Leemiso 4 - ጌሻ ማፃፋ

ጭንጫተ ኡባፈ ቦላ

¹ ታ ናይቶ፥ ህንተ አዋ ዞርያ ስእተ፤ ሎይ ስእተ፤ ህንተ አኬካ ደማና።

² ታ ህንተዉ ሎኦ ትምርተ እምያ ግሾ፥ ታ ትምርትያ ካፕተ።

³ ታካ ታ አዋስ ናአ፤ ታ አየስ እያ ዶስያ እስ ናአ።

⁴ ታ አዋይ ታና ሀይሳዳ ያግድ ታማርስስ፤ “ታ ኦዳይ ነዉ ገሎ፤ ታ ኪታ ናጋ፤ ኔኒ ሄሳ ኦኮ ደኦን ዳና።

⁵ ጭንጫተነ አኬካ ደማናዉ ምና፤ ታ ነዉ ኦድያባ ዶጎፓ፤ እያፐ ካረ ከዮፓ።

⁶ ጭንጫተስ ዞኮ ዛሮፓ፤ እያ ነና አሻና፤ እዮ ዶሳ፤ እያ ነና ናጋና።

⁷ ጭንጫተ አያ ግሾ እዮ ደማ፤ ነዉ ደእያባ ዉርስድ ኤክኮካ አኬካ ደማ።

⁸ ነ እዮ ቦንቻ፤ እያ ነና ቁ ቁ ኦና፤ ነ እዮ ኦይክኮ፥ እያ ነና ቦንቻና።

⁹ እያ ነ ሁጵያስ ሳባ ግዳና፤ ቦንቾ ካላቻ እማና” ያግስ።

¹⁰ ታ ናአዉ፥ ስአ፤ ታ ኦደይሳ ኤካ፤ ነ ላይይ አዱቃና።

¹¹ ታኒ ነና ጭንጫተ ኦገ ካለና፤ ሱረ ሆሮጋ በሳና።

¹² ነ ሄመትያ ዎደ ብያባይ ዴና፤ ዎፅያኮካ በታካ።

¹³ ታ ትምርትያ ሎይ ናጋ፤ የዶፋ፤ ትምርተይ ነዉ ደኦ እምያ ግሾ ሎይ ናጋ።

¹⁴ ናጋራንቾታ ኦግያራ ቦፓ፤ ኢታ አሳታ ኦግያን ሄመቶፋ።

¹⁵ እያፐ ሃካ፤ እያን ሄመቶፋ፤ ጉየ ስማ፤ ነ ኦግያን ባ።

¹⁶ ኤንቲ ኢታባ ኦና ደእሽን ስኮይ ኤከና፤ ኤንቲ አሰ ቦና ደእሽን ስኮይ ኤፈና።

¹⁷ ኤንቲ ናጋራ ካዳ ሞሶና፤ ጌላተ ኡሻዳ ኡዮሶና።

¹⁸ ፅሎታ ኦገይ ሴታ ጋላስ ጋካናዉ፥ ጉጅ ጉጅ ፖእያ ዎንታ ፃልቀ መላ።

¹⁹ ሽን ጌላታ ኦገይ ሳካና ማ መላ፤ ኤንቲ አይብን በትያኮካ ኤሮኮና።

²⁰ ታ ናአዉ፥ ታ ኦደይሳ ስአ፤ ነ ሀይ ታኮ ዛራ።

²¹ ነ አይፍያ ስንፈ ሃሶፋ፤ ነ ዎዛናን ናጋ።

²² ኤንታ ደምያ ኡባስ ኤንቲ ደኦ፤ ኤንቲ አሳተስ ፓያተ እሞሶና።

²³ ደኦይ እያፐ ፑልትያ ግሾ፥ ኡባፈ አዳ ነ ዎዛና ምንዳ ናጋ።

²⁴ ነ ዶናፐ ኢታ ሃሳያ ድጋ፤ ዎርዶ ሃሳያ ነ ማታፐ ሃሳ።

²⁵ ስት ጋዳ ስን ፄላ፤ ነ አይፈይ ነ ስንን ደእያባ ትሽ ኦድ ፄሎ።

²⁶ ነ ቶሁዋ ኦግያ ጊግሳ፤ ሱረ ኦገ ፃላላን ሄመታ።

²⁷ ሱረ ኦገፐ ኡሻች ሀድርስ ጎፓ፤ ነ ቶሆይ ኢታ ኦገ ቦናዳ ናጋ።