Luqaasa 11 - ጌሻ ማፃፋ

የሱሲ ዎሳባ ታማርስስ

¹ እስ ጋላስ የሱሲ እስ በሳን ዎሴስ። ዎሳ ዉርስዳ ዎደ እያ ታማረታፐ እሶይ፥ “ጎዳዉ፥ ዮሃንስ ባ ታማረታ ዎሳ ታማርስዳ መላ ነካ ኑና ዎሳ ታማርሳ” ያግስ።

² የሱሲ፥ “ሀይሳዳ ያግድ ዎስተ፦ “ ‘ሳሎን ደእያ ኑ አዋዉ ነ ጌሻ ሱንይ አንጀቶ፤ ነ ካዎተይ ዮ።

³ ኑ ጋላሳ ካ ሀች ሀች ኑስ እማ።

⁴ ኑና ቆሄይሳታ ኑኒ አቶ ገይሳዳ፥ ኑ ናጋራ አቶ ጋ፤ ፓጨን ኑና ገልሶፋ’ ያግተ” ያግስ።

⁵ ካልድካ፥ የሱሲ ባ ታማረታኮ ያግስ፦ “ሌምሶስ ህንተፈ እሱዋስ ላገይ ደኤስ። እ ግድ ብላሄ ባ ላግያ ሶ ብድ፥ ‘ታ ላግያዉ፥ ምያባይ ደእኮ ታዉ እማርክ።

⁶ ታዉ ላገ ግድዳ እስ አስ ኦገፐ ይን፥ እያዉ አያባ ያስ’ ያግኮ፥

⁷ “እያ ላገይ ኬ ግዶን ግድድ፥ ‘ሀያና ታና ዋይሶፓ፥ ፐንገይ ጎርደትስ። ታ ናይትካ ታራ አርሳ ቦላ ዝንእዶሶና። ያንያ ግሾ፥ ደንዳዳ ነ ኮያባ እማናዉ ዳንዳእከ’ ያግዬ?

⁸ ታ ህንተዉ ኦዳይስ፤ ላገተ ግሾ ደንድድ እማናዉ ኮዮና እፅኮካ ዎሳን ሳለዳ ግሾ፥ ደንድድ ኮሽያባ ኡባ እሜስ።

⁹ “ሄሳ ግሾ፥ ታኒ ህንተዉ ኦዳይስ፤ ዎስተ ህንተዉ እመታና፤ ኮይተ ህንተ ደማና፤ ካረ ይድ ፄግተ ህንተዉ ዶየታና።

¹⁰ ጋሶይካ፥ ዎስያ ኡባይ ኤኬስ፤ ኮየይ ደሜስ፤ ካረ ይድ ፄገይሳስ ዶየቴስ።

¹¹ “ህንተኖ፥ አዋቶ ህንተ ግዶፈ ናእ ኡይ ዎስን፥ ሹቹ እመይ ኦኔ? ሞሎ ዎስን ሾሽ እመይ ኦኔ?

¹² ዎይኮ ጱጱለ ዎስኮ ኮርነ እሚ?

¹³ ህንተ ኢታታ ግድሸ ህንተ ናይታስ ሎኦባ እሞ ኤርኮ፥ ሳሎን ደእያ ህንተ አዋይ ዎሰይሳታስ ጌሻ አያና ዋትድ አድ እመኔ?” ያግስ።

የሱሳነ ብኤል-ዘቡላ

¹⁴ እስ ጋላስ የሱሲ፥ ዶና ሙምስዳ ቱና አያና እስ ኡራፐ ከስስ። ቱና አያናይ ከይዳ መላ ሙመ ኡራይ ኦደትስ። አሳይካ ማላለትስ።

¹⁵ ሽን እሶት እሶት፥ “ቱና አያና ሀላቃ፥ ብኤል-ዘቡላ ዎልቃን ቱና አያናታ ከሴስ” ያግዶሶና።

¹⁶ ሀራት ቃስ ፓጬስ ሳሎፐ ማላ በሳና መላ ኮይዶሶና።

¹⁷ ሽን የሱሲ ኤንታ ቆፋ ኤርድ ኤንታኮ፥ “ዎል ግዶን ሻከትያ ካዎተ ኡባይ ዬስ፤ ዎል ግዶን ሻከትያ ኬ ኩንዴስ።

¹⁸ ፃላሄይ ዎል ግዶን ሻከትኮ እያ ካዎተይ ዋንድ ምንድ ኤቃኔ? ህንተ ታና፥ ‘እ ቱና አያናታ ብኤል-ዘቡላ ዎልቃን ከሴስ’ ያጌታ።

