾ ሀይቆፐ ደንድያ ዎደ እያ ኦደ ማቾ ግዳኔ?” ያግድ ኦይችዶሶና።

³⁴ የሱሲ ዛሪድ፥ “አሳይ ሀ ዎድያን ኤኮሶናነ ገሎሶና።

³⁵ ሽን ሀይቆፐ ደንድድ ያና አላምያን ዳናዉ በሰይሳት ኤኮኮናነ ገሎኮና።

³⁶ ኤንቲ ኪታንቾ መላ ግድያ ግሾ ስንፈ ሀይቆኮና። ሀይቆፐ ደንድዳ ግሾ ኤንቲ ፆሳ ናይታ።

³⁷ ሙሰይ ጎዳ፥ ‘አብራሃመ ጎዳ፥ ይሳቃ ጎዳ፥ ያይቆባ ጎዳ’ ግድ ቱሽያ ግዶን ፁገትያ ታማ ታርክያ ፃፍዳይሳን ሀይቅዳ አሳይ ደንደይሳ በሴስ።

³⁸ ኡባይ እያዉ ደኦን ደኤይሳታ ግድያ ግሾ እ ደኦን ደኤይሳታ ጎዳፐ አትሽን፥ ሀይቅዳይሳታ ጎዳ ግደና” ያግድ ዛርስ።

³⁹ ህገ አስታማረታፐ እሶት እሶት፥ “አስታማርያዉ፥ ሎኦባ ኦዳዳሳ” ያግዶሶና።

⁴⁰ ሄሳፈ ጉየ፥ ሀራ ኦይሾ ኦይቻናዉ ያይዶሶና።

ክርስቶስ ኦደ ናኤ?

⁴¹ እያፐ ካልድ የሱሲ ኤንታኮ፥ “አሳይ ክርስቶሳ ዋትድ ዳዊታ ናአ ያጎና?

^42-43 አይስ ጊኮ፥ ዳዊቲ ባ ሁጰን ባ ማፃፋን፥ “ ‘ፆሳይ ታ ጎዳኮ “ታ ነ ሞርከታ ነ ቶሆይ የያሶ ኦና ጋካናዉ ታፐ ኡሻቻ ባጋን ኡታ” ግስ’ ያግስ።

⁴⁴ “ህዛ፥ ዳዊቲ ክርስቶሳ፥ ‘ጎዳ ግድ ፄግሸ እያዉ ናአ ዋንድ ግዲ?’ ” ያግስ።

⁴⁵ ደረይ ኡባይ ስእሽን ባ ታማረታኮ፥

⁴⁶ “አዱሳ ማኦ ማእድ ዩሸ ዶሰይሳታፐ፥ ግያን ቦንቾ ሳሮ፥ አይሁደ ዎሳ ኬን ቦንቾ ኦይደ፥ ሞከትያ ሶንካ ቦንቾ በሲ ኮይያ ህገ አስታማረታፐ ናገትተ።

⁴⁷ ኤንቲ አምኤታ ኬ ካሎዮሶና፥ ፅሎ አስ ዳንድ ዎሳ አዱሶሶና። ሄሳት ኡባፈ አያ ኢታ ፕርዳ ኤካና” ያግስ።