Luqaasa 16 - ጌሻ ማፃፋ

አማነቶና ሹማ ሌምሶ

¹ የሱሲ ባ ታማረታኮ፥ “እስ ዱረ ኡራስ እያፐ ጋርሳራ እስ ሹም ደኤስ። ሄ ሹማይ ባ ጎዳ ሻሉዋ ቶቼስ ግያ ዎረይ ኬ አዋ ጋክስ።

² ኬ አዋይ ሹማ ፄግስድ፥ ‘ታኒ ዎይግያባ ስአድና? ህዛፐ ኔኒ ታ ኬስ ሹማ ግዳዳ ኦናዉ ዳንዳኦና ግሾ፥ ታ ሻሉዋ ታዉ ሼ’ ያግስ።

³ “ሄ ሹማይ ባ ዎዛናን ሀይሳዳ ያግድ ቆፕስ፦ ‘ታ ጎዳይ ታና ሹማተፈ ዎና ሀኔስ፥ ጎያ አቃናዉ ዎልቅ ባዋ፥ ዎሳ ማናዉ ዬላዬስ፤ ያትን ታ ዋኖ?

⁴ ሹማተፈ ታ ዎያ ዎደ አሳይ ታና ሞካና መላ ኦናባ ታ ኤራይስ’ ያግስ።

⁵ “ሄሳ ግሾ፥ እያ ጎዳ አጮይ ደእያ አሳ እሱዋ እሱዋ ፄግ ኤህድ ኮይሮ ኡራኮ፥ ‘ነ ቦላ ታ ጎዳ አጮይ አይ መል ደኢ?’ ያግድ ኦይችስ።

⁶ “እ፥ ‘ላታሙ ባርሜለ ዛይተ አጮይ ደኤስ’ ያግስ። “ሹማይ፥ ‘ዉለ ዋርቃትያ ሄኤ፥ ኤለሳዳ፥ ታሙ ባርሜለ ዛይተ አጮይ ደኤስ ጋዳ ፃፋ’ ያግስ።

⁷ “ሄሳፈ ካልድ ናምአንዋኮ፥ ‘ነዉ አፑን ደኢ?’ ያግስ። “እ፥ ‘ሄ ፄታነ ላፑን ታሙ ኩንታለ ግስተ አጮይ ደኤስ’ ያግስ። “ሹማይ፥ ‘ነ ዉለ ዋርቃትያ ሄኤ፥ ኤለሳዳ፥ 296 ኩንታለ ያጋዳ ፃፋ’ ያግስ።

⁸ ኬ አዋይ አማነትቦና ሹማ እያ ጭንጫተስ ናሽስ። ሀ አላምያ ናይት አሰ ኦይን ፖኦ ናይታፐ አዳ ዎዛናማታ።

⁹ “ሄሳ ግሾ፥ ታ ህንተዉ ኦዳይስ፤ ሀ አላምያ ሚሸይ ዉርያ ዎደ መርና ኬን ሞከታና መላ ሀ ሚሽያራ ህንተዉ ላገታ ሻምተ።

¹⁰ ኡባፈ ጉባን አማነትዳይ ዳሮባን አማነትዳይሳ ግዴስ። ቃስ ኡባፈ ጉባን አማነቶናይስ ዳሮባን አማነተና።

¹¹ ህዛ፥ ሀ አላመ ሚሸን ህንተ አማነቶና እፅኮ፥ ቱማ ሚሸ ህንተዉ ኦን ሀዳራ እማኔ?

¹² ህንተ ሀራ አሳ ሚሸን አማነቶና እፅኮ፥ ህንተ ቡዞ ሚሸ ህንተዉ ኦን እማኔ?

¹³ “እስ አይለይ ናምኡ ጎዳታስ ሃረታናዉ ዳንዳኤና። እሱዋ እፅኮ ሀንኩዋ ዶሴስ ዎይኮ እሱዋኮ ሺቅኮ ሀንኩዋ ካስ። ሄሳዳካ፥ ህንተ ፆሳስነ ሚሸስ ሃረታናዉ ዳንዳኤከታ።”

