Luqaasa 14 - ጌሻ ማፃፋ

የሱሲ ፋርሳውያ ሶን

¹ እስ ሳምባታ ጋላስ የሱሲ እስ ፋርሳወታ ሀላቃ ሶ ካ ማናዉ ገልያ ዎደ አሳይ ጫድ ፄሎሶና።

² ሄ በሳን ሻዉሄ ሀርገን ዋየትያ እስ አስ እያዉ ስን ባጋራ ዝንእስ።

³ የሱሲ ፋርሳወታነ ህገ አስታማረታ፥ “ሳምባታ ጋላስ ሀርጋንቾ ፓሶይ ዎገየ ዎጋ ግደኔ?” ያግድ ኦይችስ።

⁴ ኤንቲ ስእ ግዶሶና። የሱሲ ሀርገትያ ኡራ ቦች ፓድ ሞይዝስ።

⁵ “ቃስካ ህንተፈ እሱዋስ ናእ ዎይኮ ቦር ሳምባታ ጋላስ አፎን ዉልኮ፥ ኤለስድ ከሶናይ ኦኔ?” ያግድ ኦይችስ።

⁶ ኤንቲ እስባካ ዛራናዉ ዳንዳእቦኮና።

⁷ የሱሲ እማቱዋስ ፄገትዳይሳት ቦንቾ በሲ ዶርሽን በእድ፥ ሀ ሌምሱዋ ኦድስ፦

⁸ “እስ አስ ነና ያጋኖ ፄግኮ ቦንቾ በሳን ኡቶፋ። ኔፐ አድ ቦንቸትያ አስ ፄገታናዉ ዳንዳኤስ።

⁹ ህንተና ናምአታካ ፄግዳይስ ይድ፥ ‘ነ በሳ ሀ እማስ የዳ’ ግያ ዎደ ኔኒ ዬላታሸ ዝቃ በሲ ዎሳ።

¹⁰ ግዶሽን፥ ነ ፄገትዳ ዎደ ኮይሮታዳ ዝቃ በሲ በአዳ ኡታ። ፄጎይስ ይድ፥ ‘ታ ላግያዉ፥ ሀ ቦንቾ በሳን ኡታ’ ያጋና። ሄ ዎደ ኔራ እስፈ ፄገትዳ አሳ ኡባ ስንን ነ ቦንቸታና።

¹¹ ባና ቁ ቁ ኦያ ኡባይ ካዉያና፤ ባና ዝቅ ዝቅ ኦያ ኡባይ ቁ ቁ ጋና።”

¹² ቃስ የሱሲ እያ ሞክዳ ኬ አዋኮ፥ “ቁማ ዎይኮ ካሆ እማቶ ፄግያ ዎደ፥ ኔኒ ኩሸ ዛሮ ፄጎና መላ ነ ላገታ ዎይኮ ነ እሻታ ዎይኮ ነ ዳቦታ ዎይኮ ነ ዱረ ሾሮታ እማቶ ፄጎፓ።

¹³ ግዶሽን፥ ነ እማቶ ጊግስዳ ዎደ ማንቆታ፥ ዎበታ፥ ጉንዳታነ ቆቀታ ፄጋ፤ ኔኒ አንጀታና።

¹⁴ ሀይሳቲ ኩሸ ዛራናዉ ዳንዳኦና ግሾ ኩሸ ዛሮይ ጌሻታ ደንዶ ጋላሳን ነዉ ስማና” ያግስ።

ግታ እማቶ ሌምሶ

¹⁵ የሱሳራ ዎላ እማቶ ቦላ ኡቶይሳታ ግዶፈ እሶይ፥ ሄሳ ስእድ፥ “ፆሳ ካዎተን እማቶ ቦላ ኡተይስ አንጀትዳይሳ” ያግስ።

¹⁶ የሱሲ፥ “እስ አስ ግታ እማቶ ጊግስድ ዳሮ አሳታ ፄግስ።

¹⁷ እማቶይ ሞከትያ ሳተይ ጋክያ ዎደ፥ ፄገትዳ እማታ፥ ‘ሄኮ ኡባባይ ጊግስ፥ ሃ ዪተ’ ያግድ ፄጋናዳ ባ አይልያ ኪትስ።

¹⁸ “ሽን ኡባይካ ባንታ ጋሶ ጋሶ መዶሶና። እሶይ፥ ‘ሀእ ቡሮ ጋደ ሻምዳ ግሾ፥ ባዳ በአናዉ ኮሼስ፤ ሀያና ታና አጋርክ ያጋ’ ያግስ።

