Luqaasa 10 - ጌሻ ማፃፋ

ላፑን ታማነ ናምኡ ታማረት ኪተትዶሶና

¹ ሄሳፈ ጉየ፥ ጎዳይ ሀራ ላፑን ታማነ ናምኡ አሳታ ዶርስ። እ ባናዉ ቆፕዳ ካታማነ ጉታ ኡባ ስንትድ ባና መላ ናምአ ናምአ ኦድ ኪትስ።

² የሱሲ ኤንታኮ፥ “ሄኮ፥ ሺቃና ካይ ዳሮ ሽን ኦሳንቾት ጉ። ያንያ ግሾ፥ ካ ጎዳይ ኦሳንቾታ ኪታና መላ ዎስተ።

³ ህዛ፥ ቢተ፥ ታኒ ህንተና ዶርሳታዳ ሱመታ ግዶ የዳና።

⁴ ህንተ ብያ ኦግያስ አይኮካ ኦይኮፍተ፥ ሚሸ ግድን ካ ግድን ጫማ ኦይኮፍተ። ኦገ ቦላ ኦናካ ሳሮፍተ።

⁵ ህንተ ገልያ ኬ ኡባ ኮይሮትድ፥ ‘ሳሮይ ሀ ኬስ ግዶ’ ያግተ።

⁶ ሳሮ ዶስያ አስ ሄ በሳን ደእኮ፥ ህንተ ሳሮይ ያን ሸምፓና፤ እፃስ ጊኮ ህንተ ሳሮይ ህንተዉ ስማና።

⁷ ኦሳንቾስ ዳሞዘ በሲያ ግሾ፥ ህንተ ገልዳ ኬን ህንተዉ ሺሽዳባ ኡባ ምሸነ ኡይሸ ያን ጋምእተ። እሱዋ ሶፐ እሱዋ ሶ ዩዮፕተ።

⁸ አይ ካታማካ ህንተ ገልያ ዎደ አሳይ ህንተና ሞክድ፥ ህንተዉ ሺሽዳባ ኡባ ሚተ።

⁹ ሄ ካታማን ደእያ ሀርጋንቾታ ፓሸ፥ ‘ፆሳ ካዎተይ ህንተኮ ማትስ’ ያግድ ኦድተ።

¹⁰ ሽን እስ ካታማ ገልያ ዎደ አሳይ ህንተና ሞኮና እፅኮ ዳባባ ከይድ ሀይሳዳ ጊተ:

¹¹ ‘ኑ ቶሁዋ ቦላ ደእያ ህንተ ካታማ ባና ፕቶስ፥ ሽን ፆሳ ካዎተ ህንተኮ ማታትዳይሳ ኤርተ።’

¹² ፕርዳ ጋላሳን፥ ሀ ካታማፐ ሶዶመ ካታማስ ፕርድ ካዉሸ ግዳናይሳ ታ ህንተዉ ኦዳይስ” ያግስ።

አማኖና እፅዳ ካታማታ

¹³ ካልድካ፥ የሱሲ፥ “ነኖ ኮራዝነ፥ ነኖ ቤተሳይዳ፥ አየ! ህንተናን ኦሰትዳ ማላታት ፅሮሳንነ ስዶናን ኦሰትዳኮ ያን ደእያ አሳይ ካዮ ማኦ ማእድ፥ ብድን ቦላ ኡትድ፥ በን ማሮታን ገል አጋናሽን።

¹⁴ ሄሳ ግሾ፥ ህንተፈ አድ ፅሮሳስነ ስዶናስ ፆሳ ፕርድ ካዉያና።

¹⁵ ነካ ቅፍርናሆማ፥ ሳሎ ጋካናዉ ነና ቁ ኦናዉ ኮያይ? ነ ዱገ ስኦለ ሆለታና” ያግስ።

¹⁶ ቃስካ የሱሲ ባ ታማረታኮ፥ “ህንተና ስኤይ ታና ስኤስ፥ ህንተና ኤኮናይ ታና ኤከና፥ ታና ኤኮናይ ታና ኪትዳይሳ ኤከና” ያግስ።

¹⁷ ላፑን ታማነ ናምኡ ታማረት ኪተትዳ በሳፈ ዳሮ ኡፋይትሸ ስምዶሶና። የሱሳኮ ሺቅድ፥ “ጎዳዉ፥ ነ ሱንን ቱና አያናትካ ኑስ ኪተትዶሶና” ያግዶሶና።

¹⁸ የሱሲ ኤንታኮ፥ “ፃላሄይ ሳሎፐ ዎልአንዳ ዎሽን ታ በአስ።

¹⁹ ሄኮ፥ ሾሽነ ኮርነ የና መላነ ሞርክያ ዎልቃ ዛራና መላ ማታ ህንተዉ እማስ። ህንተና ቆሀናባይ አይኮይካ ዴና።

²⁰ ግዶሽን፥ ህንተ ሱንይ ሳሎ ማዝጋበን ፃፈትዳ ግሾ፥ ኡፋይትተፐ አትሽን፥ ቱና አያናት ኪተትዳ ግሾ ኡፋይቶፍተ” ያግስ።

²¹ ሄ ዎደ፥ የሱሲ ጌሻ አያናን ኡፋይትድ፥ “ሳሉዋ ሳኣ ጎዳዉ፥ ሀይሳ ጭንጫታፐነ ኤራንቾታፐ ገንዳ ያላጋታስ ቆንጭስዳ ግሾ ጋላተታ። ኤ፥ ታ አዋዉ፥ ሄሳ ነ ኦናዉ ሎኦ ሸነ ግድስ።

