Leemiso 27 - ጌሻ ማፃፋ

¹ ዎንቶይ ኤሀናባ ነ ኤሮና ግሾ ዎንቶባን ጬቀቶፋ።

² ሀራ አስ ነና ጋላቶፐ አትሽን ኔኒ ነና ጋላቶፓ፤ አስ ነ ግሾ ማርካቶፈ አትሽን፥ ኔኒ ነ ኬሀተባ ኦዶፓ።

³ ሹች ግታ ቶሆ፤ ሻፈይ ዴፆ፤ ሽን ኤያ አስ መያ ኦሽ ናምኣፈካ ዴፄስ።

⁴ ሀንቆስ ቃይ ባዋ፤ ይሎይ ይስያ ድኦ መላ፤ ሽን ቃናተይ ኡባፈ ኢታ።

⁵ ጌምዳ ሲቆፐ ባልያ ዎደ ቆንጨን ሀንቀተ ሎኦ።

⁶ ሞርከይ ነና ታሙ ቶሆ ዬራናፐ ሲቆይ ነና ማዱንፅሰይስ ሎኦ።

⁷ ካልዳ አስ እልሎ ኤስ ሻቴስ፤ ሽን ኮሻትዳ ኡራ ጫምያባይ ማልኤስ።

⁸ ባ ሶ አግድ ዩይያ አስ፥ ባ ኬ አጋዳ ፓልያ ካፎ መላ።

⁹ ሽቶይነ ሳውያ እፃነይ አሰ ኡፋይሰይሳዳ ሲቆ ላገ ዞረይ ሄሳዳ ኡፋይሴስ።

¹⁰ ነ ላገታነ ነ አዋ ላገታ አጎፋ፤ ነ መቶትዳ ዎደ ነ እሻ ሶ ቦፓ፤ ሃሆን ደእያ እሻፐ ማታን ደእያ ሾሮይ ሎኦ።

¹¹ ታ ናአዉ፥ ጭንጫ ግዳ፤ ታና ኡፋይሳ፤ ታና ካያ አሳስ ታ ዛሮ እማና።

¹² ጭንጫ አስ መቶይ ያ ዎደ በእድ ቆሰቴስ፤ ሽን አኬክ ባይና አስ ብድ መቶን ገሌስ፤ ያትድ ጉየፐ ቂሮቴስ።

¹³ ኤሮና አሳስ ዋሰ ገልያ ኡራ ማኡዋ ቃር ኤክተ፤ እማ አሳስ ዋሰ ገልዳ ኡራ ማኡዋ ኦይክተ።

¹⁴ ዎንታ ጉራ ባ ቃላ ቁ ኦድ፥ ባ ሾሩዋ ሳሮተይ እያ ባድያ አሳ መላ።

¹⁵ ዶናትያ ማቻነ አያ ኬ እስኖ።

¹⁶ ጫርኮ ተቃናዉ፥ ዛይተ ኩጭድ ኦይካናዉ ዳንዳኤቶናይሳዳ፥ እዮ ስእ ኦናዉ ዳንዳኤተና።

¹⁷ ብራት ብራታ ፖሸይሳዳ፥ አስ እሶይ እሱዋፈ ታማሬስ።

¹⁸ ባላሰ ም ሎይድ ናግያ አስ እያ አይፈ ማና፤ ባ ሀላቃ ካቦያ ኦሳንቾይ ቦንቸታና።

¹⁹ ሃ ማስቶተዳ ሶምኦ በሰይሳዳ፥ አሳ ዎዛን እያ ኦናተ በሴስ።

²⁰ ሀይቆይነ ዱፎይ ካል ኤሮናይሳዳ፥ አሳ አይፈይ ካልድ ኤረና።

²¹ ብርነ ዎርቀይ ታማን ፓጨትድ ጌየይሳዳ፥ አስ ባ ኤክያ ጋላታን ፓጨቴስ።

²² ካ ኡዱላን ጫደይሳዳ፥ ኤያ አስ ኡዱላን ጫድያኮካ እያፐ ኤያተይ ክቸና።

²³ ነ ዶርሳታ ሀኖታ ሎይዳ ኤራ፤ ነ ዉድያካ አኬካዳ ሄማ።

²⁴ አይስ ጊኮ፥ ዱረተ መርናዉ ዴና፤ ካላችካ የለተፈ የለተስ አና።

²⁵ መላ ማታይ ቡጨትን፥ አጫ ማት ከያ ዎደ፥ ደርያ ቦላ ደእያ ማታይ ሺቅዳፐ ጉየ፥

²⁶ ዶርሳታ እክሰፐ ነ ነዉ ማኦ ከሳና፤ ዴሻታ ባይዛዳ ጋደ ሻማና።

²⁷ አትዳ ዴሻታ ማይ ነዉ፥ ነ ሶ አሳስነ ነ ማጫ አይለታስ ካ ግዳና።