Luqaasa 19 - ጌሻ ማፃፋ

ቃራፃ ቃንፅስያ ዛክዮሳ

¹ የሱሲ እያርኮ ገልድ አስ።

² ያን ዛክዮሳ ጌተትያ ቃራፃ ቃንፅሰይሳታ ሀላቃይ ደኤስ። እ ዳሮ ዱረ።

³ እ የሱሲ ኦነኮ በአናዉ ኮይስ። እ ቃን ግድያ ግሾ አሳ ዳሮተፈ ደንዶይሳን የሱሳ በአናዉ ዳንዳእቤና።

⁴ የሱሳ በአናዉ ኮይድ እ ብያ ኦግያስ ስን ዎፅ ብድ እስ ቦባ ም ቦላ ከይስ።

⁵ የሱሲ ሄ በሳ ጋክሸ ቁ ግድ በእድ፥ “ዛክዮሳ፥ ሀች ታ ነ ሶን ፔአናዉ በሲያ ግሾ ኤለ ዎ” ያግስ።

⁶ እ ኤለስ ዎድ ኡፋይሳን የሱሳ ሞክስ።

⁷ ሄ በሳን ደእያ አሳ ኡባይ ሄሳ በእድ፥ “ናጋራንቹዋ ሶ ገልድ ሞከታንዉ ሀኔስ” ያግድ ዙዙምዶሶና።

⁸ ግዶሽን፥ ዛክዮስ ኤቅድ ጎዳኮ፥ “ጎዳዉ፥ ሄኮ ታዉ ደእያ ሻሎ ኡባፈ ባጋ ማንቆታስ እማና። አሳፐ አይባካ ዎርዶን ባለዳ ኤክዳባ ግድኮ ኦይዱ ኩሸ ዛራና” ያግስ።

⁹ የሱሲ ቃስ፥ “ሀ ኡራይ አብራሃመ ናአ ግድዳ ግሾ ሀች አቶተይ ሀ ሶ ይስ።

¹⁰ አሳ ናአይ ይዳይ ይዳይሳ ኮያናሳነ አሻናሳ” ያግስ።

ታሙ ምናነ ሌምሶ

¹¹ አሳይ ሄሳ ስእያ ዎደ፥ የሱሲ የሩሳላመ ማታትዳ ግሾነ ፆሳ ካዎተይ ሀእ ማታራ ቆንጫና ዳንዳ ግሾ ኤንታዉ ሌምሶ ኦድስ።

¹² ሄሳ ግሾ፥ የሱሲ፥ “እስ ግታ አስ ደኤይስ ባዉ ካዎተ ኤክድ ያናዉ ሀራ ቢታ ብስ።

¹³ እያዉ ኦያ አይለታፐ ታማታ ፄግድ እሱዋስ እሱዋስ ታሙ ምናነ እምድ ‘ታ ስማዳ ያና ጋካናዉ ሀ ሚሽያራ ዛልእተ’ ያግስ።

¹⁴ “ሄ ቢታ አሳይ እያ እፅያ ግሾ፥ ሀ ኡራይ ኑ ቦላ ካዎታና መላ ኑ ኮዮኮ ያግድ አሰ እያ ጉየራ ኪትዶሶና።

¹⁵ “ግዶሽን፥ ሄ ኡራይ ካዎ ግድድ ባ ቢታ ስምስ። ሄ ታሙ አይለት እ እምዳ ሚሽያን አይ መላ ዛልእድ ዎስዳኮ ኤራናዉ ኮይድ ኤንታና ፄግስስ።

¹⁶ “ኮይሮይስ ይድ፥ ‘ጎዳዉ፥ ነ ታዉ እምዳ ሚሸይ ሀራ ታማ ዎስ’ ያግስ።

¹⁷ “እያ ጎዳይ፥ ‘ነኖ አማነትዳ አይልያዉ ሎኦ ኦዳሳ። ኔኒ ጉባን አማነትዳ ግሾ ነዉ ታሙ ካታማታ ቦላ ማታ እማስ’ ያግስ።

¹⁸ “ናምአንይ ይድ፥ ‘ጎዳዉ፥ ነ ታዉ እምዳ ሚሸይ ሀራ እቻሻ ዎስ’ ያግስ።

¹⁹ “ጎዳይ እያኮ፥ ‘ነዉካ ቃስ እቻሹ ካታማታ ቦላ ማታ እማስ’ ያግስ።

²⁰ “ሄኮ ሄንይ ይድ፥ ‘ጎዳዉ፥ ታ ጩርቃን ፃፃዳ ናግዳ ነ ሚሽያ ሀናሹ።

²¹ አይስ ጊኮ፥ ኔኒ ነባ ግዶናባ ኤከይሳነ ነ ዘሮናባ ጫክያ ኢታ አስ ግድያ ግሾ ነዉ ያያስ’ ያግስ።

²² “እያ ጎዳይ ዛሪድ፥ ‘ነኖ ኢታ አይልያዉ ነ ዶና ታ ነና ፕርዳና። ታ ዎናባ ኤከይሳነ ዘሮናባ ጫክያ አስ ግደይሳ ነ ኤርኮ፥

²³ ታ ያዳ ታ ሚሽያ ዎራ ኤካና መላ ዛልእያ አሳስ አይስ እማብኪ?’

