Luqaasa 2 - ጌሻ ማፃፋ

የሱሳ የለተ

¹ ሄ ዎደ ሮመ ቢታን ደእያ አሳ ኡባይ ታይበታና መላነ ሱንይ ፃፈታና መላ ካዎይ አዉግስፆስ ኪትስ።

² ሄስካ ቀረኖስ ሶረ ቢታ አይስያ ዎደ ኦሰትዳ ኮይሮ ታይቡዋ።

³ ሄሳ ግሾ፥ እስ እስ አስ ባ ሱን ፃፈታናዉ ባ የለትዳ ቢታ ብስ።

⁴ ዮሰፍካ ዳዊታ ኬፈነ ያራፐ ግድዳ ግሾ፥ ጋልላ ናዝረተ ካታማፐ ደንድድ ዳዊታ ካታማ ግድዳ ይሁዳ ቤተለመ ብስ።

⁵ ብሸ፥ የላናዉ ዎደይ ዉርዳ እ ኦይች ዎዳ፥ ማይራምራ ዎላ ፃፈታናዉ ብስ።

⁶ ኤንቲ ያን ደእሽን እዉ የሎ ዎደይ ጋክስ።

⁷ ባ ባይራ ናኣ የላሱ። ጩርቃራ ፃፃዳ እማ አቅያ ኬን በሲ ይዳ ግሾ ዳራን መሄ ሙዝያ ጎንገን ዝንእሳሱ።

ሄንንቾታነ ኪታንቾታ

⁸ ሄ ጋድያን ቃማ ዶርሳ ዉድያ ናግሸ ካረን አቅያ ሄንንቾት ደኦሶና።

⁹ ጎዳ ኪታንቾይ ሀሳዮና ይድ ኤንታ ማታን ኤቅስ። ጎዳ ቦንቾይ ኤንታ ዩሹዋን ፖእስ፤ ኤንትካ ዎልቃማ ያሽ ያይዶሶና።

¹⁰ ሽን ኪታንቾይ፥ “ያዮፍተ! ሄኮ፥ አሳ ኡባስ ግድያ ግታ ኡፋይሳ ምሽራቹዋ ኤካዳ ያስ።

¹¹ ሄስካ፥ ዳዊታ ካታማን አሸይስ ህንተዉ ሀች የለትስ። እ ጎዳ ክርስቶሳ።

¹² ዞቃለ ናእ ጩርቃራ ፃፀትድ ጎንገን ዝንእዳይሳ ህንተ ደማና፤ ሄስካ ህንተዉ ማላ ግዶ” ያግስ።

¹³ ቆፖና ዳሮ ሳሎ ኪታንቾት ኪታንቹዋራ እስፈ ቆንጭድ፥

¹⁴ “ቦንቾይ ፆሳስ ቃ ሳሉዋን፥ ሳሮይ ቢታ ቦላ ፆሳይ ዶስያ አሳስ ግዶ” ያግድ ጋላትዶሶና።

¹⁵ ኪታንቾት ኤንታፈ ሻከትድ ሳሉዋ ከይዳፐ ጉየ ሄንንቾት፥ “አነ ጎዳይ ኑስ ቆንጭስዳባነ ሀንዳባ በአናዉ ቤተለመ ቦስ” ያግዶሶና።

¹⁶ ኤንትካ ኤለስድ ብዶሶና። ማይራሞ፥ ዮሰፋነ ዞቃለ ናኣ ጎንገን ዝንእዳይሳ በእዶሶና።

¹⁷ በእ ስሚድ ናአባ ኤንታዉ ኦደቶይሳ፥ ቆንጭስድ ሄ በሳን ደእያ አሳስ ማርካትዶሶና።

¹⁸ ሄሳ ስእዳ ኡባይ ሄንንቾት ኦድዳይሳን ማላለትዶሶና።

¹⁹ ማይራማ ሀንዳባ ኡባ ባ ዎዛናን ቆፓሸ ደአሱ።

²⁰ ሄንንቾት ኤንታዉ ኦደትዳይሳዳ ሀንን በእዶሶና። ሄሳ ግሾ፥ ባንታ ስእዳባስነ በእዳባ ኡባስ ፆሳ ቦንችሸነ ጋላትሸ ስምዶሶና።

የሱሳ ፆሳ ኬ ኤፍዶሶና

²¹ ሆስፑን ቃማን፥ ቃፃሮ ዎደይ ጋክን፥ እ ቃንታናፐ ስን ኪታንቾይ ዎዳ ሱንን የሱሳ ጌተትስ።

²² ሙሰ ዎጋ መላ ኤንታ ጌሻተ ዎደይ ፖለትዳፐ ጉየ ዮሰፋራነ ማይራምራ ዮጋ ናኣ ባንታ ጎዳስ እማናዉ የሩሳላመ ብዶሶና።

²³ ሄስካ፥ ጎዳ ዎጋን፥ “አደ ግድዳ ባይራ ናእ ኡባይ ጎዳስ ዱማትዳይሳ ግዶ” ጌተትድ ፃፈትዳይሳ ፖላናሳ።

²⁴ ቃስ ጎዳ ዎጋን፥ ናምኡ ኩራቾ ዎይኮ ሆለ ያርሻናዉ ኤፍዶሶና።

²⁵ ሄ ዎደ ጌሽነ አማኖራ ምኖ ግድዳ ስሞና ጌተትያ አስ የሩሳላመን ደኤስ። እ እስራኤለታ አቶተ ናግሸ ደኤስ። ጌሻ አያናይካ እያ ቦላ ደኤስ።