¹⁹ ሀንኮይ፥ ‘እቻሹ ዋ ቦር ሻማስ፤ ኤንታና ዋፃ በአና ግሾ ሀያና ታና ላንጮፋ’ ያግስ።

²⁰ ቃስ ሀራይ፥ ‘ታኒ ቡሮ መዳን ደእያ ግሾ፥ ያናዉ ዳንዳእከ’ ያግስ።

²¹ “አይለይ ስም ይድ ሄ ኡባ ባ ጎዳስ ኦድስ። ሄ ዎደ ያጋኖ አዋይ ሀንቀትድ አይልያኮ፥ ‘ኤለሳዳ ካታማን ደእያ ዎጋ ኦገታነ ዳጋላታ ባዳ፥ ማንቆታ፥ ዎበታ፥ ቆቀታነ ጉንዳታ ሃ ኤሀ’ ያግስ።

²² “አይለይ፥ ‘ታ ጎዳዉ፥ ነ ኪትዳይስ ኡባይ ፖለትስ፥ ሽን ሀእካ በሲ ደኤስ’ ያግስ።

²³ “ጎዳይ አይልያኮ፥ ‘ሆሮጋታ ቦላነ፥ ጋደ ግዶ ኦገታ ከያ፥ ታ ኬይ ኩማና ጋካናዉ ደምዳ ኡባ ያና መላ ኦ።

²⁴ ታ ህንተዉ ኦዳይስ፤ እማቶ ፄገትዳይሳታፐ ኦንካ ታ ግብራፐ ሞናይሳ ኤርተ’ ግስ” ያግስ።

ጎዳ ካሎይ ጭግስያ ጋተ

²⁵ ዳሮ አሳይ እያራ ዎላ ብሽን፥ የሱሲ ኤንታኮ ጉየ ስሚድ፥

²⁶ “ታኮ ያ ኡባይ ባ አዋነ ባ አይዉ፥ ባ ማችዉነ ባ ናይታ፥ ባ እሻታነ ባ ምቸታ፥ ሀር አቶሽን ባ ደኡዋ እፆናይ ታ ታማረ ግዳናዉ ዳንዳኤና።

²⁷ ባ ማስቃልያ ቶክድ ታና ካሎናይ ታ ታማረ ግዳናዉ ዳንዳኤና።

²⁸ “ህንተፈ እስ አስ ሹቻ ኬ ኬፃናዉ ኮይኮ፥ ኬ ኬፅድ ኦንጋናዉ አይ መላ ሚሸ ኮሽያኮ ኮይሮትድ ኤራናዉ ቆፕ በኦናይ ኦኔ?

²⁹ ሄሳ ግዶና እፅኮ፥ ሀ ኡራይ ባሶ ሹቹ ሂፅን ቁስተ ፆንኮ፥

³⁰ በእያ ኡባይ፥ ‘ሀ ኡራይ ግምበ ኦይክን ቁስታናዉ እያ ፆንስ’ ያግድ ቦሮሶና።

³¹ “ዎይኮ እስ ካዎይ ሀራ ካዎራ ኦለታናዉ ደንድሸ ላታሙ ሙኩሉ ኦላንቾታ ኤክ ያ ካዉዋራ ታሙ ሙኩሉ ኦላንቾታራ ኤቀታናዉ ዳንዳአናይሳነ ዳንዳኦናይሳ ኡትድ ዞረቶናይ ኦኔ?

³² ኤቀታናዉ ዳንዳኤቶናባ ግድኮ፥ ሄ ካዋራ ሃሆን ደእሽን ጊጋናዉ ኮይሮትድ ጭማ የድድ ኦይቼስ።

³³ ሄሳዳካ፥ ህንተፈ ኦንካ ባዉ ደእያባ ኡባ አጎና እፅኮ፥ ታ ታማረ ግዳናዉ ዳንዳኤና።

³⁴ “ማፅነይ ሎኦ፥ ሽን ማፅነይ ባ ማልኡዋ አግኮ፥ ዋንድ ማፅነ ጌተታናዉ ዳንዳኢ?

³⁵ ቢታተስነ አራዳተስ ማዶና ግሾ ዎራ የገቴስ። ህዛ፥ ስእያ ሀይ ደእያ አስ ስኦ” ያግስ።