²⁴ “እያ ጎዳይ ሄ በሳን ኤቅዳይሳታኮ፥ ‘እያራ ደእያ ሚሽያ ኤክድ ታማ ዎስዳይሳስ እምተ’ ያግስ።

²⁵ “ኤንቲ፥ ‘ጎዳዉ፥ እያዉ ካሰካ ታሙ ምናነይ ደኤስ’ ያግዶሶና።

²⁶ “ጎዳይ፥ ታ ህንተዉ ኦዳይስ፤ ‘ደእያ ኡባስ ሀር ጉዠታና፥ ሽን ባይናይሳፈ ሀራይ አቶ እያዉ ደእያራካ ኤከታና።

²⁷ ግዶሽን፥ ታ ኤንታ ቦላ ካዎቶና መላ ኮይዳይሳታ ሄ ታ ሞርከታ ሀ ታ ስን ኤህድ ጎራዕተ’ ግስ” ያግስ።

ግታ ቦንቾን የሩሳላመ ገሉዋ

²⁸ የሱሲ ሄሳ ኦድዳፐ ጉየ፥ ኤንታፈ ስን ሄመትድ የሩሳላመ ብስ።

²⁹ ሻማሆ ዙማ ቦላ ደእያ ቤተፋገነ ብታነ ማትዳ ዎደ ባ ታማረታፐ ናምአታ ኪትድ፥

³⁰ “ህንተ ስንን ደእያ ጉታ ቢተ፥ ህንተ ያ ጋክያ ዎደ ኦንካ ቶጎና ቃሸትድ ደእያ ሀረ ማር ደማና። እያ ብልድ ሃ ኤክ ዪተ።

³¹ ኦንካ፥ ‘አይስ ብሌቲ?’ ግድ ኦይችኮ፥ ‘ጎዳይ እያ ኮዬስ’ ያግተ” ያግስ።

³² ኪተትዳይሳት ብድ እ ግዳይሳዳ ሀንን በእዶሶና።

³³ ኤንቲ ሀረ ማራ ብልሽን ጎዳት በእድ፥ “ሀረ ማራ አይስ ብሌቲ?” ያግዶሶና።

³⁴ ኤንቲ ዛሪድ፥ “ጎዳይ እያ ኮዬስ” ያግዶሶና።

³⁵ ያፐ ሀረ ማራ የሱሳኮ ኤህዶሶና። ባንታ ማኡዋ ሀረ ማራ ዞኮን የግድ የሱሳ ሀረ ማራ ቦላ ኡትስዶሶና።

³⁶ አሳይካ እ ብያ ኦግያ ቦላ ባንታ ማኡዋ ሂፅዶሶና።

³⁷ ሻማሆ ዙማ ዱገ ዎስያ ኦግያኮ ማትያ ዎደ፥ ታይቦን ኬህ ዳሮ አሳይ ኤንቲ በእዳ ማላልስያባን ኡፋይትድ ባንታ ቃላ ቁ ኦድ፥

³⁸ “ጎዳ ሱንን ያ ካዎይ አንጀትዳይሳ ሳሉዋን ሳሮይ ኡባፈ ቃ ሳሉዋን ቦንቾይ ፆሳስ ግዶ” ያግድ ፆሳ ጋላትዶሶና።

³⁹ አሳ ግዶፈ እስ እስ ፋርሳወት የሱሳኮ፥ “አስታማርያዉ፥ ነ ታማረታ ሀይዝተ ጋዳ ሀንቀታ” ያግዶሶና።

⁴⁰ እ ኤንታኮ፥ “ኤንቲ ስእ ጊኮ ሹቻት ዋሳና” ያግስ።

⁴¹ የሱሲ የሩሳላመ ማትሸ ካታማ በእድ እያዉ ዬክስ።

⁴² “ነዉ ሳሮ ግዳናይሳ ሀች ነ ኤርዳባ ግድያኮሽን፥ ሀእ ነ አይፍያፐ ጌምስ።

⁴³ ነ ሞርከት ነ ዩሹዋ ድርድ ዱማ ዱማ ኦግያራ ነና ተቅድ ኡንኤያ ዎደይ ያና።

⁴⁴ ነናነ ነ ድርሳ ጋርሳን ደእያ ነ ናይታ ይሳና። እስ እስ ሹቹ ደንድ ላላና፥ አይስ ጊኮ ፆሳይ ነና አሻናዉ ያ ዎድያ ኤራባካ” ያግድ እዉ ዬክስ።

⁴⁵ ሄሳፈ ጉየ፥ የሱሲ ፆሳ ኬ ገልድ ዛልኤይሳታ ያፐ ጎድስ።

⁴⁶ ቃስ፥ “ ‘ታ ኬይ ፆሳ ዎስያ ኬ ግዳና’ ግድ ፃፈትስ፥ ሽን ህንተ ታ ኬ ፓንጋታ ጎንጎሎ ኦደታ” ያግስ።

⁴⁷ ጋላስ ጋላስ ፆሳ ኬን ታማርሴስ። ካህነታ ሀላቃት፥ ህገ አስታማረትነ ደርያ ጭማት እያ ዎናዉ ኦገ ኮዮሶና።

⁴⁸ ግዶሽን፥ አሳ ኡባይ እያ ትምርትያ ባንታ ዎዛና የግድ ስእያ ግሾ፥ ኤንታዉ ኦናባይ ይስ።