²⁶ ቃስ ክርስቶሳ በኦና ሀይቆናይሳ ጌሻ አያናይ እያዉ ቆንጭስን ኤርድ ደኤስ።

²⁷ እ ሄ ጋላስ አያናይ ካለን ፆሳ ኬ ብስ። ናኣ አየራነ አዋራ ዎጋ ፖላናዉ ዮጋ ናኣ የሱሳ ኤክድ ገልዳ ዎደ፥

²⁸ ስሞን ሞክ ኤክድ ናኣ እድምድ፥

²⁹ “ጎዳዉ ነ ታዉ ገልዳ ቃላ መላ፥ ሀእ ነ አይልያ ሳሮን ሞይዛ።

³⁰ ታ አይፈይ አሳ ኡባ ስንን ነ ጊግስዳ፥

³¹ ነ አሹዋ በእስ።

³² ሄስካ ካዎተታ ኡባስ፥ ፆሳ ኦግያ ቆንጭስያ ፖኦ፥ ነ አሳ እስራኤለስካ ቦንቾ” ያግድ ፆሳ ጋላትስ።

³³ ዮሰፋራነ ማይራምራ እያዉ ኦደትዳባን ማላለትዶሶና።

³⁴ ስሞን ኤንታ አንጅስ። አየ ማይራምኮ፥ “ሄኮ ዳሮ አሳ ዎዛና ቆፋይ ቆንጫና መላ፥ እስራኤለን ደእያ ዳሮታስ ኤንታ ኩንደስነ ደንዱዋስ ፆሳን ዶረትስ።

³⁵ ቃስ ኤቀተይሳታስ ማላ ግዳና። ነ ሸምፑዋራካ ቃስ ማሽ አና” ያግስ።

³⁶ ቃስ አሴራ ያራፐ ግድዳ ፋኑኤላ ናእያ ሃና ጌተትያ ናበይ ደአዉሱ። እያ ዳሮ ጭማሱ፤ እያ ባ ኮይሮ አዝናራ ላፑን ላይ ደአሱ።

³⁷ እ አዝናይ ሀይቅን ሆስፑን ታማነ ኦይዱ ላይ ግዳና ጋካናዉ ቃማነ ጋላስ ፓጨይ ባይና ዎሳንነ ፆማን ፆሳ ኬን ሀጋዛሱ።

³⁸ እያ ሄ ሳትያን ባዳ ፆሳ ጋላታሱ፤ የሩሳላመ ዎዘተ ናግያ ኡባስ ዮጋ ናአባ ማርካታሱ።

³⁹ ዮሰፋራነ ማይራምራ ጎዳ ህግያን ኪተትዳ ዎጋ ኡባ ፖልዳፐ ጉየ ጋልላ ቢታን ደእያ ባንታ ካታማ ናዝረተ ስምዶሶና።

⁴⁰ ናአይ ድጭሸነ ምንሸ ብስ። ጭንጫተን ኩምስ፤ ፆሳ አ ኬሀተይ እያ ቦላ ደኤስ።

የሱሲ ፆሳ ኬን

⁴¹ ዮሰፋራነ ማይራምራ ፓስካ ባኣለ ቦንቻናዉ ላይን ላይን የሩሳላመ ቦሶና።

⁴² የሱሳስ ታማነ ናምኡ ላይ ግድያ ዎደ ካሰ ሜዘትዳይሳዳ ባኣለ ቦንቻናዉ ብዶሶና።

⁴³ ባልያ ቦንችዳፐ ጉየ ሶ ስምያ ዎደ ናአይ የሱሲ የሩሳላመን አትስ። ሽን ዮሰፋራነ ማይራምራ እ የሩሳላመን አቶይሳ ኤርቦኮና።

⁴⁴ እ ሶ ስምያ አሳራ ዎላ ደእያ ዳንን ኤንቲ እስ ጋላሳ ኦገ ብዶሶና። እ ባይናይሳ ኤርዳፐ ጉየ ባንታ ዳቦታነ ላገታ ማታን ኮይዶሶና።

⁴⁵ እ ያን ይን ኮይሸ ጉየ የሩሳላመ ጋካናዉ ብዶሶና።

⁴⁶ ሄ ጋላሳፐ ጉየ ፆሳ ኬን አስታማረታ ግዶን ኡትድ ኤንታባ ስእሸነ ኤንታ ኦይችሸ ደእሽን ደምዶሶና።

⁴⁷ እያ ስእያ ኡባይ እያ አኬካንነ ዛሩዋን ማላለትዶሶና።

⁴⁸ ሶ አሳይ እያ ደምዳ ዎደ ማላለትዶሶና። እያ አያካ፥ “ታ ናአዉ፥ አይስ ኑና ሀይሳዳ ኦዲ? ነ አዋራነ ታራ ነና ኮይሸ ኡንኤትዳ” ያጋሱ።

⁴⁹ የሱሲ ኤንታኮ፥ “ታና አይስ ኮዬቲ? ታ፥ ታ አዋ ኬን ዳናዉ በሰይሳ ኤረከት” ያግስ።

⁵⁰ ሽን እ ኤንታኮ ግዳባ ኤንቲ አኬክቦኮና።

⁵¹ ሄሳፈ ጉየ፥ ኤንታራ እስፈ ናዝረተ ካታማ ብስ። ኤንታዉ ኪተትሸ ደእስ። እያ አይያ ሄ ኡባ ባ ዎዛናን ዎዳ ናጋሱ።

⁵² የሱሲ፥ ጭንጫተን፥ ጌሳንነ ቴማን ፆሳ ስንንነ አሳ ስንን ድጭስ።