²² “ኡባባይ ታ አዋፐ ታዉ እመትስ። ናአይ ኦነኮ አዋፐ አትሽን፥ ሀር ዎይኮ ናአይ ቆንጭሳናዉ ኮየይሳፈ ሀር ኦንካ አዋ ኤረይ ባዋ” ያግስ።

²³ ካልድካ፥ የሱሲ ባ ታማረታስ ዱማ፥ “ህንተ በኤይሳ በኤይሳት አንጀትዳይሳታ።

²⁴ ቱማ ዳሮ ናበትነ ካዎት ህንተ በኤይሳነ ስኤይሳ በአናዉነ ስአናዉ አሞትዶሶና፥ ሽን በእቦኮና፥ ስእቦኮና” ያግስ።

ቱማ ሲቆ

²⁵ ሄኮ፥ እስ ጋላስ ሙሰ ዎጋ ኤርያ እስ ኡራይ ደንድድ የሱሳ ያግድ ፓጨ ኦይሾ ኦይችስ። “አስታማርያዉ፥ መርና ደኦ ላታናዉ ታኒ አይ ኦ?” ያግስ።

²⁶ የሱሲ፥ “ሙሰ ማፃፋን ፃፈትዳይስ ዎይጊ? ነ ዋታ ናባባይ?” ያግስ።

²⁷ አደይ ዛሪድ፥ “ ‘ነ ጎዳ ነ ፆሳ፥ ነ ኩመ ዎዛናፐ፥ ነ ኩመ ሸምፖፈ፥ ነ ኩመ ዎልቃፈነ ነ ኩመ ቆፋፐ ዶሳ። ቃስ ነ ሾሩዋ ነ ሁጰዳ ዶሳ’ ያጌስ” ያግስ።

²⁸ የሱሲ እያኮ፥ “ኔኒ ልከ ዛራዳሳ፥ ነካ ሄሳዳ ኦ። ኔኒ መርናዉ ደኦን ዳና” ያግስ።

²⁹ ሽን ኡራይ ባና ፅሎ ኦናዉ ኮይድ፥ “እ ታ ሾሮይ ኦኔ?” ያግስ።

³⁰ እያ ኦይሻስ የሱሲ ያግድ ዛሮ እሚስ፤ “እስ አሰ ደኤይስ የሩሳላመ ካታማፐ ዱገ እያርኮ ካታማ ብሽን፥ ኦገ ቦላ ፓንጋት ከይድ ሾጭዶሶና። እያ ማኡዋ ቃር ኤክድ ሀይቆፐነ ፓፃፐ ግዶን የግድ ብዶሶና።

³¹ ጉየፐ፥ አይሁደ ካህነ እሶይ ሄ ኦግያራ ባ ቡሱ ብሸ ኡራ በእድ ደሽ ግድ አስ።

³² ቃስ እስ ሌወ ደኤይስ ሄ በሳ ጋክሸ ኡራ በእድ፥ ሀራ ሶራ አድ ብስ።

³³ ሽን፥ እስ ሳማረ ቢታ አሰ ደኤይስ ሄ ኦግያራ ይሸ ኡራ በእድ እያዉ ቃትስ

³⁴ እያኮ ሺቅድ፥ እያ ማዱን ቦላ ዛይተነ ዎይነ ትግድ ቃችስ። ባ ሀርያ ቦላ ኡትስድ እማ አቅያ ኬ ኤፍስ። ሄ በሳን እያዉ ኮሽያባ ኡባ ኦስ።

³⁵ ዎንተ ናምኡ ድናረ ከስድ እማ ኬ አዋስ እምድ፥ ‘ሀያና ሀ ኡራ ሎይ ፄላ። ታኒ ነዉ እምዳይሳፈ ቦላራ ነ ከስያባ ኡባ ታ ነዉ ጭጋና’ ያግስ።

³⁶ “ህዛ፥ ሀ ሄ አሳታፐ ፓንጋት ሾጭዳ ኡራስ ሾሮተይ ነዉ ኦና ዳኒ?”

³⁷ ኡራይ ዛሪድ፥ “እያዉ ቃትዳይሳካ” ያግስ። የሱሲ፥ “ነካ ባዳ ሄሳዳ ኦ” ያግስ።

የሱሲ ማርታነ ማይራም ሶን

³⁸ የሱሲ ባ ታማረታራ ኦገ ብሸ እስ ጉታ ጋክስ። ያን ማርታ ጌተትያ እስ ማጫስያ፥ እያ ባ ሶን ሞካሱ።

³⁹ እዉካ ማይራሞ ጌተትያ ምችያ ደአዉሱ፥ ማይራማ ቃላ ስአሸ ጎዳ ቶሁዋ ማታን ኡታሱ።

⁴⁰ ሽን ማርታ ዳሮ ኦሶን ኡንኤታዳ የሱሳኮ ሺቃዳ፥ “ጎዳዉ፥ ታ ምችያ ኦሱዋ ታ ፃላላስ የጋዳ ኡታ አግን ታ ዳቡርያ ዎደ ኔኒ በአሸ ስእ ጋይ? እያ ታና ማዳና መላ ኦድኪ” ያጋሱ።

⁴¹ ሽን ጎዳይ ዛሪድ፥ “ማርታ፥ ማርታ፥ ኔኒ ዳሮባን ኡንኤታሳነ መቶታሳ።

⁴² ግዶሽን፥ ኮየተይ እስባ ፃላላ። ማይራማ ሎኦባ ዶራሱ፥ ሄስካ ኢፐ ኤከተና” ያግስ።