Leemiso 28 - ጌሻ ማፃፋ

¹ ኢታት ኦንካ የደና ባቃቶሶና፤ ሽን ፅሎት ጋሞ መላ ያዮና ደኦሶና።

² እስ ካዎተይ ማካልኮ፥ ሃረይሳት ዳሮሶና፤ ሽን ካለይስ ጭንጫነ አኬካንቾ ግድኮ፥ ሳሮተነ ዎፕ ደኤስ።

³ ማንቆታ ኡንኤያ ካዎይ ካ ይስያ ዎልቃማ እራ መላ።

⁴ ህገ ቦንቾና አስ ኢታ አሳ ሳቤስ፤ ሽን ህገ ቦንችያ አስ ኢታ አሳ እፄስ።

⁵ ኢታ አሳታስ ሱረ ፕርድ ገለና፤ ሽን ጎዳ ጎይንያ አስ ኡባ አኬከስ።

⁶ ዱረ ግድድ ጭምያ አስ ግዳናፐ፥ ማንቆ ግድድ ሱረ ግደይስ ሎኦ።

⁷ ህገ ናግያ ናአይ አኬካ ናአ፤ ሽን ፓና አሳራ ሄመተይ ባ አዋ ዬላዬስ።

⁸ ምሸ የሎን ታልኤይነ አሰ ቦንቅድ ዱረትያ አስ ሄ አቁዋ ማንቆታስ ኬህያ አሳስ ሺሼስ።

⁹ ህገ ስአናፐ ግድ ባ ሀይ ቱጭያ፥ ኡራ ዎሳይ ጎዳ ስንን እፀትዳባ።

¹⁰ ሱረታ ኢታ ኦገን ካለያ ኡራይ ባ ቦክዳ ኦላን ኩንዳና፤ ሽን ጌሻት ሎኦባ ላታና።

¹¹ ዱረ አስ ባና ጭንጫ ግድ ቆፔስ፤ ሽን አኬክ ደእያ ማንቆይ እያ ፓጬስ።

¹² ፅሎት ፆንያ ዎደ አሳ ኡባይ ኡፋይቴስ፤ ሽን ኢታት ማታ ኦይክያ ዎደ አሳይ ቆሰቴስ።

¹³ ባ ናጋራ ገንያ አስ አጨና፤ ሽን ፓፀይነ ናጋራ አገይ ማሮታ ኤካና።

¹⁴ ጎዳ ኡባ ዎደ ያይያ አስ አንጀትዳይሳ፤ ሽን ባ ዎዛና ምንያ አስ መቶን ገላና።

¹⁵ ማንቆ አሳ ሃርያ ኢታ ሀላቃይ፥ ጉድያ ጋሞነ ኮሻትዳ ባባን መላ።

¹⁶ አኬክ ባይና ካዎይ ባ ደርያ ቆሄስ፤ ሽን አሰ ቆሆና ሀላቅ ዳሮ ላይ ሃራና።

¹⁷ አሰ ዎያ አስ ሀይቃና ጋካናዉ ባቃትሸ ደኤስ፤ እያ ኦንካ ማደና።

¹⁸ ቦረይ ባይና ሄመትያ አስ ቆሄተና፤ ሽን ጌላ አስ አኬኮና ኩንዳና።

¹⁹ ምንድ ኦያ አስ ካ ካሌስ፤ ሽን ፓና አሞ ካልያ አስ ማንቆተ ላታና።

²⁰ አማነትያ ኡራይ ዳሮ አንጀታና፤ ሽን ዱረታናዉ ዎፅያ አስ መቶ በአና።

²¹ ሶምኦ በእድ ፕርዶይ ሎኦ ግደና፤ ሽን አስ ባሶ ኡይ ግሾ ግድ ቆሄስ።

²² ያረ አስ ዱረታናዉ ባቀቴስ፤ ማንቆተ አኬኮና ኦይካናይሳ ኤረና።

²³ አሰ ጮ ሳቢያ አሳፐ ሀንቀትያ አስ ጉየፐ ጋላተቴስ።

²⁴ ባ አዋነ ባ አይዉ ካይሶትድ፥ “ናጋራ ኦብከ” ግያ አስነ ደምዳባ ይስያ አስ እስኖ።

²⁵ ኡዘ አስ ኦሽ ደንስ፤ ሽን ጎዳን አማነትያ አስ ካሌስ።

²⁶ ባናን አማነትያ አስ ኤያ፤ ሽን ጭንጫተን ሄመተያ አስ ሳሮ ደኤስ።

²⁷ ማንቆስ እምያ አስ መቶተና፤ ሽን ኤንታ በአናፐ ግድ ቅልምኤይ ባደታና።

²⁸ ኢታ አሳት ሹመትያ ዎደ አሳይ ቆሰቴስ፤ ሽን ኤንቲ ይያ ዎደ ፅሎት ዳሮሶና።