Leeweta 10 - ጌሻ ማፃፋ

ናዳባነ አብዮዳ ሀይቁዋ

¹ አሮና አደ ናይት፥ ናዳብነ አብዮድ፥ ባንታ እፃነ ጩይስያ ሚሸ ኤክድ እያ ቦላ ታማ ዎዶሶና፤ እያ ቦላ እፃነ ጉጅዶሶና። ጎዳይ ኤንታ ኪትቦና ጮ ታማ ጎዳ ስንን ሺሽዶሶና።

² ሄሳ ጋሶን ጎዳ ማታፐ ታም ይድ ኤንታ ምን፥ ኤንቲ ጎዳ ስንን ሀይቅዶሶና።

³ ሙሰይ አሮናኮ፥ ጎዳይ፥ “ታኒ አሳ ግዶፈ ታኮ ሺቀይሳታ፥ ታ ጌሻተ በሳና። ቃስ አሳ ኡባ ስንን ታ ቦንቸታና” ግድ ኦድዳይሳ ሀይሳ በአ። አሮን ዛሮ እሞና ስእ ግስ።

⁴ ሙሰይ አሮና አዋ እሻ ኡዝኤላ አደ ናይታ ምሳኤላነ ኤልዛፋና ፄግድ፥ “ሃ ይድ ህንተ አዋ እሻ ናይታ አሀ ጌሻ ዱንካንያ ስንፈ ደንድ፥ ጉታፐ ጋፃ ከስተ” ያግስ።

⁵ ኤንቲ ይድ፥ ሙሰይ ኪትዳይሳዳ ኤንታ ካህነተ ማኡዋራ ኤንታ አሀ ቶክድ፥ ጉታፐ ጋፃ ከስዶሶና።

⁶ ሙሰይ አሮናነ እያ አደ ናይታ፥ አላዛራነ እታማራ ሀይሳዳ ያግስ፤ “ህንተ ሀይቆና መላነ ጎዳይ ባ አሳ ቦላ ሀንቀቶና መላ ህንተ ሁጵያ ሜዶፕተ፤ ህንተ ማኡዋካ ዳኮፍተ። ሽን ህንተ እሻት፥ እስራኤለ አሳይ፥ ጎዳይ ባ ታማን ዎዳይሳታስ ዬኮ።

⁷ ጎዳ ትዮ ዛይተይ ህንተ ቦላ ድእያ ግሾ ዱንካንያ ፐንገፈ ካረ ከዮፕተ፤ ከይኮ ህንተ ሀይቃና” ያግስ። ኤንቲ ሙሰይ ግዳይሳዳ ኦዶሶና።

⁸ ጎዳይ አሮናኮ ሀይሳዳ ያግስ፤

⁹ ህንተ ሀይቆና መላ ዱንካንያ ግዶ ገልያ ዎደ ነነ ነ ናይት ዎይነ ኡሽ ዎይኮ ሀራ ማይያ ኡሽ ኡዮፕተ፤ ሄስ ስንፈ ያና የለተስ መርናዉ ኤቅድ ደእያ ዎጋ ግዳና።

¹⁰ ህንተ ጌሻባነ ጌሽ ግዶናባ ቃስ ቱናባነ ቱና ግዶናባ ሻክድ ኤርተ።

¹¹ ጎዳይ ሙሰ ባጋራ ኦድዳ ዎጋ ኡባ እስራኤለ አሳ ታማርስተ።

¹² ሙሰይ አሮናነ አትዳ እያ አደ ናይታ አላዛራነ እታማራ ሀይሳዳ ያግስ፤ ጎዳስ ፁሳ ያርሹዋፈ አትዳ ካ ያርሹዋ ኤክድ እርሾ የጎና ኡክተ። እ ኡባፈ ጌሽ ግድያ ግሾ ያርሾ በሳ ማታን ሚተ።

¹³ ጎዳስ ፁሳ ያርሹዋፈ ሄስ ነናነ ነ አደ ናይታ ጋክያ ግሾ ግድያ ግሾ፥ ሄሳ ህንተ ጌሻ በሳን ሚተ፤ ሀይሳ ህንተ ኦና መላ ጎዳይ ታና ኪትስ።

¹⁴ ሽን ዩሾ ያርሾስ ሺቅዳ አንጋሱዋነ ገዳ ኔኒ፥ ነ አደ ናይትነ ነ ማጫ ናይት ጌሻ በሳን ሚተ። ሄስ እስራኤለ አሳይ ሺሽያ እስፈተ ያርሹዋፈ ነናነ ነ አደ ናይታ ጋክያ ህንተ ግሾ።

¹⁵ ጎዳስ ያርሽዳ ገዳነ ዩሾ ያርሾስ ሺቅዳ አንጋሱዋ ሞዋራ እስፈ ጋድ ጎዳ ስንን ዩሾ ያርሾ ኦድ ያርሻናዉ ሺቆ። ጎዳይ ኪትዳይሳዳ፥ ሄስ ነዉነ ነ አደ ናይታስ መርናዉ ህንተና ጋክያ ግሾ ግዳና።

¹⁶ ሙሰይ ናጋራ ያርሾስ ሺቅዳ ዴሻ ኤንቲ ዋትዳኮ ኤራናዉ ኮይድ ኦይችስ፤ እ ፁገትዳይሳ ኤርዳ ዎደ አትዳ አሮና አደ ናይታ፥ አላዛራነ እታማራ ቦላ ሀንቀትስ።

¹⁷ “ናጋራ ያርሾስ ሺቅዳ አሹዋ አይስ ጌሻ በሳን ምቤከቲ? እ ኡባፈ ጌሽ። ጎዳ ስንን አሳ ናጋራ ድግድ አሳስ አቶተ እማና መላ ሄስ ህንተዉ እመትስ።

¹⁸ ሄ መህያ ሱይ ጌሻ ዱንካንያ ግዶ ገልቦና ግሾ፥ ታኒ ህንተና ኪትዳይሳዳ፥ ህንተ እያ ጌሻ በሳን ማናዉ በሴስ፥ ሽን አግደታ” ያግስ።

¹⁹ አሮን ሙሰኮ፥ “ሄኮ፥ ሀ አሳት ሀች ባንታ ናጋራ ያርሹዋነ ፁሳ ያርሹዋ ጎዳ ስን ኤህዶሶና። ግዶሽን፥ ሄሳ መላባይ ታ ቦላ ጋክስ። ታኒ ናጋራ ያርሹዋ ሀች ምዳባ ግድያኮ፥ ጎዳይ ኡፋይታናሽን አትዴ?” ያግስ።

²⁰ ሙሰይ ሄሳ ስእዳ ዎደ እያ ዛሩዋን ኡፋይትስ።