Luqaasa 15 - ጌሻ ማፃፋ

ይዳ ዶርሳ ሌምሶ

¹ እስ ጋላስ ቃራፃ ቃንፀይሳትነ ናጋራንቾት የሱሳ ትምርትያ ስአናዉ እያ ዩሾን ሺቅዶሶና።

² ሽን ፋርሳወትነ ህገ አስታማረት፥ “ሀይስ ኡራይ ናጋራንቾታ ሺሽድ ኤኬስ፥ ኤንታራ እስፈ ሜስ” ያግድ ዙዙምዶሶና።

³ የሱሲ ሀ ሌምሱዋ ኤንታዉ ያግድ ኦድስ፦

⁴ “ህንተ ግዶፈ እሱዋስ ፄቱ ዶርሳት ደእያባ ግድኮ ኤንታፈ እሶይ ይኮ ኡዱፉን ታማነ ኡዱፉናታ ባዞን አግድ ዮይሳ ደማና ጋካናዉ ኮዮናይ ኦኔ?

⁵ ደምዳ ዎደ ኡፋይትድ ባ ጋናን ቶክድ፥

⁶ ባ ሶ ስሜስ። ባ ላገታነ ሾሮታ ፄግድ፥ ‘ይዳ ታ ዶርሳ ደማስ፥ ታራ እስፈ ኡፋይትተ’ ያጌስ።

⁷ ሄሳዳካ፥ ማሮት ኮሾና ኡዱፉን ታማነ ኡዱፉን ፅሎታፐ አድ፥ ማሮታን ገልያ እስ ናጋራንቹዋ ጋሶን ሳሎን ግታ ኡፋይስ ግዴስ።

⁸ “ዎይኮ ታሙ ብር ደእያ እስ ማጫስያ ታማፈ ኢስያ ይኮ ደማና ጋካናዉ ፆምፐ ኦይዳ ኬ ፕታዳ ምን ኮዮናይ ኦኔ?

⁹ ደምዳ ዎደ ባ ላገታነ ባ ሾሮታ ፄጋዳ ‘ይዳ ታ እስ ብራ ደምዳ ግሾ ታራ ኡፋይትተ’ ያጋዉሱ።

¹⁰ ስእተ፥ ሄሳ መላ እስ ማሮተን ገልያ ናጋራንቹዋን ፆሳ ኪታንቾታ ስንን ኡፋይስ ግዴስ” ያግስ።

ይዳ ናአ ሌምሶ

¹¹ ዛሪድ የሱሲ፥ “እስ ኡራስ ናምኡ ናይት ደኦሶና።

¹² ኤንታፈ ካሎ ናአይ ባ አዋኮ፥ ‘ታ አዋዉ፥ ነ ሻሉዋፐ ታ ግሹዋ ታዉ እማ’ ያግስ። አዋይ ባ ሻሉዋ ባ ናይታስ ሻክስ።

¹³ ጉ ጋላሳፐ ጉየ፥ ካሎ ናአይ ባ ግሹዋ ኡባ፥ ቃች ኤክድ ሃሆ ቢታ ብስ። ያን አልታጫን ሻሉዋ ቶችድ ኦንግስ።

¹⁴ እ ባዉ ደእያባ ኡባ ዉርስዳፐ ጉየ ሄ ቢታ ኡባን ምኖ ኮሽ ከይን መቶትስ።

¹⁵ ሄሳ ግሾ፥ ሄ ቢታ አሳፐ እሱዋ ሶ ጋታ ገልስ። ኡራይ እያ ጉዱን ሄማና መላ ባ ሞ የድስ።

¹⁶ ጉዱንት ምያ ሀርቁዋፈ ማናዉ አሞትስ፥ ሽን እዮካ እያዉ እምያ አስ በንትቤና።

¹⁷ እ ባ ዎዛናኮ ስሚድ፥ ‘አፑን ታ አዋ አይለታስ ካ ዎራ ዎን ታ ሀይሳን ኮሻራ ሀይቃናዉ ጋካድና?’

¹⁸ ደንዳዳ ታ አዋኮ ባዳ፥ ‘ታ አዋዉ፥ ሳሎን ፆሳ፥ ሳአን ነና ቆሀስ።

¹⁹ ህዛፐ ነ ናአ ጌተታዳ ፄገታናዉ ታዉ በሶና ግሾ፥ ነ ሶን ደእያ አይለታፐ እሱዋዳ ታና ፓይዳ’ ያጋና” ያግስ።

²⁰ ሄሳ ግሾ፥ ደንድድ ባ አዋኮ ብስ። “ሀኖሽን፥ እ ቡሮ ሃሆን ደእሽን አዋይ ቃትድ፥ እያኮ ዎፅ ብድ፥ እድምድ ዬርስ።

²¹ ናአይካ፥ ‘ታ አዋዉ ሳሎን ፆሳ፥ ሳአን ነና ታ ቆሀስ። ህዛፐ ነ ናአ ጌተታዳ ፄገታናዉ በስከ’ ያግስ።

²² “እያ አዋይ አይለታ ፄግድ፥ ‘ኤለስድ ኡባፈ ሎኦ ግድዳ ማኦ ኤህድ እያ ማይዝተ፤ እያ ብራን ሳጋዮ፥ እያ ቶሆን ጫማ አተ።

²³ ሞ ጋታርመን ኤህድ ሹክተ፥ ሞስ፥ ኡፋይቶስ።

²⁴ ታ ናአይ ሀይስ ሀይቅስ፥ ሽን ሀእ ፓፅስ፤ ይስ፥ ሽን በንትስ’ ያግስ። ሄሳፈ ጉየ፥ ኡፋይስ ዶምዶሶና።

²⁵ “ሄ ዎደ ባይራ ናአይ ጎሻ ጋደን ደኤስ። ያፐ ይሸ ሶ ማትሽን የነ ጉፋ ግርስ ስእስ።

²⁶ እ፥ አይለታፐ እሱዋ ፄግድ ሀንያባይ አይበኮ ኤራናዉ ኦይችስ።

²⁷ አይለይ፥ ‘ነ እሻይ ሳሮ ይዳ ግሾ ነ አዋይ ሞ ጋታርመን እያዉ ሹክስ’ ያግስ።

²⁸ “ባይራ እሻይ ይሎትድ ሶ ገላናዉካ ኮይቤና። አዋይ ካረ ከይድ ሶ ገላና መላ እያ ዎስስ።

²⁹ ሽን እ ባ አዋኮ፥ ‘ሄኮ፥ ሀይሳ መላ ላይ ታ ነዉ አይለታዳ ነ ኪታፐ እሱዋካ ፓጭሶና ነዉ ኪተትን፥ ታኒ ታ ላገታራ ኡፋይታና መላ ሀር አቶሽን እስ ላቃ ዴሸ እማባካ።

³⁰ ሀኖሽን፥ ሀይስ ነ ናአይ ነ ሻሉዋ ላይማታራ ይስድ ይን፥ ሞ ጋታርመን ሹካዳሳ’ ” ያግስ።

³¹ “አዋይካ፥ ‘ታ ናአዉ፥ ኔኒ ኡባ ዎደ ታራ ደኣሳ፥ ታባ ኡባይ ኔሳ።

³² ሀይስ ነ እሻይ ሀይቅስ፥ ሽን ፓፅስ፤ ይስ፥ ሽን በንትስ። ሄሳ ግሾ፥ ዳሮ ኡፋይታናዉ በሴስ’ ያጋና” ያግስ።