¹⁴ ሚሸ ዶስያ ፋርሳወት ሄሳ ስእዳ ዎደ የሱሳ ቀልቅስዶሶና።

¹⁵ እ፥ “ህንተ፥ ህንተና አሳ ስንን ፅልሴታ፥ ሽን ፆሳይ ህንተ ዎዛና ኤሬስ። አሳ ስንን ቦንቸትዳይስ ፆሳ ስንን ቦረትዳይሳ።

¹⁶ “ሙሰ ህገይነ ናበታ ኪታይ ዮሃንሳ ጋካናዉ ህንተዉ ኦደትሸ ጋምእስ። ሄሳፈ ጉየ፥ ፆሳ ካዎተ ዎንገላይ ሳባከትሸ ጋምእስ። አስ ኡባይ ያ ገላናዉ ዳፈቴስ።

¹⁷ ግዶሽን፥ ህግያፈ እስ ላፋ ፕዳለይ አታናፐ ሳሎይነ ሳእ አይስ ካዉዬስ።

¹⁸ “ባ ማችዉ የድድ ሀራ ኤክያ ኡባይ ላሜስ። ባ አዝናፐ አንጀትዳሮ ኤከይስካ ላሜስ” ያግስ።

ዱረ ኡራነ አላዛራ

¹⁹ “አልኦነ አሌቆ አፍላ ማእያ፥ ሳእ እንጀትን ጋላስ ጋላስ ኡፋይሳን ደእያ እስ ዱረ አስ ደኤስ።

²⁰ ሀር ቃስ አሳተይ ኩመ ማዱንፅዳ እስ አላዛራ ጌተትያ ማንቆይ ሄ ዱረ ኡራ ካረን የገትድ አትዳይስ ደኤስ።

²¹ ኮሻፐ ደንዶይሳን ዱረ ኡራ ጋይታፐ ዎያ ቲፍያ ማናዉ አሞትሸ ደኤስ። ሀር አቶሽን፥ ካናት ይድ እያ ማዱን ላጮሶና።

²² “ሄ ማንቆይ ሀይቅስ፤ ኪታንቾት እያ አብራሃመ ክኦ ኤፍዶሶና። ቃስ ዱረ ኡራይካ ሀይቅድ ሞገትስ።

²³ ስኦለን ኡንኤትድ ደእሸ ቁ ግድ ሃሆን አብራሃመነ እያ ክኦን ደእያ አላዛራ በእስ።

²⁴ እ፥ ‘አዋዉ አብራሃመ፥ ታዉ ቃታርክ፤ ሀ ታማ ላጮን ኡንኤታዳ ደእያ ግሾ አላዛር ባ ብራያ ሃን የድድ ታ እንፃርሳ ላኮና መላ ሀያና እያ የዳርክ’ ያግድ ዋስስ።

²⁵ “ሽን አብራሃመይ እያኮ፥ ‘ታ ናአዉ፥ ነ ሳአን ደእያ ዎደ ሎኦባታ ኤክዳይሳ፥ ቃስ አላዛር ኢታባታ ኤክዳይሳ አኬካ። ሽን ሀእ እ ሀይሳን ኡፋይቴስ፥ ቃስ ኔኒ ዋየታሸ ደኣሳ’ ያግስ።

²⁶ ሀ ኡባፈ አድ፥ ‘ሃፐ ህንተኮ፥ ህንፐ ሃ ኑኮ አናዉ ኮየይሳት ፕኖና መላ ኑስነ ህንተዉ ግዶን ግታ አፎይ ደኤስ’ ያግስ።

²⁷ “ዱረ ኡራይ፥ ‘አዋዉ፥ ያኮ አላዛራ ታ አዋ ሶ ኪታና መላ ታ ነና ዎሳይስ።

²⁸ ታዉ እቻሹ እሻት ደእዶሶና፥ ኤንትካ ሀ ዋየ በሳ ዮና መላ ኤንታዉ ብድ ማርካቶ’ ያግስ።

²⁹ “ሽን አብራሃመይ፥ ‘ኤንታዉ ሙሰራነ ናበታራ ደኦሶና፤ ኤንቲ ኦድያባ ስኦና’ ያግስ።

³⁰ “ዱረ ኡራይ፥ ‘አዋዉ አብራሃመ፥ ሄሳ ግደና፤ እስ አስ ሀይቆፐ ደንድድ ቢኮ ኤንቲ ማሮታን ገላና’ ያግስ።

³¹ “አብራሃመይ፥ ‘ሙሰነ ናበታ ስኦና እፅኮ፥ ሀር አቶሽን ሀይቆፐ እስ አስ ደንድ ኦድኮካ አማኖኮና’ ያግስ።”