Luqaasa 18 - ጌሻ ማፃፋ

አምኤ ዎሳ ሌምሶ

¹ የሱሲ ባ ታማረታ አዛሎና ኡባ ዎደ ዎሳና መላ ታማርሳናዉ ኮይድ ያግድ ሌምሶ ኦድስ፦

² “እስ ካታማን ፆሳስ ያሸቶና፥ አሳስ ዬላቶና እስ ዳይን ደኤስ

³ ሄ ካታማን እስ አምእያ ደአዉሱ። እያካ፥ ‘ታ ግዶንነ ታ ሞርክያ ግዶን ደእያ ሞቱዋ ፕርዳ’ ያጋዳ ኡባ ዎደ ሄ ዳይናኮ ስመረታዉሱ።

⁴ ዳይናይ ጉ ዎደስ እ ኦዳ ስኦና እፅስ፥ ሽን ጉየፐ ባ ዎዛናን፥ ‘ታኒ ፆሳስ ያዮና፥ አሳስ ዬላቶና እፅኮካ፥

⁵ ሀ አምእያ ታና ዋይስያ ግሾ እዉ ፕርዳና፤ ያቶና እፅኮ ኡባ ዎደ ያዳ ታና ሳለና’ ” ያግድ ቆፕስ።

⁶ ጎዳይካ፥ “ጌላ ዳይናይ ግዳይሳ ስእደታ፤

⁷ ፆሳይ ቃማነ ጋላስ እያኮ ዋስያ ባ ዶርዳይሳታስ ፕርደነዬ? ኤንታና ማዳናዉ ጋምእዬ?

⁸ ታ ህንተዉ ኦደይሳ ስእተ፥ ኤለስድ ፕርዳና። ግዶሽን፥ አሳ ናእ ያ ዎደ ሳአ ቦላ አማኖ ደማንደሻ?” ያግስ።

ፋርሳውያነ ቃራፃ ቃንፅስያ ኡራ

⁹ ቃስ ዛሪድ፥ የሱሲ፥ ባንታና ፅሎ አሳዳ ኦድ ጬቀተይሳታስነ ሀራታ ካይሳታስ ሀይሳዳ ያግድ ሌምሶ ኦድስ፦

¹⁰ “ናምኡ አሳት ዎሳናዉ ፆሳ ኬ ብዶሶና። እሶይ ፋርሳወ ሀንኮይ ቃስ ቃራፃ ቃንፅስያ አስ።

¹¹ ፋርሳወይ ኤቅድ ባዉ ዎስሸ፥ ‘ፆሳዉ ታኒ ሀራታ መላ ቦንቃንቾ፥ ጌላነ ላይማትያ አስ፥ አዳ ቃስ ሀ ቃራፃ ቃንፅስያ ኡራ መላ ግዶና ግሾ ነና ጋላታይስ።

¹² ሳምንታፈ ናምኡ ቶሆ ፆማይስ፥ ታ ደምያባ ኡባፈ አስራታ ከሳይስ’ ያግስ።

¹³ “ሽን ቃራፃ ቃንፅሰይስ ሃሆን ኤቅድ ሀር አቶሽን ሳሎ ቁ ግድ ፄላናዉካ ያይድ ባ ትራ እጭሸ ‘ፆሳዉ፥ ታና ናጋራንቹዋ ማራርክ’ ግድ ዎስስ።

¹⁴ ታ ህንተዉ ኦደይሳ ስእተ፤ ፋርሳውያፐ ሀይስ ቃራፃ ቃንፅሰይስ ፆሳ ስንን ፅሎ ግድድ ባ ሶ ስምስ። አይስ ጊኮ፥ ባና ቁ ቁ ኦያ አስ ካዉያና፥ ባና ካዉሽያ አስ ቁ ቁ ጋና” ያግስ።

የሱሳነ ዮጋ ናይታ

¹⁵ የሱሲ ዮጋ ናይታ ቦላ ባ ኩሽያ ዎድ አንጃና መላ አሳይ እያኮ ኤሆሶና። የሱሳ ታማረት ሄሳ በእድ “አይስ የሱሳኮ ኤሄቲ?” ያግድ ካጭዶሶና።

