Leeweta 18 - ጌሻ ማፃፋ

ድገትዳ ማጫ አደ ጋሄተ

¹ ጎዳይ ሙሰኮ ሀይሳዳ ያግስ፤

² “እስራኤለ አሳስ ሀይሳዳ ያጋዳ ኦዳ፤ ታኒ ጎዳ፥ ህንተ ፆሳ።

³ ህንተ ካሰ ደእዳ ግብፀ አሳይ ኦይሳዳ ኦፕተ፤ ዎይኮ ሀእ ታኒ ህንተና ገልስያ ካናነ ቢታ አሳይ ኦይሳዳ ኦፕተ፤ ኤንታ ዎጋ ካሎፍተ።

⁴ ህንተ ታ ኪታ ኦተ፤ ታ ዎጋ ናግተ፤ ታኒ ጎዳ፥ ህንተ ፆሳ።

⁵ ታ ኪታነ ታ ዎጋ ናግተ፥ ህንተ ሄሳ ኦኮ ደኦን ዳና። ታኒ ጎዳ።

⁶ “ህንተፈ ኦንካ ባ ማታ ዳቦራ ፃሎፎ። ታኒ ጎዳ።

⁷ “ነ አይዉ ፃላዳ ነ አዋ ካዉሾፋ። እያ ነ አይዉ ግድያ ግሾ እዮ ፃሎፋ።

⁸ “ነ አዋ ማችዉ ፃላዳ ነ አዋ ካዉሾፋ።

⁹ “ነ ምችዉ ፃሎፋ፤ ሶን የለትዳ ዎይኮ ካረን የለትዳ ነ አዋ ናእዉ ዎይኮ ነ አየ ናእዉ ፃሎፋ።

¹⁰ “ነ ናኣ ናእዉ ዎይኮ ነ ናኤ ናእዉ ፃላዳ ነ ነና ካዉሾፋ።

¹¹ “ነ ምቾ ግድያ ግሾ ነ አዋ ማቸ ናእዉ ፃሎፋ።

¹² “ነ አዋ ምችዉ ፃሎፋ፤ እያ ነ አዋስ ማታ ዳቦ።

¹³ “ነ አየ ምችዉ ፃሎፋ፤ እያ ነ አየስ ማታ ዳቦ።

¹⁴ “ነ አዋ እሻ ማችዉ ፃሎፋ፤ እያ ነ አዋ እሻ ማችዉ።

¹⁵ ነ ናኣ ማችዉ ፃሎፋ፤ እያ ነ ናኣ ማችዉ።

¹⁶ “ነ እሻ ማችዉ ፃላዳ ነ እሻ ካዉሾፋ።

¹⁷ “አይዉነ እ ናእዉ ፃሎፋ፤ እ ናኤ ናእዉ ዎይኮ እ ናኣ ናእዉ ፃሎፋ። ኤንቲ እዉ ማታ ዳቦ ግድያ ግሾ፥ ሄስ ኢታ ቱና።

¹⁸ “ነ ማችያ ፓፃ ደእሽን፥ ነ ማቸ ምችዉ ዳዉፋ።

¹⁹ “ኩሸ መቶራ ደእያ ማጫስ ፃሎፋ።

²⁰ “ኔኒ ቱኖና መላ ነ ሾሩዋ ማችዉ ፃሎፋ።

²¹ “ነ ፆሳ ሱንይ ጫየቶና መላ ነ ናይታፐ እሱዋ ታማን ፁጋዳ፥ ሞሎካ ግያ ኤቃስ ያርሾ ኦዳ እሞፋ። ታኒ ጎዳ።

²² “ፆሳ ስንን እፀትዳባ ግድያ ግሾ ማጫሳራ ጋሄተይሳዳ አደራ ጋሄቶፋ።

²³ “ኔኒ ቱኖና መላ መሄራ ጋሄቶፋ፤ ማጫስ መሄራ ጋሄታናዉ መሄ ስን አፎ። ሄስ ዎጋን ባይናባ።

²⁴ “ታኒ ህንተ ስንፈ የደያ ካዎተት ሄ ኦሶታን ቱንዳ ግሾ፥ ህንተ ሄ ኦሶታን ኤንታ መላ ቱኖፕተ።

²⁵ ሀር አቶሽን፥ ቢታይካ ቱንዳ ግሾ፥ እያ ናጋራ ግሾ ታ እያ ሴራስ። ቢትያ ባናን ደኤይ አሳ ጩታሱ።

²⁶ ሽን ህንተ ታ ህግያነ ታ ኪታ ናግተ። ህንተና ግድን ዎይኮ ህንተ ግዶን ደእያ አላጋ ቢታ አሳ ግድን ኦንካ ሄሳ መላ ቱና ኦሶ ኦፕተ።

²⁷ “ህንተፈ ካሰ ሀ ቢታን ደእዳ አሳይ ሄሳ መላ ቱናባ ኦዳ ግሾ፥ ቢትያ ቱናሱ።

²⁸ ህንተ ሀ ቢታ ቱንስኮ፥ ህንተፈ ካሰ ደእዳ ካዎተታ ሀ ቢትያ ጩትዳይሳዳ ህንተናካ ጩቶና መላ ናገትተ።

²⁹ ሄሳታ ዳንያ ቱና ኦሶታፐ እሱዋካ ኦያ አስ ደእኮ፥ ሄ ኡራይ ባ አሳ ግዶፈ ኩረቶ።

³⁰ ሄሳ ግሾ፥ ህንተፈ ካሰ ደእዳ አሳት ኦዳ ቱና ኦሶታ ኡባ ኦድ ህንተ ቱኖና መላ ታ ኪታ ናግተ፤ ታኒ ጎዳ፥ ህንተ ፆሳ” ያግስ።