¹⁹ ህዛ፥ ታኒ ቱና አያና ብኤል-ዘቡላ ዎልቃን ከስያባ ግድኮ ህንተ ናይት ኦደ ዎልቃን ከሶናሻ? ሄሳ ግሾ፥ ኤንቲ ህንተ ቦላ ፕርደይሳታ ግዳና።

²⁰ ሽን ታኒ ቱና አያናታ ፆሳ ብራን ከስያባ ግድኮ፥ ህዛ፥ ፆሳ ካዎተይ ህንተኮ ማትዳይሳ ኤርተ።

²¹ “ምኖ አስ ቶራነ ጎንዳለ ኦይክድ፥ ባ ኬ ናግያባ ግድኮ፥ እያ ሻሎይ ቦሸተና።

²² ሀኖሽን፥ እያፐ አድ ምኖ ግድዳ አስ ይድ፥ እያ ቆህድ ፆንኮ፥ አማነትዳ ቶራነ ጎንዳለ ዎስስ ኤክድ፥ እያ ሻሉዋ ቦንቅድ ሀራስ ሻኬስ።

²³ “ታራ ግዶናይስ ታና እፄስ፤ ታራ ሺሾናይስ ላሌስ።

²⁴ “ቱና አያናይ አሳፐ ከይዳ ዎደ ሸምፕያ በሲ ኮይድ ሃ ባይና ሶራ ዩዬስ። ሸምፕያ በሲ ይዳ ዎደ፥ ‘ታ ከይዳሱዋ ስማና’ ያጌስ።

²⁵ እ ስምያ ዎደ ኬይ ፕተትድ ሎእድ ደእሽን ደምስ።

²⁶ ሄሳፈ ጉየ፥ ብድ እያፐ አድ ኢትዳ ሀራ ላፑን ቱና አያናታ ኤክድ ዬስ። እያን ገልድ ዱሱ ኦይኬስ። ሄ ኡራስ ኮይሮይሳፈ አድ ጉየይስ ኢታ ግዴስ” ያግስ።

²⁷ የሱሲ ሄሳ ኦዳ ቦላ ደእሽን፥ እስ ማጫስ አሳ ጋፈ ደንዳዳ፥ ባ ቃላ ቁ ኦዳ፥ “ነና ቶክዳ ኡሎይነ ኔኒ ምዳ ንት አንጀትዶሶና” ያጋሱ።

²⁸ ሽን እ፥ “አንጀትዳይሳት ፆሳ ቃላ ስእድ ኪተተይሳታ” ያግስ።

ዮናሳ ማላታ

²⁹ ዳሮ አሳይ ሺቅዳ ዎደ የሱሲ፥ “ሀ የለተይ ኢታ የለተ፤ ኦራ ማላ ኮዬስ። ሽን ዮናሳ ማላታፐ አትሽን፥ ሀር ኤንታዉ እመተና።

³⁰ ዮናስ ናናወ አሳስ ማላ ግድዳ መላ አሳ ናእካ ሀ የለተስ ማላ ግዳና።

³¹ ዱገሀ ካውያ ፕርዳ ጋላስ ሀ የለተራ ደንዳዳ ፕርዳና። ጋሶይካ፥ እያ ሶሎሞነ ጭንጫተ ስአናዉ ቢታ ጋፃፐ ደንዳዳ ያሱ። ሄኮ ሶሎሞነፐ አይ ሀይሳን ደኤስ

³² ናናወ አሳት ፕርዳ ጋላስ ሀ የለተራ ደንድድ ኤንታ ቦላ ፕርዳና። ጋሶይካ፥ ዮናሳ ስብካትያን ማሮታ ገልዶሶና። ሄኮ፥ ዮናሳፐ አይ ሀይሳን ደኤስ” ያግስ።