¹⁶ ሽን የሱሲ ናይታ ባኮ ፄግድ፥ “ዮጋ ናይት ታኮ ያናይሳ ድጎፍተ፤ ዮ ጊተ። አይስ ጊኮ፥ ፆሳ ካዎተይ ኤንታዳ ሀንዳይሳታሳ።

¹⁷ ታኒ ህንተዉ ቱማ ኦዳይስ፤ ፆሳ ካዎተ ዮጋ ናይታ ኤኮናይ ኦንካ ያ ገለና” ያግስ።

ዱረ ኡራ ኦይሻ

¹⁸ አይሁደ ሀላቃታፐ እሶይ፥ “ኬሀ አስታማርያዉ፥ መርና ደኦ ደማናዉ አይ ኦ?” ያግድ ኦይችስ።

¹⁹ የሱሲ እያኮ፥ “አይስ ታና ኬሀዉ ያጋዳ ፄጋይ? እስ ፆሳፈ አትሽን፥ ሀር ኬህ ባዋ።

²⁰ ላሞፋ፥ ዎፓ፥ ካይሶቶፓ፥ ዎርዶ ማርካቶፋ፥ ነ አዋነ ነ አይዉ ቦንቻ” ግያ ኪታ ኤራይ ግድ ኦይችስ።

²¹ ኡራይካ፥ “ሄሳታ ኡባ ታኒ ናአተፈ ዶማዳ ናጋሸ ጋምአስ” ያግስ።

²² የሱሲ ሄሳ ስእዳ ዎደ፥ “ህዛ፥ ነዉ እስባይ ፓጬስ፤ ነዉ ደእያባ ኡባ ባይዛዳ ማንቆታስ እማ፤ ሳሎን ነና ሻሎይ ናጌስ። ያታ ስማዳ፥ ታና ካላ” ያግስ።

²³ ሽን ኡራይ ሄሳ ስእዳ ዎደ እያዉ ዳሮ ሻሎይ ደእያ ግሾ ዳሮ ቂሮትስ።

²⁴ የሱሲ ኡራ በእድ፥ “ዱረ አሳስ ፆሳ ካዎተ ገሎይ ዋንድ ኡንአንደሻ?

²⁵ ዱረይ ፆሳ ካዎተ ገላናይሳፈ ግማለይ ናርፐ ሉሆራ ካንይስ ካዉዬስ” ያግስ።

²⁶ ሄሳ ስእዳ አሳይ፥ “ሄሳ ግድኮ ኦን አታኔ?” ያግዶሶና።

²⁷ የሱሲ፥ “አሳስ ዳንዳኤቶናባይ ፆሳስ ዳንዳኤቴስ” ያግስ።

²⁸ ጰፅሮስ፥ “ሄኮ ኑኒ ኑባ ኡባ አግድ ነና ካልዳ” ያግስ።

²⁹ “የሱሲ ቱማ ታ ህንተዉ ኦዳይስ፤ ፆሳ ካዎተስ ግድ ባ ኬ ዎይኮ ባ ማችዉ ዎይኮ ባ እሻታ ዎይኮ ባ አዋነ ባ አይዉ ዎይኮ ባ ናይታ አግዳይ፤

³⁰ ሀ ዎድያን ዳኮ ዳሮ፥ ያና አላመን መርና ደኦ ኤኮናይ ኦንካ ባዋ” ያግስ።

የሱሲ ባ ሀይቁዋባ ሄን ኦድስ

³¹ የሱሲ ታማነ ናምአታ ባኮ ፄግድ፥ “አነ የሩሳላመ ቦስ፥ ናበት አሳ ናአባ ፃፍዳባ ኡባይ ያን ፖለታና።

³² እ አይሁደ ግዶና አሳስ አድ እመታና። ኤንቲ እያ ቶቻና፥ ጫያናነ እያ ቦላ ጩታና።

³³ እያ ጋራፍዳፐ ጉየ፥ ዎና፥ ሽን ሄን ጋላሳን እ ሀይቆፐ ደንዳና” ያግስ።

³⁴ ሽን እያ ታማረት ሄ ኡባፈ እስባካ አኬክቦኮና። እያ ፁራይ ኤንታዉ ቆሰትዳ ግሾ እ ዎይግዳኮ ኤርቦኮና።

ቆቀይ ፄልስ

³⁵ የሱሲ እያርኮ ማትያ ዎደ እስ ቆቀ ኡራይ ኦገ ጋፃን ኡትድ ዎሴስ።

³⁶ ቆቀ ኡራይ አሳይ ሄ በሳራ አሽን ስእድ፥ “እ አይቤ?” ግድ ኦይችስ።

³⁷ ኤንቲ፥ “ናዝረተ የሱሲ ሀይሳራ አስ” ያግዶሶና።

³⁸ እ፥ “ዳዊታ ናአዉ፥ የሱሳ፥ ታና ማራርክ” ያግድ ዋስስ።

³⁹ ስን ስን ብያ አሳት፥ “ስእ ጋ” ግድ ሀንቀትዶሶና። ሽን እ፥ “ዳዊታ ናአዉ፥ ታና ማራ” ያግድ ዳርስድ ዋስስ።

⁴⁰ የሱሲ ኤቅድ ኡራ ባኮ ኤሀና መላ ኪትስ። ኡራይካ፥ እያኮ ሺቅን፥

⁴¹ “ታ ነዉ አይ ኦና መላ ኮያይ?” ያግድ ኦይችስ። ቆቀይ፥ “ጎዳዉ ታ ፄላናዉ ኮያይስ” ያግስ።

⁴² የሱሲ፥ “ፄላ፥ ነ አማኖይ ነና ፓስ” ያግስ።

⁴³ ኡራይ ኤለስድ ፄል አግስ። ፆሳ ቦንችሸ የሱሳ ካልስ። አሳ ኡባይ ሄሳ በእድ ፆሰ ጋላትዶሶና።