አሳተ ፖኦ

³³ “ፆምፐ ኦይድ ቆሳ በሳን ዎይኮ ኦቶ ግዶን ዎያ አስ ዴና። አስ ፖኡዋ በአና መላ ቃ በሳን ዎስ።

³⁴ ነ አሳተስ ፖኦይ ነ አይፍያ። ነ አይፈይ ሎኦ ግድኮ፥ ነ ኩመ አሳተይ ፖኤስ። ነና አይፈይ ሳክኮ ነ አሳተይ ኡባይ ሜስ።

³⁵ ሄሳ ግሾ፥ ነ ጋርሳን ደእያ ፖኦይ ሞና መላ ናገታ።

³⁶ ህዛ፥ ነ ኩመ አሳተይ ፖኦ ግድኮ፥ ነ አሳተንካ ሀር ማ በሲ ይኮ፥ ነ አሳተ ኩመይ ዎልለ ፖኦ መላ ግዴስ” ያግስ።

ኡሱፑን አየታ

³⁷ የሱሲ ባ ኦዳ ኦንግዳ መላ እስ ፋርሳወይ ባራ ካ ማና መላ ፄግስ። የሱሲ፥ እያራ እስፈ ገልድ ግብራ ቦላ ኡትስ።

³⁸ ፋርሳወይ የሱሲ ካ ማናፐ ስን ኩሸ ሜጮናይሳ በእድ ማላለትስ።

³⁹ ጎዳይ እያኮ፥ “ህንተ ፋርሳወት ቁለስነ ሻተስ ቦላ ባጋ ሜጨታ። ሽን ህንተ ጋይ ኡዘተንነ ኢታተን ኩምስ።

⁴⁰ ህንተኖ፥ ኤያቶ፥ ካረ ባጋ መዳይ፥ ጋ ባጋ መዳይ እያ ግደኔ?

⁴¹ ሽን ቁልያንነ ሻትያን ደኤይሳ ማንቆታስ እምተ። ሄ ዎደ ህንተዉ ኡባባይ ጌሽ ግዳና።

⁴² “ፋርሳወቶ ህንተና አየ! ሳዎፐ፥ ፃሎተፐነ ሄሳ መላባፐ አስራታ ከሴታ። ሽን ፅሎተነ ፆሰ ዶሶይ ህንተናን ባዋ። ሀራታ አጎና ሀይሳታካ ኦናዉ በሴስ፥ ሽን አግደታ።

⁴³ “ፋርሳወቶ ህንተና አየ! አይሁደ ዎሳ ኬን ቦንቾ ኦይደ፥ ግያ ግዶን ቦንቾ ሳሮ ዶሴታ።

⁴⁴ “ማል ይን፥ አሳይ ኤሮና ቦላራ ብያ ዱፎ ዳነይሳቶ ህንተና አየ!” ያግስ።

⁴⁵ ህገ አስታማረይ ዛሪድ፥ “አስታማርያዉ፥ ነ ሄሳ ጋሸ ኑና ጫያሳ” ያግስ።

⁴⁶ የሱሲ፥ “ህንተኖ፥ ህገ አስታማረቶ፥ ህንተናካ አየ! አሳይ ቶካናዉ ዳንዳኦና ዴፆ ቶሆ ቶሰታ፥ ሽን ህንተ ህንተ ሁጰስ ሀር አቶሽን ብራ ፄራንካ ቦቸከታ።

⁴⁷ “ህንተ አዋት ዎዳ ናበታ ዱፉዋ ህንተ ጊግስያ ግሾ፥ ህንተና አየ!

⁴⁸ ህዛ፥ ህንተ አዋታ ኦሱዋ ምንናዉ ኤንቲ ዎዳ ናበታ ዱፉዋ ህንተ ሎይያ ግሾ፥ ኤንታ ኢታ ኦሱዋስ ህንተ ማርካ።

⁴⁹ ሄሳ ግሾ፥ ፆሳይ ባ ጭንጫተን፥ ‘ናበታነ ሀዋረታ ታ ህንተዉ ኪታና፥ ሽን ህንተ ባጋታ ዎና፤ ሀራታ ጎዳና’ ያግስ።

⁵⁰ ሀ የለተይ አላመይ መቶሳፐ ሀኖ ጋካናዉ ጉክዳ ናበታ ኡባ ሱስ ኦይሸታና።

⁵¹ አበላፐ ዶምድ ያርሾ በሳስነ ፆሳ ኬፈ ግዱዋን ጉክዳ ዛካርያሳ ሱ ግሾ ሀ የለተይ ኦይሸታና።

⁵² “ህገ አስታማረቶ፥ ህንተና አየ! ኤራተ ቁልፕያ ህንተ ኩሸን ኦይክደታ፥ ሽን ህንተዉ ገለከታ ሀራታካ ገልሰከታ” ያግስ።

⁵³ የሱሲ ያፐ ባናዉ ከይያ ዎደ፥ ህገ አስታማረትነ ፋርሳወት እያራ ኤቀትድ ኦይሾን ዋይሶሶና።

⁵⁴ እያ ዶናፐ ከይያ ቃላን እያ ኦይካናዉ ኮይድ ሄሳ ኦዶሶና።